Kouver ou Teritwar plennman
1 “Mon’n alor anons plennman Bonn Nouvel konsernan Kris.” (Rom. 15:19) Sa parol zapot Pol i montre konman ki i ti serye pour akonpli son travay pour prese, ansennyen, e fer bann disip.
2 Nou osi nou anvi pres plennman sa bon nouvel dan nou teritwar. Nou pe viv dan en letan kot lavi i vreman an danze. Si nou pa arive averti dimoun nou pou koupab. (Ezek. 3:18, 19) Parey zapot Pol, nou anvi kapab dir ki “si okenn ant zot i arive perdi, mon pa responsab.” (Akt 20:26) Konman nou kapab pres pli plennman ler nou pe travay dan nou teritwar? Servi byen House-to-House Record i kapab ed nou pour fer sa.
3 Ler napa personn kot Lakaz: Pour kapab kouver nou teritwar dan en fason efikas i tre enportan pour fer en rikord konplet e egzakt lo bann dimoun ki pa kot zot. Sa i vre ki swa sa teritwar i rarman ganny kouver oubyen ganny travay souvan. Alor nou devret determinen pour esey zwenn en dimoun kot tou lakaz. Ler napa personn ki reponn, nou devret fer bann not apropriye lo en House-to-House Record. Apre nou devret fer sir ki nou retournen e esey rann en temwannyaz avek en dimoun dan sa lakaz.
4 Pour kapab zwenn sa bann ki pa ti la lo premye vizit, serten in servi zot House-to-House Record, e zot in retourn kot sa bann lakaz zis apre ki zot in fini pres port-an-port sa menm zour. Oubyen zot esey retourn en lot zour oubyen diferan ler dan lazournen. Bokou i dekouver ki retourn tar dan apremidi i anmenn bann bon rezilta. Bann ki pa kapab sorti dan predikasyon in resevwar bon rezilta an fezan bann kou-d-telefonn oubyen ekrir let ler plizyer vizit kot serten lakaz pa’n anmenn okenn sikse.
5 Ler ou trouv Lentere: Fer bann not ler ou trouv en dimoun ki enterese. Ekrir non, ladres, nimero telefonn, e okenn lezot lenformasyon lo sa dimoun ki pou itil pour ou pourswiv sa lentere. Si ou pa zwenn sa dimoun ki enterese apre plizyer lesey, petet i bon sanz zour oubyen ler ki ou retournen. Pa dekouraz vitman konsernan en dimoun ki’n demontre lentere.
6 Zapot Pol in kit en bon legzanp pour nou. I’n “anons plennman Bonn Nouvel” dan son teritwar. Si nou servi byen House-to-House Record sa pou ed nou pour pres plennman dan nou teritwar. E nou pou vreman zwaye anmezir ki bokou lezot dimoun i vin disip Zezi Kri! Alor, nou pou kapab repet parol Pol: “Si okenn ant zot i arive perdi, mon pa responsab.”—Akt 20:21, 26.
[Bwat lo paz 6]
Preparasyon—Lakle pour reisi
Apard ki prepar e egzers ou prezantasyon, ou devret demann ou lekor, ‘Eski sa lenz ki mon pe deside pour mete i konvenab pour minister? Dan mon sak predikasyon, eski mon annan sa ki mon bezwen, enkli piblikasyon ki mon deside pour servi? Eski zot dan en bon leta? Eski mon annan mon liv Comment raisonner, trak, ek en kreyon?’ Si ou byen reflesir davans sa pou ed ou pour pas en lazournen pli prodiktif dan predikasyon.