Tabang Para sa mga Buta
Sa tibuok kalibotan, gibanabana nga 43 ka milyong tawo ang buta ug 295 ka milyon ang hanap ug panan-aw.a Makapaguol kay daghan nila ang gidaogdaog o wala tratarag maayo.
Unsay pagbati sa Diyos sa mga tawong buta? Unsay giingon sa Bibliya bahin nila? Ug unsay ginahimo sa mga Saksi ni Jehova aron tabangan sila?
Ang pagbati sa Diyos bahin sa mga tawong buta
Gipakita sa Bibliya nga gimahal ug gipabilhan gyod ni Jehovab ang mga tawong buta. Gusto niya nga patas ang pagtratar kanila ug nga makabenepisyo sila sa iyang mga pagtudlo. Gihatagan pod niya silag nindot nga paglaom sa umaabot.
Teksto: “Tinunglo ang magpahisalaag sa buta.”—Deuteronomio 27:18.
Kahulogan: Sa karaang panahon, ang Balaod nga gihatag sa Diyos sa iyang katawhan naghatag ug panalipod sa mga tawong buta gikan sa pag-abuso.
Teksto: “Ang Diyos dili mapihigon.”—Buhat 10:34.
Kahulogan: Gipabilhan sa Diyos ang mga tawong buta sama nga gipabilhan niya kadtong walay problema sa panan-aw.
Teksto: “Gibalik [ni Jesus] ang panan-aw sa daghang buta.”—Lucas 7:21.
Kahulogan: Samtang dinhi si Jesus sa yuta, giayo niya ang mga tawo nga naay problema sa panan-aw. Pinaagi ana, gipakita niya kon unsay himoon sa Gingharian sa Diyos sa umaabot.
Teksto: “Ang mga mata sa buta mabuka.”—Isaias 35:5.
Kahulogan: Si Jehova nagsaad nga sa dili madugay, dihang ang Gingharian sa Diyos magmando na dinhi sa yuta, ang mga buta makakita na.
Ang ginahimo sa mga Saksi ni Jehova sa pagtabang nila
Bisan asa sa kalibotan, ang mga Saksi ni Jehova naningkamot nga masultihan ang tanang tawo, apil kadtong mga buta, sa mensahe sa Diyos bahin sa paglaom. Giunsa namo ni paghimo?
Nag-publish mig Bibliya ug ubang publikasyon ug video para sa pagtuon sa Bibliya diha sa daghang format para sa mga buta ug sa mga hanap ug panan-aw, apil ani ang braille, dagkog letra nga mga publikasyon, ug audio.
Naa mi mga panagkatigom nga puwedeng motambong ang tanan, apil na ang mga buta.
Nag-offer mig interactive nga pagtuon sa Bibliya nga naay personal nga instruktor.c
Kining tanan walay bayad. Ngano? Kay si Jesus nagsugo: “Kamo nakadawat nga walay bayad, panghatag nga walay bayad.”—Mateo 10:8.
Gimahal gyod sa mga Saksi ni Jehova ang mga tawong buta. Kadtong gustong mosimba sa Diyos uban namo makabaton ug maayong mga higala. Niay nindot nga mga eksperyensiya sa pipila ka Saksi ni Jehova nga buta.
Si Talita Alnashi, nga taga-Sweden, hanap na ug panan-aw sukad nga natawo siya. Sayra kon giunsa siya pagtudlo sa iyang mga ginikanan bahin sa Bibliya, ug kon sa unsang paagi siya ug ang iyang pamilya gipakitaan ug gugma ug gitabangan sa ilang mga higala.
Si James Ryan, nga taga-United States, natawong amang ug sa ulahi nabuta. Sayra kon sa unsang paagi nagmalipayon gihapon siya.
Si Cynthia Pablo, nga taga Pilipinas, amang ug buta. Giunsa siya pagtabang sa iyang kauban nga mga magsisimba panahon sa lisod kaayo nga COVID-19 nga pandemic? Tan-awa ang artikulo nga “Gitabangan sa Kongregasyon ang Amang ug Buta nga Sister Panahon sa Pandemic.”
