Ki direksyon ou Lavi pe ale?

• Bokou dimoun i telman preokipe avek bann zafer dan lavi toulezour ki zot napa letan pour reflesir lo zot lavi, lo kote zot pe ale?

• Labib i enform nou ki i annan bann levennman ekstraordiner ki pe al arive byento. I osi averti ki bann lorganizasyon imen pou eksperyans en gran sanzman dan lemonn antye. Pour nou benefisye e evit sa maler ki pe al arive, i neseser ki nou determinen pour azir konmela menm.

• I annan serten dimoun ki konnen sa ki Labib i dir e zot esey aplik li me zot les traka lavi pous zot dan en move direksyon.

• Eski ou kontan sa direksyon ki ou lavi pe ale? Ler ou plàn bann aktivite, eski ou reflesir ki lefe zot kapab annan lo ou bann lobzektif ki ou annan pour lavenir?

[Bwat/Portre lo paz 9]

Kwa ki pli enportan pour ou?

Ki ou pwennvi lo sa bann keksoz swivan? Donn zot en nimero depi 1 ziska 10 dapre sa ki pli enportan dan ou lavi.

Bokou sa bann keksoz i annan en plas apropriye dan lavi, me ler ou bezwen swazir, lekel ki vin premye? dezyenm? e ensidswit.

‐‐‐ Divertisman, lanmizman

‐‐‐ Mon travay oubyen mon karyer

‐‐‐ Mon lasante

‐‐‐ Mon prop boner

‐‐‐ Mon msye oubyen mon madanm

‐‐‐ Mon paran

‐‐‐ Mon zanfan

‐‐‐ En zoli lakaz, bann zoli lenz

‐‐‐ Vin pli meyer dan tou keksoz

‐‐‐ Bondye

[Bwat lo paz 10, 11]

Eski ou bann Swa pe anmenn ou kot ou vreman anvi ale?

REFLESIR LO SA BANN KESTYON

DIVERTISMAN/LANMIZMAN: Eski mon moman detant i redonn mwan lafors? Eski i enplik bann lavantir ki kapab met mon lasante an danze oubyen menm paraliz mwan pour lavi? Eski i en form “lanmizman” ki vreman gou pour petet detrwa er-d-tan me ki kapab gat mon lavi? Menm si sa divertisman ki mon swazir i apropriye, eski mon pe pas sitan en kantite letan avek ki fer mwan napa ase letan pour keksoz pli enportan?

MON TRAVAY OUBYEN MON KARYER: Eski i en mwayen pour mwan ganny bann nesesite dan lavi, oubyen mon esklav pour mon travay? Eski mon travay i demann en kantite mon letan ek zefor ki met mon lasante an danze? Eski mon prefere travay plis olye pas letan avek mon madanm, msye, oubyen mon zanfan? Si mon anplwayer i demann mwan pour fer travay ki trouble mon konsyans oubyen ki anpes mwan fer mon aktivite spirityel, eski mon pou fer li zis pour pa perdi mon plas travay?

MON LASANTE: Eski mon pa fatig mwan avek mon lasante, oubyen eski mon toultan pe fer atansyon pour mwan pa afekte li? Eski i topik prensipal mon konversasyon? Eski fason ki mon pran swen avek mon lasante i montre ki mon enterese avek mon fanmiy?

MON PROP BONER: Eski i mon premye lentere? Eski i vin avan boner mon msye, mon madanm, oubyen mon fanmiy? Eski fason ki mon rod boner i montre ki mon en adorater sa vre Bondye?

MON MSYE OUBYEN MADANM: Eski mon enterese avek mon madanm oubyen msye selman ler i fer mwan plezir? Eski mon tret mon madanm oubyen msye avek loner, konman en dimoun ki merit ganny trete avek dinite? Eski mon krwayans dan Bondye i enfliyans fason ki mon vwar mon madanm oubyen msye?

MON PARAN: Si mon ankor en zanfan, eski mon obeir mon paran—reponn avek respe, fer louvraz dan lakour, rantre dan lakour ler ki zot in demande, evit frekantasyon ek aktivite ki zot pa oule? Si mon en adilt, eski mon ekout mon paran avek respe, ed zot kot zot bezwen led? Kwa ki enfliyans mon fason azir avek zot, eski i mon lavantaz personnel ouswa konsey sorti dan Parol Bondye?

