Viv en Fason rezonnab anmezir ki Lafen i aprose
1 Parol Bondye i souvan dekrir zour Zeova konman “en voler,” ki vin toudenkou, imedyatman, trankilman. (1 Tesa. 5:2; Mat. 24:43; 2 Pyer 3:10; Rev. 3:3; 16:15) Zezi ti dir: “Zot osi met zot pare, akoz Fis-de-Lonm pou vini ler ki zot pa pe ekspekte li.” (Mat. 24:44) Konman nou kapab reste lo nou gard spirityelman anmezir ki lafen i aprose? Dan sa lavertisman enspire, nou kapab trouv en fason pour reisi fer sa: “Viv en fason rezonnab.”—1 Pyer 4:7.
2 Viv en fason rezonnab i enplik vwar keksoz dapre lafason ki Zeova i vwar. (Efe. 5:17) I ed nou pour vwar nou konman bann “etranze ek vwayazer” dan sa sistenm ki nou pe viv ladan. (1 Pyer 2:11) I ed nou pour rekonnet kwa ki vreman enportan, pour fikse bann priyorite, e pour fer bann bon desizyon.—Fili. 1:10.
3 Fikse bann Lobzektif spirityel: Fikse e akonpli bann lobzektif spirityel i ed nou pour viv en fason rezonnab. Eski ou pe pourswiv bann lobzektif spirityel? Eski ou pe esey fer zefor pour lir Labib sak zour, asiste bann renyon Kretyen, lir sak nimero Latour Veyer ek Réveillez-vous! ouswa petet ogmant ou partisipasyon dan predikasyon? Si ou fikse bann lobzektif ki apropriye pour ou, kontinyen pourswiv zot avek determinasyon, e demann Zeova pour beni ou bann zefor. Ou pou sirprann avek rezilta ki ou pou gannyen.
4 En ansyen ti demann en zenn koup ki ti zot lobzektif spirityel. Sa kestyon ti fer zot realize ki si zot senplifye zot lavi e retir bann gro det, zot ti pou kapab fer pionye. Zot ti deside pour fer sa zot lobzektif. Zot ti fer tou sa ki zot kapab pour pey zot det e trouv fason pour redwir bann aktivite initil ki ti pe pran tou zot letan ek lenerzi. Zis enn an plitar, zot ti’n atenn zot lobzektif. Avek ki rezilta? Sa mari ti dir: “San bann lobzektif nou pa ti pou parey nou ete ozordi. Nou pli zwaye, nou lavi i pli anpe e pli meyer. Nou santi ki nou lavi i fer sans e i annan en bi.”
5 Anmezir ki nou esper zour Zeova, annou reste lo nou gard spirityelman par viv en fason rezonnab, e kontinyen konsantre lo fer lavolonte Bondye.—Tit 2:11-13.