Chize Yesu te Akulongesa

LIMWE tangwa, Yesu yalweza kuli umwe lunga ngwo iye chamutamba kuzanga mwenyembo wenyi. Lunga wacho yahula Yesu ngwenyi: ‘Mwenyembo wami iya?’ Alioze, Yesu te kananyingika yize lunga wacho te ananyongo. Lunga wacho te kakunyonga ngwo atu a ku munyachi wenyi ni a ulembelo wenyi e te enyembo jenyi wika. Alioze, tutalenu yize Yesu anakamulweza.

Ha mashimbu akwo Yesu te kakulongesa ni yishima. Chino che iye alinga haliapwila. Iye kata chimwe chishima hakutwala kuli umwe Ka-Yunda ni Ka-Samaria. Yetwe hi twalilongesa kulu ngwo A-Yunda anji te keshi kuzanga A-Samaria. Chishima anakata Yesu chino:

Limwe tangwa umwe Ka-Yunda te kanapalumuka mu jila yakuya ku Yeriku. Yalitakana ni eji. Ayo yamutambula mbongo nawa yamulamba yasala hakehe ni kufwa.

Hakupalika cha amwe mashimbu, umwe sasendote Ka-Yunda yapalika mu jila yacho. Iye yamona lunga wacho wakupupula kulu. Yika yena wanyonga ngwo iye te malinga? Iye yatangunuka sali likwo lia jila yaya kwenyi. Nawa umwe mutu mukwa ufulielo unji neye yeza. Te Ka-Levi. Shina iye yamana kama? Ka, ni neye kakamanyine hanga akwase lunga wacho wakupupula. Yena muhasa kumona ha chizulie sasendote ni Ka-Levi hapwa kusuku mu jila.

Alioze, tala hano yiya yoze uli ni lunga wakupupula? Kali umwe Ka-Samaria. Nawa iye kanakwasa Ka-Yunda. Iye kamusa yitumbo ha yilonda yenyi. Mba hi iye yatwala Ka-Yunda wacho ku chimwe chihela chize te iye mahasa kuhwima ni kutwama kanawa.

Muze hamanyisa kuta chishima chino, Yesu yamba kuli lunga yoze wamuhulile, ngwenyi: ‘Iya hakachi ka atu wano atatu wapwa mwenyembo wa lunga yoze apupulanga? Shina sasendote, Ka-Levi nyi Ka-Samaria?’

Lunga wacho yakumbulula ngwenyi: ‘Mwe Ka-Samaria. Iye kapwa mutu mupema kuli lunga yoze apupulanga.’

Yesu yamba ngwenyi: ‘Yena wamba kanawa. Kashika, ni yena yako ukalinge chizechene hali akwenu.’

Yena ushi kuzanga chize te Yesu akulongesa? Yetwe mutuhasa kulilongesa yuma yinji yilemu, nyi twapanjika yize Yesu anambe mu Mbimbiliya, nyi ngwami?