Ewe alúwél Salomon a fós ussun a pwáári met a tongeni fis ngeni ese lifilifil ié mi fel ngeni Jiowa. Emén a tongeni turulong lón watteen tipis, me ekieki pwe a chék “müttir” fis. Are epwe erá, “a chék weiweitá.” Iwe nge, iká a kan ekieki minne a fis, iwe epwe mirititi pwe a kefilingaw fán fite me mwen an féri ewe tipis. Eli a kefilingaw chienan, an minen apwapwa me kunou, are a kan soun tétá wóón ekkewe website ese éch are ló lón ekkewe leeni ese éch. Eli a pwal úkútiw le ikkiótek, állea Paipel, fiffiti mwiich, are fiti afalafal. A kefilingaw fán fite me mwen an féri ewe tipis ussun chék ewe alúwél lón Än Salomon Fos. Ifa ewe lesen fán itach? A lamot ach sipwe ttiisenikich esap chék ewe tipis, nge pwal ekkewe kefil mi ngaw mi emmwen ngeni tipis. Ina met Salomon a erá mwirin an fós ussun met a fis ngeni ewe alúwél me ewe fin lisowu.—Mat. 5:​29, 30. w24.07 16 ¶10-11

Ifa ena wéú? Ina ewe angangen afalafala pwóróusen ewe Mwú, ewe a tongeni amanawa aramas. (2 Kor. 4:1) Met ewe sepi mi ffér seni pwúl a liosuetá? A liosuetá néún Kot kewe chón angang, chókkewe mi atoura ngeni aramas ewe kapas allim. Lón fansoun Paul we, ekkewe chón amémé ra kan áeá ekkewe sepi mi ffér seni pwúl le uwei ekkewe mettóch mi aúchea, áwewe chék ren mwéngé, wain, me moni. Pwal ina chék ussun, Jiowa a lúkúngenikich ewe pwóróus mi aúchea ussun ewe Mwú. Ren an álillis, sia tongeni angei ewe péchékkúl mi lamot pwe sipwe atoura ena pwóróus fán túppwél. Fán ekkóch, a tongeni fis ach sipwe meefi ach niwokkusiti aramas are iká sise ketiw me rer. Ifa ussun sia tongeni ú ngeni ena esin weires? Ekieki ussun án ekkewe aposel iótek atun a allúk ar resap afalafal. Rese niwokkus me úkútiw le afalafal, nge ra fen tingorei Jiowa an epwe álisiir ar repwe unusen pwora le apasa an kapas. Mwittir chék, Jiowa a pélúweni ar iótek. (Féf. 4:​18, 29, 31) Iká óm niwokkusiti aramas a áweiresuk fán ekkóch, tingorei Jiowa an epwe álisuk le alapaaló óm tongei aramas pwe kosap niwokkus le ereniir ussun ewe kapas allim. w24.04 16 ¶8-9

Ach tongei Jiowa a amwékútúkich le elingaaló itan we. Weween, sia mochen ereni aramas pwe ekkewe mettóch mi fókkun ngaw Setan a erá ussun Jiowa, rese pwúng. (Ken. 3:​1-5; Hiop 2:4; Jon 8:44) Atun sia afalafal, sia fókkun mochen ereni chókkewe mi aúseling ngenikich ié Jiowa, me i met sókkun Kot. Sia mochen án meinisin repwe silei pwe tong ina napanapan we mi lapalap seni meinisin, me an nemenem a pwúng, me ekiseló chék an we Mwú epwe aúkatiw riáfféú meinisin me atoto kinamwe me pwapwa ngeni chón fénúfan. (Kölf. 37:​10, 11, 29; 1 Jon 4:8) Atun sia ereni aramas ekkena mettóch ussun Jiowa, sia elingaaló itan we. Sia pwal pwapwa pokiten sia féri met úrúrún wisach, Chón Pwáraatá Jiowa. w24.05 18 ¶12