Responsabilite dan Kongregasyon i devret konsern nou tou
1. (a) Ki Psonm 116:12 i dir, e konman sa i ankouraz nou? (b) Ki lobzektif ki ganny ofer avek bann Kretyen ki Pol ti mansyonnen dan 1 Timote 3:1?
1 Plizyer syek avan ki ranson ti ganny fourni, anba lenspirasyon divin en psalmis ki ti annan gran rekonesans pour mizerikord, delivrans ek led ki Bondye ti’n donn li, ti dir: “Ki mon pou donn Zeova an retour pour tou sa bann byenfe ki i’n fer pour mwan?” (Ps. 116:12) Si nou’n dedye nou lavi avek tou nou leker avek Zeova, nou devret pran plezir pour etablir bann lobzektif dan ladorasyon ki nou pe donn li. Dan lorganizasyon Zeova, i annan plizyer bon lobzektif ki nou kapab atenn. Zapot Pol ti mansyonn enn ler i ti ekrir: “Sa i en parol sir; si en dimoun i swete ganny plas [sirveyan dan kongregasyon, NW] i dezir en fonksyon nob.”—1 Tim. 3:1.
2. Akoz nou kapab dir ki sa dezir pour vin sirveyan i sorti kot Bondye?
2 Eski sa dezir pour servi konman sirveyan i sorti kot Bondye? Wi, akoz se lespri Zeova ki donn son bann serviter motivasyon, kouraz ek lafors ki zot bezwen pour donn li en servis sakre. Par egzanp, ler bann disip Zezi ti ganny persekite, zot ti priye pour ganny lardyes pour prese. Ki ti arive? “Landrwa kot zot ti’n reini ti sekwe, zot tou zot ti ranpli avek Sent-Espri e zot ti konmans anons mesaz Bondye san okenn lafreyer.” (Akt 4:27-31) Vi ki lespri sen ti fer en lefe lo sa bann zapot dan sa sitiasyon, i kapab osi pous en dimoun pour anvi servi konman en sirveyan.
3. (a) Kwa ki kapab anpes en Kretyen anvi servi konman en sirveyan? (b) Si Bondye i donn nou en privilez, ki i pou osi fer apre?
3 Kwa ki kapab anpes en Kretyen matir anvi servi konman sirveyan? Petet i kapab annan bann kalite spirityel, me i panse ki i pa ase kalifye. (1 Kor. 2:14, 15) I kapab ki i annan serten lenkyetid ki anpes li. Nou devret konpran ki si Bondye i donn nou en privilez, i pou donn nou lafors neseser pour akonpli li.—Fili. 4:13.
4. Akoz bann zonm ki pe nepli servi kongregasyon parey avan pa devret dekouraze?
4 Akoz problenm lasante ouswa lezot difikilte, bann Kretyen ki avan ti annan bann responsabilite enportan dan kongregasyon i nepli annan sa bann privilez aprezan. Sa pa devret dekouraz zot. Nou konnen ki bokou zonm fidel ki pa kapab fer otan parey zot ti abitye avan, i touzour reste fidel. (Ps. 25:21) Anfet, bann ki pe servi konman ansyen pour plizyer lannen e ki annan limilite, i kapab kontinyen benefisye lezot konpanyon Kretyen avek zot leksperyans par reste en manm lo konsey bann ansyen. Menm si zot in avanse dan laz ouswa zot in ganny afekte par en dezabilite, zot kapab kontinyen desarz zot responsabilite.
5. Nonm detrwa zonm fidel dan Labib ki ti bezwen espere avan resevwar bann privilez, e ki bann sizesyon ki ganny donnen avek bann ki pe espere ozordi?
5 Si ou anvi servi konman en sirveyan, petet ou devret espere avan ki ou resevwar plis privilez. Pa vin enpasyan. Moiz ti esper pour 40 an avan ki Bondye ti servi li pour liber bann Izraelit dan lesklavaz Lezip. (Akt 7:23-36) Avan ki i ti ganny swazir konman sikseser Moiz, Zozye ti son asistan pour en kantite letan. (Egz. 33:11; Nom. 27:15-23) David ti esper en pe letan avan ki i ti mont lo tronn Izrael. (2 Sam. 2:7; 5:3) Pyer ek Zan Mark ti pas atraver bann peryod kot zot ti ganny rafinen. (Mat. 26:69-75; Zan 21:15-19; Akt 13:13; 15:36-41; Kol. 4:10). Si pour lemoman ou napa responsabilite dan kongregasyon, petet i kapab ki Zeova pe donn ou ase letan pour ganny byen formen e ganny bann leksperyans. Antouka, sers led Bondye anmezir ki ou annan sa dezir pour vin sirveyan, e petet i pou beni ou avek lezot privilez. An atandan, fer zefor pour kalifye pour kapab desarz bann responsabilite dan kongregasyon.
