Bondye ti swazir David

ESKI ou kapab vwar ki’n arive la? Sa garson in sov sa pti mouton dan labous sa lours. Sa lours ti’n vin pran sa mouton pour manze. Me sa garson in tay deryer zot, e sov sa mouton dan labous sa lours. Sa lours ti vreman ankoler e i ti debout lo son lapat, sa garson ti atrap li e tap li ziska ki i ti mor. En lot zour i ti sov en mouton dan labous en lyon. Pa i en garson brav? Ou konnen lekel li?

Sa se zenn David. I ti reste dan lavil Betleenm. Son granpapa ti Obed, garson Rit ek Boaz. Eski ou mazin zot? Papa David se Zese. David ti pran swen avek mouton son papa. David ti ne 10 an apre ki Zeova ti’n swazir Sail konman lerwa.

En zour Zeova ti dir avek Samyel: ‘Pran enpe delwil spesyal e al kot lakaz Zese an Betleenm. Mon’n swazir enn son garson pour vin lerwa.’ Kan Samyel ti vwar premye garson Zese, Eliab, i ti dir dan limenm: ‘Sirman i sa enn ki Zeova in swazir.’ Me Zeova ti dir li: ‘Pa gete konman i zoli e gran. Mon pa’n swazir li pour vin lerwa.’

Alor Zese ti apel son garson Abinadab e i ti anmenn li devan Samyel. Me Samyel ti dir: ‘Non, ni menm li Zeova pa’n swazir.’ Apre, Zese ti anmenn son garson Sama. ‘Non, Zeova pa’n swazir li osi,’ Samyel ti dir. Zese ti anmenn set son bann garson kot Samyel, me Zeova pa ti swazir okenn ant zot. ‘Eski se tou garson ki ou annan?’ Samyel ti demande.

‘I reste sa enn pli zenn,’ Zese ti dir. ‘Me i pe pran swen avek bann mouton.’ Kan Zese ti anmenn David kot Samyel, i ti vwar ki i ti en zoli garson. ‘Se sa enn,’ Zeova ti dir. ‘Vid delwil lo son latet.’ E se sa ki Samyel ti fer. Sa zour pou arive kan David pou vin lerwa Izrael.