Bann disip ti pe espere an Zerizalenm

SA BANN dimoun ki la i bann disip Zezi. Zot ti obeir Zezi e zot ti reste Zerizalenm. E pandan ki zot tou zot ti pe espere, en gro tapaz ti ranpli sa lakaz antye. Ti parey tapaz en gro divan. E apre bann lalang dife ti konmans aparet lo latet sakenn sa bann disip. Eski ou vwar dife lo latet sa bann disip? Ki savedir tousala?

Ti en mirak! Zezi i dan lesyel avek son Papa, e i ti pe fer lespri sen desann lo son bann disip. Ki sa lespri ti fer sa bann disip fer? Zot tou zot ti konmans koz dan diferan langaz.

En kantite dimoun an Zerizalenm ti antann sa tapaz ki ti parey en gro divan, e zot ti vin gete ki ti pe arive. Serten sa bann dimoun ti sorti dan en lot pei, zot ti’n vin Zerizalenm pour lafet Lapannkot. Sa bann viziter ti vreman etonnen. Zot ti antann bann disip pe koz dan zot prop langaz lo bann keksoz merveye ki Bondye in fer.

‘Sa bann dimoun pa zot tou zot sorti Galile,’ bann viziter ti dir. ‘Konman ki aprezan zot kapab koz dan sa bann diferan langaz ki nou koze dan nou pei?’

Pyer ti debout pour eksplik zot. Avek en lavwa byen for i ti eksplik bann dimoun konman Zezi ti ganny touye e ki Zeova ti lev li dan lanmor. ‘Aprezan Zezi i dan lesyel lo kote drwat Bondye,’ Pyer ti dir. ‘E i’n fer lespri sen desann lo nou parey i ti promet. Se pour sa rezon ki zot in vwar e antann sa bann mirak.’

Kan Pyer ti dir sa bann keksoz, en kantite dimoun ti regrete sa ki ti arive avek Zezi. ‘Ki nou devret fer?’ zot ti demande. Pyer ti dir zot: ‘Zot devret sanz zot lavi e batize.’ Alor sa menm zour apepre 3,000 dimoun ti ganny batize e ti vin disip Zezi.