6, 7. (a) Ki kalite bann madanm Kretyen ki zot mari i annan responsabilite dan kongregasyon i bezwen annan? (b) Ki sakrifis ki madanm bann ansyen i pare pour fer pour Zeova e pour zot bann frer ek ser, e konman lezot madanm i kapab ed zot mari?
6 Rol Madanm bann Ansyen ek Asistan Ministeryel: Ler i ti pe mansyonn bann kalite ki bann frer i devret annan pour ganny rekomande konman ansyen ek asistan ministeryel, zapot Pol ti osi koz lo bann madanm. I ti ekrir: “Pareyman bann madanm osi devret serye, e pa abitye malparle. Zot devre annan kontrol lo zot prop lemosyon e fidel dan tou.” (1 Tim. 3:11) I vre ki sa konsey i aplik pour tou bann madanm Kretyen. Me dan sa konteks, i kler ki madanm bann frer ki annan responsabilite dan kongregasyon i devret en bon legzanp dan sa bann laspe.
7 Sa i leka avek plizyer milye madanm bann ansyen ek asistan ministeryel. Zot rezonnab dan zot konportman ek labiyman, pran lavi Kretyen oserye, fer atansyon sa ki zot dir, e fer tou sa ki zot kapab pour reste fidel dan tou keksoz. Deplis, zot pare pour fer bann sakrifis, vi ki zot aksepte ki zot mari i dedye letan avek bann zafer kongregasyon, letan ki zot mari ti’n kapab pas avek zot. Sa bann madanm Kretyen fidel i merit nou lanmour ek lankourazman. Petet plis frer ti pou kapab annan bann privilez dan plizyer nou bann kongregasyon si zot madanm ti pou kontan fer bann tel sakrifis pour benefisye tou dimoun.
8. Ki led madanm en ansyen i kapab donn son mari?
8 I kler ki bann ansyen ki annan responsabilite familyal i kapab ganny led. En Latour Veyer ti fer remarke ki en madanm Kretyen i kapab en led pour son mari. Sa Latour Veyer i dir: “I donn li bann loportinite pour li kapab prepar byen son bann diskour. I pou byen prezerv letan pour son mari e pour li menm par byen organiz son travay kot lakour, par respekte ler manze, e pare kan in ariv ler pour al renyon. . . . Anba gidans son mari, sa madanm Kretyen i kapab fer en kantite pour form bann zanfan dan semen ki zot devret swiv pour fer plezir Zeova.” (Prov. 22:6) Anfet, en madanm in ganny kree pour vin “en led,” e en mari ki saz pou apresye led son madanm. (Zen. 2:18) Led en madanm i kapab permet en msye akonpli pli byen son responsabilite familyal e osi son bann responsabilite dan kongregasyon.
9. (a) Konman bann frer ek ser dan kongregasyon i kapab fer responsabilite bann ansyen vin pli fasil? (b) Ki sakrifis madanm bann ansyen i fer, konman nou kapab montre zot ki nou pa ekspekte ki zot oblize fer sa bann sakrifis?
9 Rol Kongregasyon: Bann frer ek ser dan kongregasyon i kapab fer bokou pour fer responsabilite bann ansyen vin pli fasil. Par konsyan ki bann ansyen i annan zot fanmiy pour pran swen avek, zot pa pou fer bann demann ki pa rezonnab, ki pou pran tro bokou letan ek latansyon bann ansyen. Zot pa devret krwar ki sakrifis ki madanm bann ansyen i fer avek bonker pour aksepte ki zot mari i pas plis letan avek kongregasyon i en devwar ki zot oblize fer. En manman trwa zanfan ki son mari i en ansyen ti dir: “En keksoz ki mon pa zanmen konplent lo la se bann responsabilite anplis ki mon fer volonterman kot lakour pour ki mon mari i kapab desarz byen son responsabilite konman en ansyen. Mon konnen ki Zeova i beni nou fanmiy akoz servis ki mon mari i donnen, e mon pa regrete sa ki i fer pour lezot. Pourtan, mon admet fransman ki akoz mon mari i okipe, mon bezwen anmas bann fey dan zarden ouswa disiplin nou zanfan plis ki avan.” Malerezman, olye montre rekonesans pour sa kantite travay ki sa ser i annan, serten in fer bann remark blesant tel parey, “Akoz ou pa fer pionye?” (Prov. 12:18) I pli byen pour felisit en dimoun pour sa ki i pe fer byen olye ki kritik li pour sa ki i pa kapab fer.—Prov. 16:24; 25:11.
10. Ki mannyer nou kapab montre ki nou santi parey sa psalmis?
10 Parey parol sa psalmis mansyonnen dan lentrodiksyon, eski nou anvi donn Zeova nou meyer? Alors fodre nou tou nou ganny motive, swa pour kalifye pour servi konman ansyen ouswa asistan ministeryel, swa pour ed nou mari, nou papa oubyen nou frer pour akonpli en tel servis. Pa sa i en bon lobzektif!