27 MEPIBOSET
Wala Niya Tugoti nga Mawad-an Siyag Kalipay
SI Mepiboset apo sa usa ka gamhanang hari ug anak sa usa ka maisogon ug matinumanong tawo. Pero dihang singko anyos siya, ang iyang kinabuhi kalit nga nausab tungod sa dili maayong mga panghitabo. Ang iyang apohan nga si Saul nasamdan sa gubat ug nagpakamatay. Ang iyang amahan nga si Jonatan namatay pod sa maong gubat. Dihang nabalitaan ni sa yaya ni Mepiboset, nalisang siya ug iyang gikugos ang bata ug nagdalidalig dagan. Nahulog ang bata ug grabeng naangol ang iyang mga tiil. Sukad adto, nabakol siya sa tibuok niyang kinabuhi.
Bisag pait ang kinabuhi ni Mepiboset, nagpabilin siyang positibo ug mapasalamaton sa iyang nabatonan. Gipapuyo siya sa balay sa usa ka Israelinhon nga ginganlag Makir. Paglabay sa panahon, si Haring David nahinumdom sa iyang saad ngadto sa iyang suod nga higala nga si Jonatan nga iyang atimanon si bisan kinsa nga sakop sa panimalay niini. (1 Sam. 20:14-17) Busa gipatawag sa hari si Mepiboset.
Si Mepiboset nahadlok. Sakop siya sa pamilya sa daotang hari nga si Saul. Naghunahuna tingali siya nga basig patyon pod siya ni David. Pero miadto gihapon siya sa hari. Si David buotang nakig-estorya kaniya, giuli kaniya ang propidad ni Saul, ug giingnan siya: “Kanunay kang mokaon sa akong lamesa.” Mapasalamaton kaayo si Mepiboset sa gihimo ni David bisag mibati siyang dili takos niini. Nakapangutana siya kon nganong gipasidunggan siya sa hari nga ubos ra man siya nga tawo. Iya pa ganing gipakasama ang iyang kaugalingon sa patay nga iro!
Si Mepiboset nabakol niadtong bata pa, namatyan, gitraydor, ug nakasinatig inhustisya
Pero paglabay sa panahon, diha na poy nahitabo nga dili maayo. Ang anak ni David nga si Absalom mirebelde sa hari ug daghan ang misuportar niya. Busa ang hari kinahanglang moikyas ug mopahawa sa Jerusalem. Ang sulugoon ni Mepiboset nga si Ziba miadto sa pagtabang kang David, pero gibiyaan niya ang iyang agalon. Dili makaadto si Mepiboset kang David, apan nangita siyag paagi nga mapakita ang iyang pagkamaunongon ug ang iyang kaguol sa nahitabo kang David. Wala niya putli ang iyang bungot ug bigote, nga sagad ginahimo sa tawo nga nagbangotan. Human mapildi si Absalom, mibalik si David sa Jerusalem, pero si David nadismayar kang Mepiboset. Ngano?
Gibutangbutangan ni Ziba ang iyang agalon. Dihang gitabangan ni Ziba si David, siya miingon nga si Mepiboset nagpabilin sa Jerusalem kay gusto niyang mahimong hari. Gipagawas ni Ziba nga si Mepiboset nagtraydor sa hari. Hunahunaa ang gibati ni David pagkadungog niya niini. Di pa dugay, gitraydor siya sa iyang kaugalingong anak ug ni Ahitopel nga iyang sinaligang higala ug magtatambag. Mao tingali nga mituo siya nga naa na poy nagtraydor niya. Si David midesisyon nga ihatag kang Ziba ang yuta ni Haring Saul nga napanunod ni Mepiboset.
Human mahibaloi ni Mepiboset nga gibutangbutangan siya ni Ziba, miadto siya kang David aron sultihan ang hari kon unsa gyoy nahitabo. Gustong mahibaloan ni David kon nganong si Mepiboset wala mouban niya pagbiya niya sa Jerusalem. Si Mepiboset miingon nga wala siya makabiya sa Jerusalem kay bakol man siya ug nga gilimbongan siya ni Ziba. Namatikdan tingali ni David nga wala na atimana ni Mepiboset ang iyang bungot ug bigote. Nagpakita na nga naguol siya pag-ayo sa nahitabo sa hari ug wala siya magtraydor kaniya. Bisan pa niana, naglagot si David ug iyang giingnan si Mepiboset nga dili na maghisgot pa bahin adto. Dayon iyang giusab ang iyang desisyon, pero dili tanan ang ibalik kang Mepiboset. Si David miingon nga bahinon ni Mepiboset ug Ziba ang yuta ni Saul.
