Letan difisil ozordi
LABIB in predir ki limanite ti pou eksperyans “letan difisil.” I dekrir sa peryod letan konman “bann dernyen zour.” (2 Timote 3:1-5; 2 Pyer 3:3-7) Zezi Kri ti koz lo sa peryod letan kan i ti pe reponn en kestyon ki son bann disip ti’n demann li konsernan “lafen sa sistenm.” (Matye 24:3) Eski nou pe viv dan bann dernyen zour? Konpar sa ki Labib in predir avek sa bann dernyen rapor ki ganny mansyonnen pli ba e apre tir ou prop konklizyon.
Sa ki Labib in predir: konfli mondyal—Lik 21:10; Revelasyon 6:4.
Ki bann dernyen rapor i montre: “Dan bann lager ventyenm syek ti annan trwa fwa plis dimoun ki’n ganny touye ki lakantite dimoun ki ti ganny touye pandan sa 1900 lannen ki’n pase depi konmansman lepok ki Zezi ti ne.”—Worldwatch Institute.
Sa ki Labib in predir: lafamin ek lepidemi—Lik 21:11; Revelasyon 6:5-8.
Ki bann dernyen rapor i montre: An 2004, apepre 863 milyon dimoun lo later pa ti pe ganny byen nouri e sa ti 7 milyon dimoun an plis ki lannen 2003.—United Nations Food and Agriculture Organization.
Apepre en bilyon dimoun i viv dan bann kondisyon deplorab; 2.6 bilyon dimoun pe viv dan bann move kondisyon lizyenn; 1.1 bilyon dimoun napa bon delo pour bwar.—Worldwatch Institute.
Malarya in afekte 500 milyon dimoun; 40 milyon dimoun i viv avek SIDA; an 2005, tiberkiloz in touy 1.6 milyon dimoun.—Lorganizasyon Mondyal pour Lasante.
Sa ki Labib in predir: destriksyon later—Revelasyon 11:18.
Ki bann dernyen rapor i montre: “I tre probab ki byento plizyer diferan kalite zannimo ek plant pou nepli egziste an rezilta sa ki bann imen in fer.” “Resers in fer vwar ki preski 2 tyer sa bann keksoz ki ganny fourni par lanatir pour soutenir lavi lo later in diminyen dan lemonn antye.”—Millennium Ecosystem Assessment.
“Bann gaz ki ganny prodwir an rezilta aktivite ki bann imen i fer, in afekte klima en kantite e i tre probab ki sa pou anmenn bann konsekans danzere pour sa plannet.”—NASA, Goddard Institute for Space Studies.
Ki Labib in predir: bon nouvel lo Rwayonm Bondye pe ganny anonse dan lemonn antye—Matye 24:14; Revelasyon 14:6, 7.
Ki bann dernyen rapor i montre: Pandan lannen 2007, en maksimonm 6,957,854 Temwen Zeova ti pas plis ki 1.4 bilyon erdtan pour pres sa bon nouvel lo Rwayonm Bondye dan 236 pei.—2008 Yearbook of Jehovah’s Witnesses.
Zis parey in ganny mansyonnen pli o, Labib in predir ki menm si i annan tou sa bann move nouvel, i annan rezon pour gard en pwennvi pozitif lo lavenir. Zezi ti koz konsernan sa “bon nouvel” lo Rwayonm Bondye. Ki si sa Rwayonm Bondye? Akoz i donn limanite en rezon pour annan lespwar pour en meyer lavenir? E ki lefe Rwayonm Bondye i kapab annan lo ou?
[Pwen adisyonnel]
Labib in predir sa bann kondisyon ki nou vwar dan lemonn ozordi