7-13 SETEMBRO, 2026
MWASO 88 Ngulweze Kama Majila Je
Yize Mutuhasa Kulilongesa ha Chilweza cha A-Ngibeone
‘A-Ngibeone yalivwashana ni A-Izalele, yatwama hamuwika no.’—YOSHU. 10:1.
YIZE MUTULILONGESA
Mutumona yize mutuhasa kulilongesa hali A-Ngibeone, ni yize Yehova aalingilile.
1-2. Mumu liaka chili chilemu kulilongesa lusango wa A-Ngibeone?
WAPWILE mwaka 1473 K.M.J, muze A-Izalele atambwile Chifuchi cha Chilakenyo. A-Izalele kakumbile mbonge ya Yeriku ni ya Ayi mu majila a kukomwesa. Alioze, kwalingiwile chuma chimwe chize ayo kakapwile ni kushimbwila. Chimwe chizavu cha akwa-kuya wenyi yichiheta mu mbonge yo. Ayo yamba ngwo kanakatuka kusuku chinji. Kambile chocho, mumu kazangile kupwa ni sambukila ni atu ja Zambi.
2 Atu jacho kapwile A-Ngibeone. Chino che chisuho chitangu chize avulukile A-Ngibeone mu Yisoneko. Sango jinji ja mu Mbimbiliya jakusolola ngwo, kulutwe A-Ngibeone kapwile ni usepa upema ni A-Izalele. Ha mutwe uno, mutumona chize mutuhasa kwimbulula yitanga yipema ya A-Ngibeone. Mutumona nawa yize mutuhasa kulilongesa hali Yehova mumu lia yuma yize yalingiwile kuli ayo.
A-NGIBEONE KAPWILE NI KUFULIELA MULI YEHOVA CHIKWO NAWA KAPWILE AKWA-KULIKEHESA
3. (a) A-Ngibeone te aya? (b) Mumu liaka afupile kulivashana ni A-Izalele?
3 Muze A-Izalele akumbile chifuchi cha Kanana, A-Ngibeone te katwama mu mbonge ya Ngibeone. Mbonge yacho yapwile ni yipanga yikolo. A-Ngibeone kapwile a ku vungu lia A-Hevwe a mu chifuchi cha Kanana. Liapwile limwe vungu lia ku mavungu shimbiali “anene-anene a tachi jinji” kuhiana A-Izalele. (Shimbi 7:1) A-Ngibeone kapwile ni tujita anji nawa a tachi jinji. (Yoshu. 10:2) Kulisa ni mavungu akwo, A-Ngibeone kamwene ngwo chili uhepuke kulimika ni A-Izalele, mumu Yehova mwe te unashila jita. Chikwo nawa, ayo kanyingikine ngwo, Yehova kalakenyene kuchiza A-Kanana eswe mu chifuchi. (Kutuhu. 34:11; Yoshu. 9:24) Mumu lia chino, muze A-Izalele akumbile mbonge ya Yeriku ni ya Ayi, A-Ngibeone yatuma chimwe chizavua kuli Yoshua mu Ngilingali hanga apwe ni sambukila ni ayo.
4. (a) Kulita ni Yoshua 9:8-13, yika A-Ngibeone alingile? (Tala nawa chizulie.) (b) Yika yalingiwileko muze A-Izalele anyingikine ngwo A-Ngibeone kaliongele?
4 Tanga Yoshua 9:8-13. A-Ngibeone kongele Yoshua ha kumulweza ngwo kanakatuka kusuku chinji. Ayo kambile ngwo kananyingika ngwo, Yehova kanongesene tujita twa A-Engitu, chikwo nawa kakwashile A-Izalele kukumba jita yize alingile ni A-Kanana ni chize akumbile Mianangana ja A-Amore, Sahone ni Oge. A-Ngibeone kapwile akwa-mana, mumu kakahanjikile hakutwala ku mbonge ya Yeriku ni ya Ayi jize A-Izalele akumbile. Nyi kachilingile, kachi A-Izalele kanyingikine ngwo, mbonge yo yatwama hakamwihi. Akwa-lutwe ja A-Izalele kakahulile Yehova hakutwala ku chikuma chacho, yatayiza yuma yize A-Ngibeone ambachile, chocho yalinga no usendo wa sambukila. (Yoshu. 9:14, 15) Ha kupalika cha mashimbu akehe, A-Izalele yanyingika ngwo A-Ngibeone kaliongele. Chipwe chocho, yanunga ni usendo wa sambukila mumu akwa-lutwe a chikungulwila “kalishingile kupalikila mu jina lia Yehova.” (Yoshu. 9:16-19) A-Izalele yalweza A-Ngibeone ngwo matwama hakachi ko, malinga milimo ya undungo, mapwa “akwa-kuchaha kunyi ni kutaha meya a mu chikungulwila ni a ku chilumbilo cha Yehova.”—Yoshu. 9:27.