Hatagan na hinuon ug bahin sa panulondon ang traydor nga sulugoon nga nagbutangbutang niya? Puwede gyod untang masuko si Mepiboset adto. Kon dunay mahitabong inhustisya, dili kalikayan nga ang usa madaog sa kasuko. (Deut. 19:18, 19) Nagkinahanglag kaisog ang pagpokus sa importanteng mga butang, sama sa pagpasaylo ug pagkahimong makigdaiton, imbes sa pagpokus sa atong gibati ug sa sayop sa uban. Unsa kahay himoon ni Mepiboset?
Lumo nga mitubag si Mepiboset kang David: “Bisag kuhaon pa [ni Ziba] ang tanan, kay kontento na ko karon nga ang akong ginoong hari nakabalik na sa iyang balay nga malinawon.” Mapainubsanon gyod si Mepiboset ug gimahal niya pag-ayo ang hari nga nagrepresentar sa matarong nga pagmando ni Jehova. Bisan pag gibutangbutangan siya ug gikuhaag propidad, wala niya tugoti nga mawala ang iyang kalipay, ug siya padayong nag-alagad nga matinumanon sa Diyos. Si Mepiboset wala gyod makasulay sa pagpakiggubat diha sa panggubatan, pero ang iyang gipakitang kaisog mas labaw pa kay sa kaisog sa daghang sundalo!
Basaha ang asoy sa Bibliya:
Pakighisgot:
Sa unsang mga paagi nga si Mepiboset nagpakitag kaisog?
Tun-ig Dugang
1. Sa wala pa si Mepiboset dad-a kang David, nagpuyo siya “sa balay ni Makir.” Unsa pay nagpakita nga si Makir maunongon ug maabiabihon? (2 Sam. 9:3, 4; it “Makir” Num. 2)
2. Nganong gipakasama ni Mepiboset ang iyang kaugalingon sa “patay nga iro”? (2 Sam. 9:8; it “Iro” ¶5) A
PhotoStock-Israel/Photodisc via Getty Images
Hulagway A: Sa karaang Israel, ang mga iro giisip nga hugaw nga mga mananap nga mokaon ug bisan unsang basura
3. Nganong makaingon ta nga si Mepiboset dili makaako nga ilogon ang pagkahari ni David? (w02 2/15 14 ¶11, footnote) B
Hulagway B: Unsa tingali ang gitudlo ni Jonatan sa iyang anak bahin sa gipili ni Jehova ingong hari?
4. Giunsa pagpanalangin ni Jehova si Mepiboset human sa mga panghitabo nga gihisgotan niini nga asoy? (it “Mepiboset” Num. 2 ¶3)
Hunahunaa ang mga Leksiyon
Daghan ang nag-antos sa depresyon o ubang problema nga dili tingali bug-os masabtan sa mga igsoon. Unsang makapahupayng mga leksiyon ang ilang makat-onan kang Mepiboset?
Human madungog ni David ang usa lang ka report, gihatag dayon niya sa uban ang propidad ni Mepiboset. Nganong dili maalamon nga modesisyon dayon base lang sa dili kompleto nga impormasyon? C
Hulagway C
Unsaon nimo pagsundog ang kaisog ni Mepiboset?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Mepiboset dihang banhawon na siya?
Pagkat-og Dugang
Sayra kon sa unsang paagi nato masundog si Mepiboset dihang bation nato nga dili patas ang pagtratar kanato.
Kon sa Unsang Paagi Ilang Gipugas ug Giani ang Kalinaw—Mepiboset (3:25)
Kon bation sa usa ka bata nga walay ganahang makighigala niya, sa unsang paagi magamit sa mga ginikanan ang asoy bahin kang Mepiboset sa pagtabang niya?
“Gibati ba Nimo Sukad nga Ikaw Usa ka Estranyo?” (w11 6/1 26-27)