Zezi avek en madanm kot pwi

ZEZI ti arete pour poze kot en pwi an Samari. Son bann disip ti al dan lavil pour aste manze. Sa madanm ki Zezi pe koz avek in vin sers delo. Zezi ti dir avek sa madanm: ‘Donn mwan en pe delo.’

Sa ti sirprann sa madanm en kantite. Eski ou konnen akoz? Se akoz Zezi ti en Zwif, e sa madanm ti en Samariten. E laplipar Zwif pa ti kontan bann Samariten. Zot ti menm pa koz avek zot! Me Zezi ti kontan tou sort kalite dimoun. Alor i ti dir: ‘Si ou ti konnen lekel ki pe demann ou en pe delo, ou ti pou demann li e i ti pou donn ou delo ki donn lavi.’

‘Msye,’ sa madanm ti dir, ‘sa pwi i fon, e ou menm napa en seo. Kote ou pou ganny sa delo ki donn lavi?’

‘Si ou bwar delo dan sa pwi ou pou swaf ankor,’ Zezi ti eksplike. ‘Me delo ki mon pou donnen i kapab fer en dimoun viv pour touzour.’

‘Msye,’ sa madanm ti dir, ‘donn mwan sa delo! Apre sa mon pou nepli swaf ankor. E mon pou nepli bezwen vin la pour vin sers delo.’

Sa madanm ti panse ki Zezi ti pe koz lo vre delo. Me Zezi ti pe koz lo laverite konsernan Bondye ek son rwayonm. Sa laverite i parey delo ki donn lavi. I kapab donn en dimoun lavi eternel.

Apre Zezi ti dir avek sa madanm: ‘Ale e apel ou msye e retournen.’

‘Mon napa en msye,’ sa madanm ti reponn.

‘Ou’n byen reponn,’ Zezi ti dir. ‘Me ou ti annan 5 msye, e sa zonm ki ou pe reste avek i pa ou msye.’

Sa madanm ti sirprann, akoz sa ki Zezi ti pe dir li ti laverite. Me konman ki Zezi ti konn tousala? Wi, akoz Zezi ti sa Enn ki ti’n ganny promet, e se Bondye ki ti’n anvoy li, alor Bondye ti fer li konn sa. Dan sa menm moman, bann disip Zezi ti retournen e zot ti sirprann pour vwar li pe koz avek sa madanm Samariten.

Ki nou aprann par tousala? I montre ki Zezi ti bon avek tou dimoun dan nenport pei. E nou osi nou devret fer parey. Nou pa devret krwar ki serten dimoun pa bon akoz zot sorti dan en lot pei. Zezi ti oule ki tou dimoun i konn laverite ki anmenn ver lavi eternel. E nou osi nou devret anvi ed bann dimoun pour aprann laverite.