Iyang Gitul-id ang Hari

‘MAAYO siya nga tawo. Pero nganong nahimo man niya ang maong daotang mga buhat?’ Mao tingali nay gihunahuna ni propetang Natan samtang nagpaingon siya sa palasyo sa iyang higala nga si Haring David. Sa miagi, gisugo ni Jehova si Natan nga sultihan si David nga makabaton siyag nindot nga pribilehiyo: Ang Mesiyas maggikan sa banay ni David! (2 Sam. 7:4, 12, 13) Pero karon, si David nakahimog seryosong mga sala. Ug gusto ni Jehova nga tul-iron ni Natan si David.

Abi ni David nga walay nakakita sa iyang gihimo, pero nakita to ni Jehova. Giingnan ni Jehova si Natan bahin niini. Unsa diay ang gihimo ni David? Usa ka gabii niana, si David naglakawlakaw sa atop sa iyang palasyo ug nakakita siyag babaye nga naligo. Ang maong babaye “guwapa kaayo,” ug iyang gipakuha ang babaye aron dad-on sa palasyo. Nahibalo ang hari nga ang maong babaye, si Bat-seba, mao ang asawa sa iyang maunongong sundalo nga si Urias nga Hitihanon. Pero bisan pa niana, si David nanapaw uban kang Bat-seba. Sa ulahi, si Bat-seba namabdos ug iyang gipahibalo si David bahin niini. Gisulayag tago ni David ang iyang nahimo. Gipatawag ni David si Urias gikan sa panggubatan ug gipapauli siya. Nagdahom si David nga makigdulog si Urias sa iyang asawa. (Itandi ang 1 Samuel 21:5.) Pero dili makaako si Urias nga magpahayahay samtang ang iyang kaubang mga sundalo nakigkombate pa sa gubat. Busa nagplano si David nga ipabutang si Urias sa dapit diin seguradong mamatay siya sa gubat. Ug mao gyod nay nahitabo. Namatay si Urias, unya gipangasawa ni David si Bat-seba.

Ang Bibliya nag-ingon: “Ang gihimo ni David daotan kaayo sa mga mata ni Jehova.” Busa gisugo sa matuod nga Diyos ang iyang propeta nga si Natan nga tul-iron si David ug sultihan siya nga daotan kaayo ang iyang gihimo. Samtang nagpaingon si Natan sa hari, naghunahuna kaha siya kon unsa unyay reaksiyon ni David? Kon buot sabton, gipapatay man gani ni David si Urias, unsa na lang kaha si Natan dihang iya nang sultihan ug tul-iron ang hari? Dili kaha ipapatay pod siya? Gusto ni Natan nga matandog ang kasingkasing ni David ug tabangan siya nga makita kon unsa ka daotan ang iyang gihimo. Seguradong nag-ampo ang propeta bahin niini. Dayon, naghunahuna siyag ilustrasyon nga iyang gamiton dihang makig-estorya na siya sa hari.

Gisultihan ni Natan si David bahin sa duha ka tawo nga nagpuyo sa usa ka siyudad. Ang usa dato kaayo ug ang usa pobre. Ang tawong dato daghag karnero ug baka. Ang tawong pobre naay karnero pero usa ra tawon ka buok, ug pinangga kaayo niya kini. Gani ang maong karnero inatiman pag-ayo sa iyang pamilya. Usa ka adlaw, dihay kalit nga mibisita sa tawong dato, ug nanginahanglan siyag karnero nga ihawon aron idalit sa iyang bisita. Imbes magkuha gikan sa iyang mga karnero, “iyang gikuha ang bayeng nating karnero sa tawong pobre,” giihaw kini, ug gihikay alang sa iyang bisita. Pagkahumag asoy ni Natan niini, si David nasuko pag-ayo! Siya miingon: “Ingon nga si Jehova buhi, ang tawo nga nagbuhat niini angayng mamatay!” Nasuko siya pag-ayo kay ‘walay kaluoy’ ang tawong dato.

