Fer konnen Laverite lo Zezi
1 Bann Kretyen swazir, avek led zot bann konpanyon lezot mouton, i “posed sa travay pour rann temwannyaz Zezi.” (Rev. 12:17, NW ) Sa travay i enportan, vi ki delivrans i posib selman atraver Zezi.—Zan 17:3; Akt 4:12.
2 “Semen, Laverite, ek Lavi”: Zezi ti dir: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6) Zezi i sa “semen” akoz se selman atraver li ki nou kapab apros Bondye dan lapriyer e annan en relasyon aprouve avek Li. (Zan 15:16) Zezi i “laverite” akoz i ti akonpli bann profesi e i ti vin larealite bann keksoz ki trouve dan Lekritir Ebre. (Zan 1:17; Kol. 2:16, 17) I vre, bi prensipal vre profesi se pour eklersi son rol enportan dan lakonplisman plan Bondye. (Rev. 19:10) Deplis, Zezi i “lavi.” Pour ganny sa kado lavi eternel, tou dimoun i bezwen demontre lafwa dan son sakrifis.—Zan 3:16, 36; Ebr. 2:9.
3 Sef ek Lerwa: Dimoun i bezwen osi rekonnet sa gran lotorite pour dirize ki Zeova in donn son Garson. Zezi i aprezan Lerwa dan Rwayonm Bondye, e se li ki “tou bann pep pou obeir.” (Zen. 49:10) Zeova in osi swazir li konman Sef kongregasyon. (Efe. 1:22, 23) Nou bezwen ed nou bann etidyan Labib pour konpran ki mannyer Zezi i diriz kongregasyon e servi ‘lesklav fidel e pridan’ pour fourni manze spirityel “kan i ler.”—Mat. 24:45-47.
4 En Gran Pret ki annan Pitye: Vi ki Zezi in eksperyans leprev ek soufrans konman en imen, i “kapab vin an ed tou sa ki ganny tante.” (Ebr. 2:17, 18) Pa i rekonfortan pour bann imen enparfe aprann ki Zezi i konpran zot febles e zantiman entersed pour zot! (Rom. 8:34) Lo baz sakrifis Zezi e atraver son servis konman Gran Pret, nou kapab apros Zeova “avek konfyans” pour ganny ‘led dan moman neseser.’—Ebr. 4:15, 16.
5 Fotespere ki zefor ki nou fer pour fer lezot konn laverite lo Zezi i motiv zot pour obeir e servi li ansanm avek nou.—Zan 14:15, 21.