Bann fo krwayans i ganny entrodwir

ZAPOT Pol ti donn sa lavertisman bann Kretyen ki ti pe viv dan dezyenm lanmwatye premye syek N.L.: “Fer atansyon.” I ti pe averti zot kont kwa? “Ki zot pa tonm dan pyez personn avek zot bann fo largiman filozofi . . . ki fonde lo tradisyon zonm.”—Kolosyen 2:8.

Ver milye dezyenm syek N.L., serten Kretyen ti konmans aksepte lide bann filozof dan ansyen lepok pour ki zot kapab eksplik zot bann krwayans malgre lavertisman Pol. Akoz? Zot ti anvi ganny aksepte par bann dimoun edike dan Lanpir Romen e dan sa fason konverti plis dimoun.

Enn parmi sa bann Kretyen byen renonmen ti Justin Martyr, e li i ti krwar ki Portparol Bondye ti’n fini aparet avek bann filozof Grek, byen lontan avan larive Zezi. Dapre Justin ek bann ansenyan ki ti annan bann menm nide, sa bann filozofi ek krwayans ti kontribye pour fer ki sa kalite larelizyon ti ganny aksepte partou dan lemonn.

Sa kalite larelizyon ki Justin Martyr ti formen ti ganny en kantite krwayan. Par kont, lefet ki enn sa bann fo krwayans ti’n ganny aksepte, sa ti fer ki lezot osi ti ganny entrodwir e an rezilta sa i annan sa ki ozordi bokou dimoun i konnen konman bann lansennyman Kretyen. Pour konn laverite lo sa bann krwayans, konpar sa ki sa bann diferan liv referans i dir avek sa ki Labib i vreman ansennyen.