Defi ki limilite i anmennen

POUR bokou dimoun, i paret ki pour zot limilite napa plas dan sa lemonn ozordi. Bann ki kontan donn lord lezot e ki paret sa bann ki pli reisi, zot touzour oule ki zot premye dan tou keksoz, zot annan en latitid arogan e zot sanmenm sa bann ki persiste e a tou pri zot oule ki tou keksoz i dan zot faver. Olye annan lanvi pour abes zot e imilye zot, lasosyete an zeneral i prefere anvi annan sa kalite stil lavi ki bann dimoun ris e popiler i annan. Bann dimoun ki reisi dan lavi, zot souvandfwa kontan vant zot lekor akoz zefor ki zot in met dan zot travay pour ariv kot zot ete. Olye imilye zot lekor, avek lafyerte zot vant zot lekor pour zot sikse.

En serser Kanadyen ti koz lo sa latitid kot dimoun i toultan “mazin zot premye,” ki egziste dan son pei. Lezot i santi ki nou pe viv dan en lasosyete kot pour diverti kontan san en kontrol i pli enportan ki annan en lavi kot ou bezwen pran ou responsabilite e zot obzerve ki dimoun ozordi i mazin zis zot lekor. Dan sa kalite lemonn, limilite pa en kalite ki bokou imen pou anvi demontre.

Byensir, laplipar dimoun pou dakor ki limilite i en bon kalite pour lezot annan, vi ki i fasil pour viv avek dimoun ki annan limilite. Parkont, dan sa lemonn ranpli avek konpetisyon, serten i per ki si zot demontre limilite zot pou ganny rekonnet par lezot konman bann ki feb.

Parol Bondye, Labib, ti predir ki dan nou letan dimoun pou “vantar, arogan.” (2 Timote 3:1, 2) Eski pa ou pou dakor ki sa profesi pe ganny akonplir? Eski ou vwar okenn valer dan demontre limilite? Oubyen eski ou krwar ki limilite i en febles, e ki i fasil pour profit lo bann ki annan sa kalite?

An realite, Labib i donn bann bon rezon pour apresye e pour kiltiv limilite. Labib i annan en bon pwennvi lo limilite e i koz an byen lo sa kalite. E i osi montre ki vre limilite i en pwen for e non pa en febles.

[Portre lo paz 3]

Ki mannyer nou devret santi anver nou bann lakonplisman dan lavi?