Solomon kong nih Jehovah a biami hna paoh nih an ton khawhmi kong kha a langhter. Mi pakhat nih sualnak ngan a tuah tikah thil sining cu ruahlopi in a cangmi a si asiloah “a cang sualmi a si” tiah a ti khawh men. Asinain a cangmi kong kha a ruah ṭhan ahcun sualnak ngan a tuah hlanah a ṭhalomi kehlan ka hlan caah a si ti kha a hun hngalhthiam ko lai. Mah kehlan ah a ṭhalomi hawikom, hrimhnak a pe lomi nuamhsaihnak le Khrihfa caah aa tlak lomi hmun hna ah kalnak le website zohnak zong aa tel kho men. Cun thlacam ti lo, Baibal rel ti lo, i pumh ti lo le phungchimnak ah i tel ti lo hna zong in a um kho men. Phungthlukbia ah a langhtermi mah mino pa bantuk in sualnak a tuahmi cu ruahlopi in a si ve men lai lo. Mah in zeidah kan cawn khawh? Sualnak lawng si loin sualnak a kan tuahter khomi kehlan hna zong kha kan hrial a hau. Solomon nih a biapi tukmi mah kong kha fiang tein a langhter.—Matt. 5:29, 30. w24.07 16 ¶10-11

Mah ro cu zeidah a si? Mi nunnak khamhnak rian a simi Pennak kong thawngṭha chim kha a si. (2 Kor. 4:1) Tlak um timi tah zeidah a si? Midang sinah thawngṭha a chimtu Pathian salle kha an si. Paul chan lioah rawl, wine le tangka ti bantuk thil mansung hna phorhnak ah tlak um kha an hman tawn. Cu bantuk in Jehovah nih zumhnak he a sunglawimi thawngṭha kha a kan pek. Cucaah Jehovah bawmhnak thawng in phungchim peng awkah kan herhmi thazaang kan ngei kho ko. A caan ah mi kha kan ṭih men hna lai. Mah kha zeitindah kan tei khawh? Phungchim lo ding in nawl an pek hna lioah lamkaltu pawl nih thla an cammi kong kha ruat hmanh. Ṭihnak an ngei lo i Jehovah sinah a bia kha ralṭha chinchin in an chim khawh nakhnga bawmh ding in an nawl. Jehovah nih an thlacamnak kha a leh colh hna. (Lam. 4:18, 29, 31) Nang zong a caan ah minung kha na ṭih hna ahcun Jehovah sinah minung ṭihnak kha minung dawtnak in tei awkah ka bawm tiah thla cam. w24.04 16 ¶8-9

Jehovah kan dawtnak nih a min thianter awkah a kan forh. Satan nih Jehovah min kong he aa tlaiin a chimmi cu a hmaan lomi a si ti kha midang sinah chimh kan duh hna. (Gen. 3:1-5; Job 2:4; Joh. 8:44) Phung kan chim tikah kan bia a ngaimi hna kha Jehovah cu ahodah a si i zei bantuk Pathian dah a si taktak ti kha chimh kan duh hna. Cun a lang bikmi a sining cu dawtnak a si, a uk ning cu a ding i a dik, a Pennak nih a rauhhlan ah sifah harnak vialte a donghter dih lai i minung chungkhar ah daihnak le lawmhnak a umter lai timi kong kha mikip nih hngal hna seh ti zong kan duh. (Salm 37:10, 11, 29; 1 Joh. 4:8) Midang sinah mah kong kan chimmi cu Jehovah min kan thiantermi a si. Kan min ning in kan nung timi hngalhnak zong nih lungsinak a kan pek. w24.05 18 ¶12