Annou donn Zeova sa ki pli meyer
1 Lalwa ki Zeova ti donn bann Izraelit ti spesifye ki bann zannimo ki ti ganny ofer konman sakrifis ti bezwen “san defo.” En zannimo ki ti annan defo pa ti akseptab. (Lev. 22:18-20; Mal. 1:6-9) Deplis, ler en sakrifis ti ganny fer, tou bann morso gra—bann morso ki pli bon—ti al pour Zeova. (Lev. 3:14-16) Vi ki i ti Papa ek Gran Met bann Izraelit, Zeova ti merit sa ki pli meyer.
2 Parey dan letan ansyen, Bondye i vreman enterese avek kalite servis ki nou pe donn li. Nou servis i devret reflekte respe profon pour Zeova. Byensir, sak dimoun i annan son prop sitiasyon. Me i byen ki nou egzamin nou lekor pour fer sir ki nou pe donn li sa ki pli meyer.—Efe. 5:10.
3 Servi Zeova avek tou nou Leker: Si nou oule onor Zeova e tous leker bann ki ekout nou, nou bezwen pa les nou predikasyon vin zis en routin ki nou fer san avek okenn santiman. Sa ki nou dir lo nou Bondye ek son bann plan merveye, i devret sorti dan nou leker ranpli avek rekonesans. (Ps. 145:7) Sa i fer resorti lenportans pour annan en bon progranm letid ek lektir Labib regilye.—Prov. 15:28.
4 Donn Zeova sa ki pli meyer i osi enplik ki nou imit son lanmour ki i annan pour dimoun. (Efe. 5:1, 2) Lanmour pour lezot dimoun pou motiv nou pour esey partaz mesaz laverite ki donn lavi avek otan dimoun posib. (Mark 6:34) I pous nou pour montre lentere senser dan bann dimoun ki nou koz avek. I fer nou kontinyen mazin zot apre ki nou’n vizit zot pour premye fwa, e i pous nou pour retournen. I osi pous nou pour fer tou sa ki nou kapab pour ed zot progrese spirityelman.—Akt 20:24; 26:28, 29.
5 “Touzour rann glwar Bondye”: En lot fason kot nou donn Zeova sa ki pli meyer se par zefor ki nou fer dan predikasyon. Ler nou’n byen organiz nou lekor e konsantre lo sa travay, nou kapab fer bokou dibyen dan sa letan ki nou annan disponib. (1 Tim. 4:10) En bon preparasyon i ed nou pour koz avek konviksyon e dan en fason kler. Alor sa i ogmant posibilite pour dimoun byen reazir. (Prov. 16:21) Ler nou partaz sa bon nouvel avek lezot, sa ki nou dir sorti dan nou leker i kapab ganny apele en sakrifis ki nou pe ofer pour “rann glwar Bondye.”—Ebr. 13:15.