A-Ngibeone kongele Yoshua hanga alinge no usendo wa sambukila (Tala paragrafu 4)
5. Kuchi A-Ngibeone asolwele ufulielo wo muli Yehova?
5 Muze mianangana atano ja A-Kanana anyingikine ngwo A-Ngibeone hapwa masepa ja A-Izalele, ayo yalichinga hanga alukukile mbonge ya Ngibeone. Chocho, A-Ngibeone yaya ni kwita ukwaso kuli Yoshua. (Yoshu. 10:3-7) Yoshua ni tujita twenyi yaya ni kwasa jita ni A-Kanana. Yehova yakwasa A-Izalele kukumba jita yacho. Yehova kashihile A-Kanana amwe ni chiwe chinene-chinene, chikwo nawa, kamanyishine tangwa ndo muze A-Izalele akumbile jita yacho. (Yoshu. 10:9-14) A-Ngibeone kasolwele ngwo kakufuliela muli Yehova muze azangile kupwa masepa ja atu ja Yehova, ni muze echile ukwaso wo. Ayo kapwile ni shindakenyo ngwo, Yehova kakumanununa yilakenyo yenyi, chikwo nawa te maafunga.
6. Yika mutuhasa kulilongesa hali Yehova ha yize alingilile A-Ngibeone?
6 Yika mutuhasa kulilongesa hali Yehova ha yize alingilile A-Ngibeone? Yehova kakusolwela keke atu waze akumufuliela. Yehova kalwezele A-Izalele anongese atu eswe a mu chifuchi cha kanana kuchingako A-Ngibeone. (Kwa. 33:51, 52) Alioze muze A-Izalele alakenyene A-Ngibeone ngwo kechi kwanongesa, Yehova yatayiza hanga ayo anunge ni mwono. Yehova katayijile hanga chino chilingiwe chipwe ngwe muze alingile usendo wacho, A-Izalele kakahulile Yehova yize te atamba kulinga. Chikwo nawa, kupalikila mu ndundo jenyi, Yehova kakwashile A-Izalele kumanununa chilakenyo chize alingile cha kufunga A-Ngibeone.—Yoshu. 9:26; 11:19.
7. Kuchi mutuhasa kwimbulula ufulielo ni kulikehesa cha A-Ngibeone? (Tala nawa chizulie.)
7 Kuchi mutuhasa kwimbulula A-Ngibeone? Mutuhasa kuchilinga ha kupwa ni ufulielo ukolo muli Yehova. Yetu tunanyingika yitanga yinji ya Yehova kuhiana A-Ngibeone, kashika tuli ni yikuma yinji yize yatamba kututwala kujikijila muli iye ni mbunge yeswe. (Samu 40:4, 5) Mutuhasa nawa kwimbulula A-Ngibeone ha kutayiza kulingila Yehova, chipwe ngwe mulimo wacho hi washi ko. (Yoshu. 9:23, 27) Umwe ndumbu avuluka ngwo Luke, yoze wakalakala ku Mbetele, kanewuluka muze amwene umwe ndumbu mukulwana yoze neye wakalaka ku Mbetele kanalikehesa. Ndumbu wacho kapwile ni kulinga milimo yinji yilemu ku Mbetele, alioze muze mandumbu te anatungu Zuwo lia Wanangana, iye yalihana hanga apwe kalayi yoze mafunga Zuwo lia Wanangana ha ufuku ni yikwata yize matunga nayo. Luke Yamba ngwenyi: “Nalilongesa ngwami, kutwatambile kwamba wika ngwetu tuli akwa-kulikehesa. Nyi chamwenemwene tuli akwa-kulikehesa, mutuchisolola mu yize mutulinga.” Ngwe A-Ngibeone, twakusolola ngwetu twakufuliela muli Yehova, muze twakumujikijila tangwa ha tangwa ni kufupa ukwaso wenyi hanga tukumbe yipikalo yetu. Chikwo nawa, twakusolola ngwetu twakumufuliela muze twakulikehesa ni kulinga milimo yeswayo yize anafupu mu ululikiso wenyi.