Maayo kaayo ang ilustrasyon nga gipili ni Natan. Si David magbalantayg karnero sa una, ug dili gyod siya gustog inhustisya. Busa maisogong miingon si Natan: “Ikaw ang maong tawo!” Nakurat niini si David. Gihisgotan ni Natan ang tanang daotan nga gihimo ni David, ang tanan nga nakita ni Jehova. Dayon gisulti sa propeta ang giingon ni Jehova nga mahitabo tungod sa gihimo ni David: Motungha ang mga problema ug katalagman sa pamilya ni David sulod sa daghang katuigan. Unsay reaksiyon ni David?

Ang hari miingon: “Nakasala ko kang Jehova.” Morag gidunggab ang kasingkasing ni David tungod sa kaguol ug mahinulsolon kaayo siya. Si Natan seguradong nalipay nga sultihan si David nga gikaluy-an siya ni Jehova. Si Natan miingon: “Sa bahin ni Jehova, iyang gipasaylo ang imong sala. Ikaw dili mamatay.” Pero nag-antos pag-ayo si David sa mga resulta sa ilang sala ni Bat-seba. Ang ilang anak namatay. Ug sulod sa daghang katuigan, ang iyang pamilya nakaagom ug daghang problema.

Bisan pa sa maong mga problema, si David nagpabiling matinumanon. Gigiyahan siya sa Diyos sa pagsulat ug makapatandog kaayo nga mga salmo bahin sa paghinulsol ug sa pagpasaylo ni Jehova. (Salmo 32 ug 51) Nabatonan pag-usab sa hari ang suod nga relasyon kang Jehova ug iyang gipabilhan ang tambag ni Natan hangtod sa iyang kamatayon. Si David namatay ingong matinumanong alagad ni Jehova. (1 Hari 9:4) Seguradong nalipay si Natan nga siya nagmaisogon sa pagtul-id sa hari nga nakahimog grabeng mga sala.

Basaha ang asoy sa Bibliya:

• 2 Samuel 11:1–12:18

Pakighisgot:

Sa unsang mga paagi nga si Natan nagpakitag kaisog?

Tun-ig Dugang

1. 1. Si Natan usa ka magsusulat sa Bibliya, pero wala tay nahibaloan bahin sa iyang kagikan o personal nga kinabuhi. Unsay gipakita niini bahin kaniya? (w12 2/15 25 ¶3-4)

   Imong tubag

2. 2. Si Urias usa ka Hitihanon. Busa nganong apil man siya sa kasundalohan ni David? (w24.04 31)

   Imong tubag

3. 3. Gitagna ni Natan nga ang panimalay ni David makaagom ug katalagman. Sa unsang paagi natuman ang maong tagna? (it “David” ¶29)

   Imong tubag

4. 4. Sa unsang paagi nagpakitag kaisog si Natan sa kataposang mga tuig sa pagkahari ni David? (w12 2/15 25 ¶2) A

   Imong tubag

   

Hunahunaa ang mga Leksiyon

• Unsay atong makat-onan sa ehemplo ni Natan bahin sa kon unsaon pagtabang ang usa ka higala nga nakahimog seryosong sala?

  Imong tubag

• Unsaon nato pagsundog ang paagi ni Natan aron matandog nato ang kasingkasing sa uban? B

  Imong tubag

  

• Sa unsa pang mga paagi masundog nimo ang kaisog ni Natan?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Natan dihang banhawon na siya?

  Imong tubag

Pagkat-og Dugang

Sa unsang paagi ang mga gihimo ni David nakahatag ug kasakit kaniya, sa iyang mga higala ug pamilya, ug kang Jehova nga Diyos?

Hinumdomi Kon sa Unsang Paagi Nagagawi ang Gugma—Dili Mangita sa Kaugalingong Kaayohan (1:14)

Sayra kon nganong epektibo kaayo ang tambag ni Natan.

“Mapainubsanong Dawata ang Pagtul-id” (Serye nga “Pagtuon sa Bibliya” diha sa jw.org)