Ukwaso Kuli Mapwo Waze Akwamwesa Lamba

Mu jw.org muli chimwe chikuma chinambe ngwo, “Segurança da mulher O ponto de vista da Bíblia.” Link yize yili kusongo lia chikuma chino, muhasa kuyipola hanga uchize PDF ya chikuma chino, hanga uhase kuchichiza ngwe kamukanda ka mafwo awana. Umwe ndumbu wa pwo watwama mu Estados Unidos avuluka ngwo Stacy, yamba ngwenyi: “Yami nachijile jimwe copia ja kamukanda kacho yinguya hamwe ni umwe ndumbu wa pwo ni kujitwala kuli mapwo waze apwile ni kwamwesa lamba.”

Umwe yoze te wakukalakala ku chihela chacho, yeta kuli ndumbwetu macopia amwe hanga ahane kuli atu akwo waze atwama mu chihela chacho. Muze achilingile, yahasa kuhana 40 ya tumikanda twacho hamwe ni 30 kartau ya kunjila nayo ha jw.org. Ha tangwa likwo, mwata yoze wapwile ni kufunga mapwo jacho, yeta hanga mandumbu aye ku chihela chacho ni kusolwela mapwo jacho chize akulinga longeso lia Mbimbiliya.

Stacy hamwe ni mandumbu a mapwo aali, kahashile nawa kwambujola kanawa ku chihela chikwo kuze apwile ni kufungila mapwo jacho. Ha chisuho chino, ayo yahichika wika macopia atano, alioze atu yeta hanga ayo atwale nawa macopia akwo. Pwo umwe yoze wapwile ni kukalakala ku chihela chacho yamba ngwenyi: “Tumikanda tuno mutukwasa chinji mapwo waze ali kuno. Yino ye te tunafupu lume.” Ha kumeneka chikwo chize mandumbu alingile, mapwo anji yalikungulula hamuwika hanga amone chize akulinga longeso lia Mbimbiliya. Chocho, aali a kuli ayo yamba ngwo kanazange kuya ku kukunguluka ha poso muyizaho.

Stacy yamba ngwenyi: “Chapemene chinji kumona chize atu awahililile ha kutanga lusango yono mupema. Hanyima lia kuchiza macopia ni kukoneka kamukanda kacho, atu waze akukamona kakukazanga chinji. Yino nawa yili jila yipema ya kwambulwilamo sango jipema kuli mapwo wano. Chapwile chipema chinji kumona chize mapwo jacho alivwile muze evwile sango jipema. Chikwo nawa, tunashimbwila hanga tumone chize Yehova mawahisa tachi jetu hanga tununge ni kwambulwila sango jipema mapwo wano.”