Kote sa Lemonn pe ale?
Toulezour dan lemonn i annan bann problenm grav ek levennman sokan ki pe arive! Ki savedir tousala?
SEKIRITE PERSONNEL: Bonm i eksploze dan bazar. Ansennyan ek zelev i ganny touye dan lekol. Dek ki paran pa pe gete, pti baba i ganny kidnap. Gran lizour bann madanm ek vyeyar i ganny vole.
LARELIZYON: Bann legliz i siport diferan group lager. Pret i ganny akize pour zenosid. Pret i abiz bann zenn seksyelman; legliz pa devwale. Pli ale bokou plis dimoun pa pe al lanmes, legliz pe ganny vann.
LANVIRONNMAN: Lafore i ganny detrir pour fer plas pour bann proze biznes. Bann pov i koup tou pye dibwa pour ganny dibwa. Sours delo in polye, pa bon pour bwar. Bann desarz lendistri ek serten metod lapes modern pe detrir pwason. Polisyon dan ler pe touf dimoun.
TRAVAY: Larzan ki sak dimoun i gannyen dan bann pei pov i apepre 2,500 roupi par an. Biznes i fermen akoz bann direkter egois, ki kit plizyer milye dimoun san en travay. Bann envestiser i perdi tou zot larzan akoz frod.
LAFANMIN: Toulezour apepre 800,000,000 dimoun i al dormi vant vid dan lemonn.
LAGER: Plis ki 100,000,000 dimoun in perdi zot lavi akoz lager dan 20 tyenm syek. I annan dekwa zarm nikleer pour detrir limanite plizyer fwa. Lager sivil. Lemonn antye i ganny afekte avek teroris.
LEPIDEMI EK LEZOT MALADI: Depi 1918, Lafyev Espanyol ti touy 21,000,000 dimoun. Ozordi SIDA in vin “pli gran lepidemi dan listwar imen.” Kanser ek malad leker i fer dimoun soufer partou dan lemonn.
Pa konsantre lo zis en nouvel. Eski sa bann problenm napa nanryen pour fer avek kanmarad? Oubyen eski zot form parti en group levennman mondyal ki vreman annan en sinifikasyon pli profon?
[Bwat/Portre lo paz 5]
Eski Bondye i vreman enterese avek nou?
Serten dimoun i trouble akoz bann levennman sokan ki pe arive oubyen akoz zot in perdi serten keksoz ki presye pour zot. Sa i fer zot demann zot lekor akoz Bondye pa entervenir pour anpes sa bann keksoz arive.
Bondye i vreman enterese avek nou. I donn bann bon gidans ek vre soulazman konmela menm. (Matye 11:28-30; 2 Timote 3:16, 17) I’n fer laranzman pour met en lafen enn fwa pour tou avek vyolans, maladi, ek lanmor. Son laranzman i montre ki i enterese pa zis avek dimoun sorti dan en nasyon me avek dimoun sorti dan tou nasyon, tribi, ek lalang.—Akt 10:34, 35.
Eski ou enterese avek li? Eski ou konnen lekel Kreater lesyel ek later? Ki mannyer i apele? Ki son plan? Bondye i donn nou larepons sa bann kestyon dan Labib. Dan Labib, i dir nou ki i pe fer pour met en lafen avek vyolans, maladi, ek lanmor. Si nou anvi benefisye, ki nou bezwen fer? Nou bezwen aprann konn li ek son plan. Ki mannyer nou kapab ekspekte benefisye avek son laranzman si nou pa met lafwa dan li? (Zan 3:16; Ebre 11:6) I osi neseser pour obeir son bann komannman. (1 Zan 5:3) Eski ou annan ase lentere pour fer sa?
Pour konpran akoz Bondye i permet sa bann keksoz ozordi, nou bezwen konpran en keksoz tre enportan. Labib i koz lo sa size. Lo paz 15 dan sa piblikasyon, sa size i ganny diskite.