Mutuhasa kwimbulula A-Ngibeone ha kulinga milimo yeswe yize muyisolola ngwo tuli akwa-kulikehesa (Tala paragrafu 7)
SHIMBWILA UKWASO WA YEHOVA
8. Yuma yipi yika Saulu alingile kuli A-Ngibeone?
8 Mbimbiliya yakusolola yize yalingiwile kuli A-Ngibeone ha mashimbu waze Mwanangana Saulu apwile ni kuyula. Mwanangana Saulu yaputuka kulimika ni A-Ngibeone waze te atwama mu Izalele. Saulu kazangile kushihab A-Ngibeone mumu te kanazange kufunga atu waze apwile mu Izalele ni mu Yunda. Mumu lia chino, A-Ngibeone anji yaashiha. (2 Samue. 21:2, 5, 6) Uno wapwile uhenge unene chinji. Ha chino, Saulu kakamanunwine chilakenyo chize A-Izalele alingile cha kufunga A-Ngibeone.
9. Ha shimbu lika Yehova asolwele ngwenyi kakazangile yuma yipi yize Saulu alingile kuli A-Ngibeone?
9 Yehova kakalingile yuma yipi kuli atu waze amwesene lamba A-Ngibeone ha shimbu lizeliene. Alioze, muze Ndawichi asalakanyine Saulu ha wanangana, Yehova yafwetesa A-Izalele ha kwanehena zala mu chifuchi ha miaka yitatu. Muze Ndawichi afupile kunyingika mumu liaka te kuli zala yinji, Yehova yamulweza ngwenyi, chino chinalingiwa mumu Saulu kashihile A-Ngibeone ha yimwe miaka kunyima.—2 Samue. 21:1.
10. Kulita ni 2 Samuele 21:3-6, kuchi A-Ngibeone asolwele ngwo te kakuvumbika Shimbi ja Zambi?
10 Tanga 2 Samuele 21:3-6. Ndawichi yahanjika ni A-Ngibeone ni kwahula yize te mahasa kwalingila. A-Ngibeone kakechile kuli Ndawichi hanga aahe mbongo jinji. Ayo te kananyingika kanawa Shimbi ja Zambi hakutwala ku chikuma cha kukala manyinga. Shimbi yapwile ni kwamba ngwo, yoze mashiha mukwo, neye katamba kufwa. Kashika, mutu te katambile kufweta mbongo jinji kuli akwo mba anunge ni mwono. (Kwa. 35:30, 31) A-Ngibeone te kananyingika nawa ngwo, mahasa kushiha wika umwe mutu nyi ngwe mwanangana matayiza. Chocho, Ndawichi yatayiza A-Ngibeone hanga ashihe malunga shimbiali a ku munyachi wa Saulu, waze kota akwashile Saulu kushiha A-Ngibeone anji. Ha kupalika cha mashimbu, vula yaputuka kunoka, A-Izalele yapwa ni kulia chinji. Chino yichisolola ngwo, Yehova te hecha kuvila uli A-Izalele mumu lia uhenge uze alingile kuli A-Ngibeone.—2 Samue. 21:9, 10, 14.
11. Yika twalilongesa hali Yehova ha lusango yono?
11 Yika lusango yono atulongesa hali Yehova? Twamona pundu ngwetu, Yehova kali Zambi ya ululi. (Samu 37:28) Atu anji kakumwesa lamba atu waze akukatuka mu yifuchi yeka ni atu waze alisa no. Alioze, Yehova kanazange hanga atu eswe aasolwele ululi. Chikwo nawa, tuvumbi anji a Yehova kapwile kwahungumiona ni kwamwesa lamba. Alioze, Yehova kanalakenya ngwenyi, kulutwe lia matangwa Iye makaawahisa, kechi kamona nawa lamba. Twalilongesa nawa ngwetu, Yehova kakushimbwila hanga tumanunune yilakenyo yetu, ngwe chize apwile ni kushimbwila hanga A-Izalele amanunune chilakenyo cho cha sambukila ni A-Ngibeone.—Tesa ni Amose 1:9.
