Nou kapab fer sa ki Zeova i demande
1. Ki santiman ki nou bezwen fer fas avek parler e akoz?
1 Viv an armoni avek lalwa ek prensip Zeova i sa pli bon fason pour viv. I osi ed nou pour etablir en bon fondasyon pour nou byenfe eternel. (Ps. 19:7-11; 1 Tim. 6:19) Me sa lemonn Satan i met nou anba bokou presyon. En lot defi se ki nou pa parfe. Kan nou pe esey akonpli nou responsabilite konman Kretyen, parfwa nou kapab santi ki nou pa pou kapab fer li. (Ps. 40:12; 55:1-8) Nou menm kapab doute si nou pou kapab akonpli tou sa ki Zeova in demann nou pour fer. Ler nou santi koumsa, kwa ki pou ed nou mentenir nou balans spirityel?
2. Ki mannyer Zeova i rezonnab dan sa ki i ekspekte avek nou?
2 Bann Komannman Zeova pa en Fardo: Zeova pa zanmen demann nou pour fer sa ki enposib e sa ki i demann nou pour fer i rezonnab. Son bann komannman pa en fardo me i pour nou prop dibyen. (Det. 10:12, 13; 1 Zan 5:3) I pran an konsiderasyon nou bann febles, “I mazinen ki nou lapousyer.” (Ps. 103:13, 14) Avek konpasyon, Bondye i aksepte tou sa ki nou kapab fer pour servi li, menm si nou sirkonstans i limit lakantite ki nou kapab fer. (Lev. 5:7, 11; Mark 14:8) I envit nou pour larg tou nou fardo lo li, e i asir nou ki i pou fer li posib pour nou reste fidel.—Ps. 55:22; 1 Kor. 10:13.
3. Ki mannyer Zeova i fortifye nou pour andire?
3 Bezwen andire: Bann resi Labib konsernan bann ki ti gard zot fidelite tel parey Eliya, Zeremi ek Pol, i montre nesesite pour andire. (Ebr. 10:36) Zeova ti soutenir zot dan letan difisil e ler zot ti dekouraze. (1 Rwa. 19:14-18; Zer. 20:7-11; 2 Kor. 1:8-11) Nou ganny motive par fidelite nou bann frer dan nou letan. (1 Pyer 5:9) Ler nou reflesir lo sa bann legzanp, sa i kapab ed nou pour pa santi nou dekouraze.
4. Akoz i enportan pour toultan mazin promes Bondye?
4 Lespwar dan promes Bondye i konman “en lank solid e ferm pour nou lam.” (Ebr. 6:19) Sa ti motiv Abraam ek Sara pour aksepte demann Zeova pour kit zot lakour e ‘reste konman en etranze dan later promiz.’ Sa ti ankouraz Moiz pour pa per pour pran pozisyon pour vre ladorasyon. Lespwar dan promes Bondye ti osi fortifye Zezi pour sibir lanmor lo en poto siplis. (Ebr. 11:8-10, 13, 24-26; 12:2, 3) Kan nou gard promes Bondye konsernan en nouvo lemonn vivan dan nou leker, sa pou ed nou reste fidel.—2 Pyer 3:11-13.
5. Akoz i kapab ankourazan pour reflesir lo sa ki nou ti fer dan lepase pour montre nou fidel?
5 Ler nou mazin sa ki nou ti fer dan lepase pour montre nou fidel, sakrifis ki nou ti fer ek lardyes ki nou ti annan, sa i kapab donn nou lafors dan nou servis. (Ebr. 10:32-34) I fer nou rapel lazwa ki nou gannyen ler nou fer sa ki Zeova i demann nou—donn tou sa ki nou annan dan son ladorasyon.—Mat. 22:37.