Mwene Davidi wannimuziwa deretu Yehova vina wannimukuluvela. Mudhidhi wafwara-fwariwiye na amwiddani aye, motagiha na Mwene Saul, Davidi wahimukumbirha Yehova nikamihedho modhela nlobelo. Mwakulile Yehova nlobelo na Davidi vina amukamihedha, iyene ohiloga: Yehova onokalawo! (Ms. 18:46) Davidi wafuna aloge eni na mazu aba? Nivuru dhahi nihiloga wi na mazu aba Davidi wela ologa nikuluvelo naniye nawi Yehova Mulugu onodhowavi akamihedhaga adhari aye. Davidi wanziwa wi Yehova wannoona dhetene dhampadduwela vina wali womala-nawale wi amukamihedhe, jijene emukamihedhile Davidi odhowagavi amulabelaga Yehova vina amuttittimihaga. (Ms. 18:28, 29, 49) Okuluvela wi Yehova Mulugu onkalawovi jinanikamihedhe omulabela na murima wehu wotene. Jijuwene enanivahe guru ya owanana yoweha-yowehavi vina onikamihedha odhowagavi nikosaga mpaka vanwodhelihu mmabasani mwaye. Enele onikamihedha vina okalavi ofiyedheya na Mulugu wehu. w24.06 20-21 ddima 3-4

Txini ensunzihu na mazu alebele murumiwi Paulo akadda Tesalónika? Nigewa muselu ohiniwanana na ejile ensunzihu mBibiliani obe nigaziwa miselu dhinkala ninga dhebaribari ninofwanyela okana eziwelo. Nsaka dhahi akadda União Soviética àli amwiddani ehu, ahavahedhela abalihu karta nakala ninga nadhela o’katti enddimuwa. Kartana naloga wi abali ena anfwanyela wita nikuru nawa nigawodhilani ovisogorhela. Kartana nakala ninga nali na ebaribari. Mbwenyi abali àli ororomeleya kanyengettiwe. Awene ahizinddiyela wi miselu dhali mukartanimwa kadhewanana na esile dhasunzilani. Masaka abano vina abale anidda ebaribari dila dhinji anolabihedha internet na redes sociais wila avuwihe miselu dhottambi vina atote ogawana. Ottiya onyanyala mweddelo wehu ninofwanyela otanalela nofwaseya akala dhiniwihu obe dhinengesihu dhinowiwanana na dhibaribari dhinsunzihu.—2 Te. 2:2; 1 Jo. 4:1. w24.07 12 ddima 14-15

Yogana yamakamaka enfwanyela muttu okosa ja oviperheka wa Yehova vina omwebedha iyene vamodha na abalihu na arogora. Yehova onfuna wi iyo notene nikose yogana eji. Sabwaya? Iyene onfuna wi iyo nijevo mandano na iyene vina nikalewo namukalakala. (Oli. 30:19, 20; Gal. 6:7, 8) Yehova kanimudidela muttu omulabela. Iyene onfuna wi iyo nigane nokihu okosa efunelo yaye. Kito akala Mukristu obatiziwe onolupa malamulo a Yehova bakosa yottega enddimuwa? Akala iyene kantxinuwa, onofwanyela oburutxiwa mmulogoni. (1 Ko. 5:13) Masiki akala ejo enopadduwa Yehova onjedhela wi iyene atxinuwe vina amwiyelele Iyene. Mwaha mmodha omuttukuleli Yehova okosa masasanyedho a yobolo—ja wavaha gari abale akosile dhottega dhinddimuwa oleveleliwa agatxinuwa. Yehova, Mulugu wokwela, iyene onfuna wi abale akosile dhottega dhinddimuwa atxinuwe.—Zak. 1:3; Rom. 2:4; Tia. 4:8. w24.08 14 ddima 1-2