12. Nyi ngwe matulinga yuma yipi, kuchi mutuhasa kwimbulula A-Ngibeone?
12 Kuchi mutuhasa kwimbulula A-Ngibeone? Chipwe ngwe mandumbu jetu matulinga yuma yipi, nihindu twatamba kulihumikiza ni kushimbwila ngwetu Yehova mahwisa kapinda wacho. Nyi twachilinga, mutusolola ngwetu twakufuliela ngwo, Yehova malulieka yuma ha shimbu lialita. Tutalenu chilweza cha ndumbu Laura French. Iye kaputukile kukalakala ku Mbetele ya Canadá ha 1926. Ha kupalika cha yimwe miaka, kwasolokele umwe kapinda ku mwono wenyi. Kamuliongelele ngwo kali wa chimwe chizavu cha yitanganyanyi, chocho yamuchiza ku Mbetele. Yika iye alingile ha shimbu liacho? Chipwe ngwe kevile yikola yinji ku mbunge, nihindu iye te keshi kwamba yuma yipi hali mandumbu hanji ha ululikiso wa Yehova. Iye yalihana chinji mu mulimo wa kwambujola ni kukalakala ngwe pionelu ha miaka yiwana. Chakuhona kushimbwila, ha 1940 yamusanyika hanga akalakale cheka ku Mbetele. Iye yanunga ni kuwayila Yehova ni ushishiko ha miaka 50 ndo muze afwile. Chizechene ngwe ndumbu French, ni yetu nyi matulinga yuma yipi, tunungenu ni kulinga yuma yalita ni kushimbwila muli Yehova ndo muze malulieka yuma.—Iza. 26:3, 4.
NUNGA NI KUWAYILA YEHOVA NI USHISHIKO
13. “A-Netinime” te aya? (b) Mulimo uka apwile ni kulinga muze aatuswile mu Babilonia?
13 Ha kupalika cha miaka 500 muze Mwanangana Ndawichi afwile, A-Ngibeone yaatongola cheka mu Mbimbiliya. A-Yunda kapwile mu Babilonia ha miaka 70. Chizavu chitangu cha A-Yunda chahetele mu Yerusaleme ni Nguvulu Zorobabele. (Ezera 2:1, 2, 58) Ha mwaka 468 K.M.J, Ezera, longeshi wa shimbi yafuna mu Izalele ni chizavu chikwo cha A-Yunda. (Ezera 7:1-7) Yizavu yeswe yaali yafunyine hamuwika ni usoko wa “A-Netinime.” (Tala maliji mushi lia lifwo ha Ezera 2:58 ni 7:7.) A-Netinime te aya? Ayo kapwile tuvumbi waze apwile ni kukalakala mu tembele, alioze te hi A-Izalele ko. Muchihasa kupwa ngwe, anji a kuli ayo kapwile a ku munyachi wa A-Ngibeone.
14. Kuchi A-Ngibeone asolwele ushishiko wo kuli Yehova? (1 Sango ja Mianangana 9:2)
14 Tanga 1 Sango ja Mianangana 9:2. Tuvumbi waze apwile ni kukalakala mu tembele, kapwile hakachi ka chizavu chitangu cha atu waze afunyine mu Yerusaleme. Chikwo nawa, ayo kasolwele ufulielo unji kuhiana A-Yunda anji waze asalile mu Babilonia. A-Yunda anji kapwile ni mwono upema mu Babilonia, chikwo nawa kapwile ni kuzuka mbongo jinji. Kashika kakazangile kwecha mwono upema uze apwile nawo ni kufuna mu Yerusaleme hanga akwase mulimo wa kutunga. Alioze, amwe asoko A-Ngibeone ni amwe A-Yunda ashishika, kazangile kutungila Yehova tembele yaha ni kumuwayilamo. Kashika ayo afunyine mu Izalele, chipwe ngwe kuchakapwile chashi. Kulisa ni A-Yunda waze apwile ni chihinga mu Izalele, A-Ngibeone kakapwile ni chihinga. Chipwe chocho, ayo yafuna hanga alinge milimo yo mu tembele ni kukwasa kutungulula yipanga ya Yerusaleme.—Nehe. 3:26.
