Yena te Unachinyingika Nyi?

Kuchi atu ku shakulu te akuwika kahia muze ali mu wenyi?

Mu Uputukilo kapitulu 22, Mbimbiliya yinambe ngwo, Zambi kalwezele Apalahama hanga aye ku chihela kusuku ni zuwo lienyi hanga ahanyineko mulambu. Hakwamba ngwo: “Apalahama yanda kunyi ja mulambu wa kulumba, yajitwika hali mwanenyi Izake. Yambata kahia ni poko mu kwoko lienyi. Chocho eswe ni aali ayile hamuwika.”—Uputukilo 22:6.

Mbimbiliya kuyishi kulumbununa chize atu ku shakulu aputukile ni kahia. Shina Apalahama ni Izake kawikile kahia mba yakambata mu wenyi wo? Umwe mutu wakuhanjika hakutwala ku Mbimbiliya yamba ngwenyi muchihasa kupwa chikalu kahia “kununga ni kutemuka mu wenyi usuku.” Chipwe chocho, Apalahama ni mwanenyi kota kambachile yuma yeswe yize te mafupa hanga awike nayo kahia.

Alioze akwo kakwamba ngwo, kuchakapwile chashi kuwika kahia ha mashimbu jacho. Chipwe chocho, atu te kakusa tachi hanga awike kahia ni makala waze anakatuka ha kahia, hanji kwanda kahia maha mwenyembo. Akwa-mana anji kakutayiza ngwo Apalahama kambachile makala a kahia mu wenyi wo. Iye kota kaasele mu chimwe chikashi, hanji mu uma uze asele lwoji ni kuumbata mu wenyi. (Izaia 30:14) Hachino, iye kota kazachishile makala waze ali ni kahia ni jimwe kunyi jomu, ha shimbu lieswelio te mazanga kuwika kahia.