“Kote mon pou trouv Letan?”
1 Lefe ki nou lavi i ranpli avek aktivite, laplipar nou nou konplent letan. I’n ganny dir ki letan i nou resours pli enportan e osi ki i fini pli vit. Alor kote nou pou kapab trouv letan pour bann keksoz ki vreman enportan, tel konman lir e etidye Parol Bondye?—Fili. 1:10.
2 Solisyon se, pa pour esey rod plis letan, me deside ki nou anvi fer dan sa letan ki nou annan. Nou tou nou annan 168 er-d-tan dan en semenn, nou servi apepre 100 er-d-tan pour dormi e dan travay. Alor konman ki nou kapab servi larestan er-d-tan pli byen? Efezyen 5:15-17 i rekomande ki nou ‘pa viv konman bann dimoun inyoran, me konman bann dimoun saz, servi byen tou bann lokazyon ki prezant devan nou . . . , fer tou nou posib pour nou konpran konman Senyer i oule nou azir.’ Sa i montre en bezwen pour servi byen sak loportinite ki nou gannyen pour fer bann keksoz ki Zeova i dir i esansyel.
3 Zezi ti konpar nou letan avek letan Noe. (Lik 17:26, 27) Dan letan Noe bann dimoun ti okipe avek bann aktivite lavi toulezour. Pourtan, Noe ti trouv letan pour konstri en gran lars e pour prese. (Ebr. 11:7; 2 Pyer 2:5) Konman? Par met lavolonte Bondye premye e obeir li par fer bann keksoz “egzakteman parey” i ti ganny demande. —Zen. 6:22.
4 Kwa ki devret vin premye? Zezi ti dir: “Zonm pa viv zis lo dipen tousel me lo tou parol ki sorti dan labous Bondye.” (Mat. 4:4) Tou le semenn, nou resevwar en “rasyon manze [spirityel] kan i ler.” (Lik 12:42) Alor i neseser ki nou annan en lektir personnel ek en progranm letid regilye pour dizer zot tou si nou vreman anvi benefisye. Akoz nou rekonesan pour nouritir spirityel, nou pa konsider li konman en manze ki’n ganny prepare vitman, pour manz vitman vitman zis parey ler en dimoun pe manz nouritir fizik an presan. Plito, en bon lapresyasyon i pous nou pour pran letan pour etidye e apresye bann keksoz spirityel.
5 Pran nouritir spirityel i kapab anmenn ver lavi eternel. (Zan 17:3) I merit en plas pli enportan dan nou progranm toulezour. Eski nou kapab trouv letan pour fer plas pour lir Labib toulezour e prepar bann renyon Kretyen? Wi, nou kapab. Alor, nou pou resevwar sa “gran rekonpans” ki vin atraver konn Bondye e fer son lavolonte. —Pson. 19:7-11.