15. Yika lusango wa A-Ngibeone anatulongesa hali Yehova?
15 Yika lusango yono atulongesa hali Yehova? Twalilongesa ngwetu, Yehova kakuzanga atu waze akununga ni kushisika kuli iye. Muze A-Izalele aatuswile mu undungo mu Babilonia, te hikwasala hakehe hanga yikumbane miaka 1,000 chize haze Yehova alamwinyine A-Ngibeone ha mashimbu waze A-Izalele atambwile chifuchi cha chilakenyo. Chipwe chocho, iye yanunga ni kwawahisa. Akwa-munyachi wa A-Ngibeone kaalamwinyine muze anongesene Yerusaleme ni Yunda ha mwaka 607 K.M.J. Muze aatuswile mu Babilonia, ayo yanunga ni kulihana chinji mu uwayilo wamwenemwene ha kukalakala mu tembele hamuwika ni A-Levi. Amwe kota te katwama hakamwihi ni tembele. (Ezera 2:70; Nehe. 11:21) Mumu lia kulingila Zambi mu tembele, mwanangana wa Persia yatesa ngwo ayo te katambile kufeta nawa lijimu.—Ezera 7:24.
16. Kuchi mutuhasa kupwa ni ufulielo ngwe wa A-Ngibeone?
16 Kuchi mutuhasa kwimbulula A-Ngibeone? Chizechene ngwe A-Ngibeone, ni yetu tunazange kulinga yeswayo mutuhasa hanga tuwayile Yehova ni kukwasa akwetu hanga no achilinge. Twakulihana yetwene hanga tuwayile Yehova mumu twakumuzanga, chikwo nawa tunazange kumuvisa kuwaha. Yino ye alingile Alwin, umwe ndumbu wa ku Filipinas. Iye kapwile ni mulimo upema uze te akumufweta mbongo jinji, alioze kazangile kulihana chinji mu mulimo wa Yehova. Mashimbu eswe kalayi wa mbonge apwile ni kumeneka chikungulwila cho, iye kapwile ni kukwasa ha kwambujola ha mashimbu jacho. Chocho, yalemba kuli Yehova ni kumwita ukwaso hanga awane umwe mulimo uze muumukwasa muze mapwa pionelu wa shimbu lieswe. Iye kanyingikine ngwenyi, nyi machilinga mapwa ni mbongo jikehe. Chipwe chocho, iye kawahililile muze awanyine mulimo weka. Chocho yaputuka mulimo wa upionelu. Mukwo-pwo neye yapwa pionelu. Mu waali wo, ayo yakwasa atu 21 kunyingika umwenemwene. Pundu lume, Yehova kawahishile tachi jo. Mutuhasa kupwa ni shindakenyo ngwetu, Yehova kakulemesa tachi jeswe twakusa ni milimo yize twakumulingila, chikwo nawa iye matufunga ni kutwaha yeswe yize mutufupa.—Mateu 6:33.
17. Yuma yika twalilongesa ha chilweza cha A-Ngibeone?
17 Twalilongesa yitanga yinji yipema ya Yehova ha kumona yize alingilile A-Ngibeone. Twamona ngwetu iye kali mukwa-kulikehesa, mukwa-keke, mukwa-ululi, chikwo nawa kashishika. Mashimbu eswe, iye kakuwahisa tuvumbi twenyi waze ashishika. Chikwo nawa, twamona yikuma yilemu ha lusango wa A-Ngibeone. Chizechene ngwe A-Ngibeone, nyi twapwa ni ufulielo ukolo ni kujikijila muli Yehova, iye matukwasa muze mutupalika mu kapinda. Tunazange kupwa akwa-kulikehesa hanga tulinge mulimo weswawo Yehova matwaha mu ululikiso wenyi. Chikwo nawa, nyi ngwe matulinga yuma yipi, tunazange kulihumikiza ni kushimbwila hanga Yehova atuwahise ni kuhwisa kapinda wacho ha shimbu lialita. Tunazange kununga ni kuwayila Yehova ni ushishiko. Nyi twachilinga mutusolola ngwetu, twalilongesa yikuma yilemu ha lusango wa A-Ngibeone.
MWASO 148 Yehova Kakulamwina
a Mu chizavu cha A-Ngibeone, kota mwapwile nawa atu a mu mbonge jitatu ja A-Hevwe: Chefira, Mberote ni Kiriate-Yerimi.—Yoshu. 9:17.
b Mbimbiliya kuyishi kusolola mumu liaka Saulu atumine kushiha A-Ngibeone, alioze akwa-mana amwe kakwamba ngwo, Saulu kakazangile nawa hanga yilambala atwame mu Izalele.