Chiwanyino cha Mwene cha Ufuku —Chize cha Kulemesa Zambi

AKWA-KRISTU kaahele shimbi ya kulinga chiwanyino cha kwiwuluka kufwa cha Kristu. Chiwanyino chacho kakuchivuluka nawa ngwo “Seya ya Mwene.” (1 A-Korindu 11:20) Mumu liaka chili ni ulemu? Mashimbu aka atamba kuchilinga? Nawa kuchi chatamba kuchilinga?

Yesu Kristu kaputukile chiwanyino chacho ha ufuku wa 33 ha M.J, ha tangwa lia Chizomboka cha A-Yunda. Chizomboka te kakuchilinga kamuwika ha mwaka, ha tangwa 14 lia kakweji wa Nisane wa A-Yunda. Mba anyingike mashimbu jacho, A-Yunda te kakushimbwila kusokoloka cha mitondo. Tangwa liacho liakulinga 12 a maola a pangu ni 12 a maola a milima. Kutetama cha kakweji mutangu ha mashimbu akusokoloka cha mitondo che te chakusolola ngwo tangwa litangu lia Nisane hiliaputuka. Chizomboka chacho te chakuputuka muze hikwapalika matangwa 13.

Yesu kalingile Chizomboka hamwe ni apostolo jenyi, alioze muze te Yundase Keriote hatuhuka, hohene Yesu yaputuka Chiwanyino cha Mwene cha Ufuku. Chiwanyino chino yichisalakana Chizomboka cha A-Yunda nawa te chatamba kuchilinga kamuwika ha mwaka.

Mukanda wa Mateu unambe ngwo: “Yesu yanda mbolo, yayiwahisa, yayipalula, yayihana kuli tumbaji twenyi ngwenyi: ‘Wenu, nulie; mbolo yino mujimba wami. Yanda musenge, yasakwila, yauhana kuli ayo ngwenyi, Nuunwe eswe; mumu musenge uno manyinga jami a usendo waha waze mamwangana hali anji ha ukonekeno wa milonga.’”—Mateu 26:26-28.

Amwe kakutayiza ngwo mbolo yalumukine mujimba wa Yesu nawa ngwo vinyu yalumukine manyinga jenyi. Alioze muze ahanyine mbolo yacho mujimba wa Yesu te uchili ni mwono. Shina apostolo ja Yesu kalile mujimba ni kunwa manyinga jenyi? Ka, mumu kulinga chino te kwehuka shimbi ya Zambi. (Uputukilo 9:3, 4; Levi 17:10) Kulita ni mukanda wa Luka 22:20, Yesu kambile ngwenyi: “Musenge uno we usendo waha mu manyinga jami, waze anamwangana hali yenu.” Shina musenge wacho wapwile lume “usendo waha”? Chino te muchipwa chikalu, mumu usendo uli usepa hi musenge ko.

Kashika, mbolo ni vinyu yili yilayi wika. Mbolo yinalumbunuka mujimba wa Kristu uze kuushi shili. Yesu kanjile mbolo yize yasalile ha chiwanyino cha Chizomboka. Mbolo yacho te kuyishi futunwiso. (Kutuhuka 12:8) Mbimbiliya yakutesa chinji futunwiso ngwe shili hanji kalimbalimba. Mbolo yinalumbunuka mujimba ungunu wa Yesu uze ahanyine ngwe chitapo. Uze te kuushi shili—Mateu 16:11, 12; 1 A-Korindu 5:6, 7; 1 Petulu 2:22; 1 Yoano 2:1, 2.

Vinyu yichila yinalumbunuka manyinga a Yesu. Manyinga jacho kakulemesa usendo waha. Yesu kambile ngwenyi manyinga jenyi te kumamwangana “ha ukonekeno wa shili.” Chocho atu mahasa kupwa apema kumeso ja Zambi ni kwaatayiza mu usendo waha kuli Yehova. (A-Hepreu 9:14; 10:16, 17) Usendo uno waha, we wahana uhashi kuli akwa-Kristu ashishika 144,000 hanga aye mu malilu. Mu malilu ayo makapwa mianangana ni asasendote hanga akawahise akwa-hashi eswe.—Uputukilo 22:18; Jeremia 31:31-33; 1 Petulu 2:9; Usolwelo 5:9, 10; 14:1-3.

Aya atamba kulia mbolo ni kunwa vinyu? Waze wika ali mu usendo waha—waze ali ni kutalatala cha kuya mu malilu—e atamba kulia mbolo ni kunwa vinyu. Spiritu ya Zambi yakwaaha ushindakenyo ngwo kanaasakula hanga akapwe mianangana mu malilu. (A-Roma 8:16) Ayo kali nawa mu usendo wa Wanangana hamwe ni Yesu.—Luka 22:29.

Kuchi mutwamba hakutwala kuli waze ali ni kutalatala cha mwono wa mutolo mu Paraisu hano hashi? Ayo kakwononokena shimbi ya Yesu nawa kakukunguluka ha Chiwanyino cha Mwene cha Ufuku, kakusolola vumbi nawa keshi kulia mbolo ni kunwa vinyu. Kamuwika ha mwaka ha kakweji wa Nisane ha tangwa 14, Yela ja Yehova kakulinga Chiwanyino cha Mwene cha Ufuku. Chipwe ngwe waze ali ni kutalatala cha kuya mu malilu kali akehe, nihindu chiwanyino chino chili ni ulemu unji kuli akwa-Kristu eswe. Chiwanyino chacho chakupwa shimbu lipema lize atu eswe mahasa kusolola zango lio kuli Yehova Zambi ni kuli Yesu Kristu.—Yoano 3:16.