MON ZANFAN: Eski mon santi i mon responsabilite pour ansenny mon zanfan bann bon prensip moral, oubyen mon ekspekte ki lekol i fer sa? Eski mon pas letan avek mon zanfan, oubyen mon ekspekte televizyon, zouzou, ouswa en konpiter pour kit zot okipe? Eski mon disiplin mon zanfan sak fwa zot inyor bann prensip Bondye, oubyen eski mon fer li zis ler zot fer mwan ankoler?

EN ZOLI LAKAZ, BANN ZOLI LENZ: Kwa ki determin lakantite latansyon ki mon donn mon laparans personnel ek mon bann keksoz—eski se lenpresyon ki mon anvi fer lo mon vwazen? se byennet mon fanmiy? oubyen lefe ki mon en adorater Bondye?

VIN PLI MEYER DAN TOU KEKSOZ: Eski mon santi ki i enportan pour fer keksoz byen? Eski mon esey fer zefor pour vin pli meyer? Eski i deranz mwan si en lot dimoun i fer en serten keksoz pli byen?

BONDYE: Eski ganny laprouvasyon Bondye i pli enportan pour mwan ki laprouvasyon mon madanm, mon msye, mon paran, oubyen mon anplwayer? Pour kapab kontinyen viv en lavi konfortab, eski mon pou pare pour met servis Bondye dekote?

REFLESIR BYEN LO SA BANN KONSEY LABIB

Dan ou lavi, ki plas Bondye i annan?

Eklezyast 12:13: “Annan lakrent pour sa vre Bondye e gard son bann komannman. Akoz sa i tou lobligasyon zonm.”

DEMANN OU LEKOR: Eski fason ki mon viv i montre ki mon vwar keksoz dan sa fason? Eski se lobeisans anver komannman Bondye ki determin fason ki mon desarz mon responsabilite kot lakour, dan travay, oubyen kot lekol? Oubyen eski se bann lezot preokipasyon oubyen presyon lavi ki determinen si mon pou met letan dekote pour Bondye?

Ki kalite relasyon ou annan avek Bondye?

Proverb 3:5, 6: “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen pran li an konsiderasyon, e li i pou fer drwat tou ou santye.”

Matye 4:10: “Se [Zeova] ou Bondye ki ou devre adore e li tousel ki ou devre servi!”

DEMANN OU LEKOR: Eski mon santi koumsa anver Bondye? Eski tou sa ki mon fer dan lavi toulezour, osi byen fason ki mon azir dan difikilte, i demontre sa kalite konfyans ek latasman avek Bondye?

Ki degre enportan lir e etidye Labib i ete pour ou?

Zan 17:2, 3: “Lavi eternel . . . Savedir ki zot konn ou konman sel vre Bondye, ek Zezi-Kri ki ou’n anvoye.”

DEMANN OU LEKOR: Eski lenportans ki mon atase avek lir e reflesir oprofon lo Parol Bondye i montre ki mon vreman krwar sa?

Ki lenportans asiste renyon Kretyen i annan pour ou?

Ebre 10:24, 25: “Annou rode konman pous kanmarad pour annan lanmour e fer sa ki byen. Pa abandonn zot lasanble . . . sirtou ki la sa Zour Senyer pe aprose.”

Psonm 122:1: “Mon ti rezwir ler zot ti pe dir mwan: ‘Annou al kot lakaz Zeova.’”

DEMANN OU LEKOR: Eski mon fason viv i montre lapresyasyon pour sa lenstriksyon ki trouve dan Parol Bondye? Diran sa mwan ki’n pase, eski mon’n mank renyon zis akoz mon’n les en lot keksoz pas avan?

Eski ou kontan koz avek lezot lo Bondye ek son plan?

Matye 24:14: “Sa Bonn Nouvel Rwayonm pou ganny anonse partou dan lemonn . . . e apre sa, lafen pou arive.”

Matye 28:19, 20: “Ale e fer tou pep vin mon bann disip. . . . Ansenny zot pour obei tou sa ki mon’n konmande.”

Psonm 96:2: “Sant pour Zeova, beni son non. Sak zour rakont sa bon nouvel son delivrans.”

DEMANN OU LEKOR: Eski sa aktivite i vreman annan sa plas ki i merite dan mon lavi? Eski mon partisipasyon dan sa travay i montre ki mon konvenki nou pe viv dan letan lafen?