Yihula ya Waze Akutanga Mikanda Yetu

Nyi umwe ndumbu ni umwe pangi waze kalimbachile mapomba mu zuwo mwaukawo chakuhona yikuma yilemu, shina chino muchisolola ngwo ayo kalinga shili yize muyifupiwa kutunga komite ya kusopesa?

Ewa, atu waze kalimbachile nyi mapomba mu zuwo mwaukawo chakuhona yikuma yilemu, chino muchisolola pundu ngwo kalinga utanji. Kashika nyi kukushi yikuma yilemu yize yaatwalanga mba apombe mu zuwo mwaukawo makulwana mahasa kutunga komite ya kusopesa.—1 A-Korindu 6:18.

Chizavu cha makulwana katamba kuhengwola chikuma chacho ni ushindakenyo weswe hanga anyingike nyi katamba kutunga komite ya kusopesa nyi ka. Chakutalilaho, makulwana mahasa kulihula ngwo: Shina ayo kali tusendo? Kutala makulwana hanaakwase hakutwala ku yitanga yize akusolola kuli umwe ni mukwo? Mumu liaka ayo apombanga mu zuwo mwaukawo? Shina ayo kalianganga kulitesa hanga akapombe mu zuwo mwaukawo? Kutala ayo kapwanga ni uhashi ukwo, nyi hanji kwalingiwanga yuma ya susumuku yize yaatwalanga mba apombe mu zuwo mwaukawo, mumu te keshi ni kuze maya? (Chilumbununyi 9:11) Shina hita umwe wa kuli ayo kalipombelanga? Hita chikuma chalisa, kashika mukuhasa nawa kusoloka jimwe sango jize mujihasa kukwasa makulwana a mu chikungulwila ha chiyulo chize ayo makwata.

Muze chizavu cha makulwana mahengwola sango jeswe, mba hi makwata chiyulo cha kunyingika nyi matunga komite ya kusopesa nyi ka.