Resers pour ganny larepons

“Apre ki nou’n konnen ‘ki mannyer’ nou pou siport nou lekor ek nou fanmir finansyerman, apre ki nou’n ganny bann keksoz ki nou pa ti’n zanmen mazinen ki en zour nou pou annan, tel parey erkonn, bon sistenm lanmizik, . . . sa i kapab fer nou mazinen lot kestyon aprezan, ‘akoz’ nou pe viv. Akfer fer konpetisyon avek lezot? Ki son bi?”—David Myers, en profeser psikolozi kot Hope College, Holland, Michigan Leta-z-ini.

KI MANNYER ou pou reponn sa bann kestyon ki sa ekriven in souleve? Serten i kapab mazinen ki i pa vo lapenn pour pran letan e rod larepons. Me si ou pa fatig ou pour rod larepons sa bann kestyon i konmsi ou pe inyor gravye dan ou soulye. Ou kapab kontinyen marse me ou pa pou santi ou konfortab.

Si ou’n deza mazinen si vreman lavi i annan en bi, ou pa tousel. Dapre enn bann pli gran letid lo valer imen ki’n deza ganny fer par World Value Survey, deplizanpli en kantite dimoun dan bokou pei pe reflesir lo “sinifikasyon ek bi lavi.”

Si ou anvi ganny vre lape lespri ou pou bezwen rod larepons pour sa trwa kestyon enportan.

Kote nou sorti?

Ki bi nou lavi?

Ki lavenir i rezerve pour nou?

Kote ou kapab trouv vre larepons sa bann kestyon? Olye donn larepons atraver spekilasyon ek filozofi, lartik swivan pou donn ou bann larepons ki ganny trouve dan Parol Bondye, Labib. Nou envit ou pour ouver ou Labib e vwar ki i dir pour ou menm.