‘Ki Mon Kapab Fer?’
1 ‘Ki mon kapab fer?’ San dout, sa kestyon ti dan lespri bann manm en pti group letid Labib, organize par Charles Taze Russell pandan bann lannen 1870. An mezir ki zot ti progrese dan konpreansyon lavolonte Bondye, sa bann etidyan Labib ti sirman demann zot lekor ki zot ti pou kapab fer pour ed lezot aprann konsernan desen Bondye. I ti vreman en tre gran latas, pour difiz partou dan lemonn, sa konnesans Labib ki zot ti pe gannyen.
2 Erezman pour nou, zot ti reisi relev sa defi. Ki mannyer zot ti fer sa? Sakenn ti fer son par, menm si i ti paret pti gin. E sa in fer ki aprezan bann Temwen Zeova i ganny rekonnet partou dan lemonn—en lorganizasyon avek preske sis milyon proklanmater Rwayonm ki pe servi dan anviron 90,000 kongregasyon dan 234 pei ek zil!—Iza. 60:22.
3 Ofer Tou Ou Sipor: I tre enportan ki sakenn ant nou i partisip dan sa gran travay ki Zezi ti predir ti pou ganny fer pandan sa bann dernyen zour. (Mark 13:10) Sirman sa travay pa kapab ganny fer selman par sa pti gin ansyen, oubyen se pa selman bann pionye ki devret annan tou responsabilite pour akonpli aktivite predikasyon. An realite, tou Kretyen voue i annan en rol enportan pour zwe. Nou tou, dan en fason ou en lot, nou kapab partisip dan aktivite predikasyon. (1 Tim. 1:12) Dan nenport ki mezir ki nou fer li, nou pe benefisye nou menm osi byen ki lezot.—1 Tim. 4:16.
4 Nou tou endividyelman, nou kapab osi ofer tou nou sipor pour kominote bann frer Kretyen, dan bann lezot fason enportan. Nou kapab siport bann renyon kongregasyon an asistan regilyerman e an partisipan avek lantouzyasm. (Ps. 122:1, 8, 9) Nou kapab fer nou par pour gard kongregasyon moralman prop. Nou kapab donn nou sipor finansye pour travay mondyal, selon nou mwayen. Nou kapab partisip dan netwayaz Lasal Rwayonm. Tou dimoun i kapab promouvwar en latmosfer lanmour ek linite dan kongregasyon an edan bann nouvo, bann zenn, osi byen ki bann pli aze.—Kol. 3:12, 14.
5 Alors, petet ou demande ‘Ki mon kapab fer?’ Menm si ou zefor i kapab paret pti gin, an fezan ou par, ou kapab kontribye pour fer kongregasyon vin for, aktif, e an bonn sante. Vreman, nou tou nou annan en par enportan pour anmenn loner lo non Zeova!