Kontinyen “fer sa ki byen”
1 Ou ti fer en bon keksoz letan ou ti vin en serviter Zeova Bondye. Aprezan, defi dan sa letan difisil se pour kontinyen “fer sa ki byen.” (Gal. 6:9) Kantmenm ou bezwen fer bokou zefor, ou kapab fer li. Konman?
2 Kiltiv Latitid mantal Zezi: Parey Zezi, ou kapab andir bann leprev si ou kontinyen konsantre lo lesperans Rwayonm. (Ebr. 12:2, 3) Annan sa lasirans ki Zeova i kontan ou e i oule ki ou reisi. (2 Pyer 3:9) Met tou ou konfyans dan li, konfidan ki i pou ed ou. (1 Kor. 10:13) Persevere dan lapriyer, demann Zeova pour ed ou andire. (Rom. 12:12) Rezwir dan konviksyon ki ou perseverans pou fer ou ganny en kondisyon aprouve dan lizye Bondye. (Rom. 5:3-5) Ou fidelite pour kiltiv “sa menm latitid mantal parey Zezi ti annan” pou anmenn lazwa personnel pour ou e fer leker Zeova rezwir.—Rom. 15:5, NW; Prov. 27:11.
3 Kontinyen fer bann bon Travay: Profit plennman bann dispozisyon ki Zeova in fer pour son pep pour ed zot kontinyen fer sa ki byen. Mentenir en bon progranm personnel pour lir Parol Bondye e etidye bann piblikasyon baze lo Labib ki’n ganny prepare par lesklav fidel e pridan. Avek fidelite, prepare, asiste e partisip dan tou bann renyon kongregasyon. Avan e apre bann renyon Kretyen, asosye regilyerman avek ou bann frer ek ser spirityel. Fikse bann lobzektif realis pour ou minister afen ki ou ava kapab annan en vre partisipasyon dan predikasyon e amelyor ou abilite pour prezant bon nouvel avek lezot.
4 Se dan sa fason ki ou pou kapab fer sa ki byen e trouv plis lazwa anmenmtan. Baze lo sa menm laliny, en frer an Itali ti rakonte: “Letan fernwanr i fer, e mon retourn dan lakour apre en zournen dan servis Zeova, i vre ki mon fatige. Me mon kontan, e mon remersye Zeova pour donn mwan en lazwa ki personn pa kapab pran.” Alor, kontinyen fer sa ki byen, e ou osi ou ava trouv lazwa.