Mga tool nga among gitagana aron matudloan ang mga buta bahin sa Bibliya
Braille nga mga publikasyon. Nag-publish mig braille nga mga edisyon sa Bibliya, sa kompleto o pipila ka bahin niini, diha sa daghang pinulongan. (Para sa listahan niini nga mga pinulongan, tan-awa ang kahon nga “Ang New World Translation nga Bibliya Diha sa Braille.”) Daghan pod sa among gibase sa Bibliya nga mga publikasyon ang naay braille nga mga edisyon. Para adtong gusto magkat-on ug braille, nag-publish mig workbook nga Learn to Read Braille. Gidisenyo ni aron tabangan ang tawong buta nga makakat-on ug basag braille sa tabang sa tawo nga makakita.
Aron makakuha ug hard copy sa braille nga mga publikasyon, pakig-estorya sa usa sa mga Saksi ni Jehova o pag-request nga duawon ka.
Sa jw.org, i-download ang mga file para sa notetaker nga mga device.d
Dagkog letra nga mga publikasyon ug ma-zoom in nga digital content. Ang kadaghanan sa among mga publikasyon naay dagkog letra nga mga edisyon para sa mga hanap ug panan-aw. Ang among website nga jw.org gidisenyo nga magpabiling hapsay ang content ug mabasa ra gihapon bisag i-zoom in. Sa JW Library app puwede pong ma-adjust ang gidak-on sa mga letra sa mga publikasyon.
Aron makakuhag hard copy sa dagkog letra nga mga publikasyon, pakig-estorya sa usa sa mga Saksi ni Jehova o pag-request nga duawon ka.
Sa jw.org, i-download ang digital format sa dagkog letra sa mga publikasyon nga parehas ra pod sa hard copy nga format.
Mga publikasyon nga naay audio. Naa mi mga audio recording sa New World Translation nga Bibliya diha sa kapig 200 ka pinulongan. Naa poy mga audio recording ang daghan sa among binase sa Bibliya nga mga publikasyon. Kini nga mga recording sagad naay mga deskripsyon sa mga hulagway.
Pag-stream o pag-download ug audio sa jw.org ug sa JW Library app.
Sa jw.org, i-download ang mga file para sa mga reading system, sama sa mga screen reader ug digital talking book player.e
Mga video nga naay audio description.f Ang mga Saksi ni Jehova nag-produce ug binase sa Bibliya nga mga video nga naay audio description diha sa kapig 100 ka pinulongan. Kini nga mga video makatabang sa mga tawo nga masabtan ug masunod ang praktikal nga mga tambag sa Bibliya.
Tan-awa ang mosunod nga kategorya sa mga video nga naay audio description:
Mga panagkatigom. Ang among mga kongregasyon sa tibuok kalibotan magtigom kada semana aron magkat-on ug mosimba. Naa pod mi ginahimong dagkong mga panagkatigom kada tuig aron matudloan mi bahin sa Bibliya. Kon naay mga video nga ipasalida sa among mga panagkatigom, maningkamot mi nga mapaminawan sa mga buta ang audio description nga format. Kon posible, para niadtong buta ug amang, naa sab mi tactile nga pag-interpret sa among mga panagkatigom. Gi-welcome namo ang tanan ug walay diskriminasyon.
Pangitag lokasyon sa among mga tigom.
Sayra ang among tinuig nga mga kombensiyon.
Tambong sa Memoryal sa kamatayon ni Jesus, ang pinakaimportanteng okasyon sa tuig.
Si José Luis Ayala nga taga-Mexico, natawo nga amang ug nabuta pag-edad niyag 29. Sayra kon unsa ka importante para niya ang among mga panagkatigom ug kon sa unsang paagi natabangan siya nga mahimong maayong magtutudlo sa Bibliya.
a Ang “hanap ug panan-aw” nagtumong niadtong naay problema sa panan-aw nga makaapektar sa ilang adlaw-adlawng kalihokan ug dili na gyod maayo. Niini nga artikulo, ang “buta” parehong nagtumong niadtong wala na gyoy makita ug hanap ang panan-aw.
b Jehova ang personal nga ngalan sa Diyos. (Salmo 83:18) Tan-awa ang artikulo nga “Kinsa si Jehova?”
c Puwede nimong sulayan ug tan-awon kon sa unsang paagi ginahimo kining libreng pagtuon sa Bibliya.
d Ang notetaker maoy madaladala nga electronic device nga naay mausab-usab nga braille display, computer-generated nga tingog, o kining duha. Ang mausab-usab nga display mo-function pinaagi sa pagsaka o pagnaog sa mga pin aron makahimo ug mga letra sa braille. Pinaagi sa notetaker, dili na kinahanglan ang daghan kaayong hard copy sa braille nga mga basahon.
e Ang screen reader ug digital talking book player mobasag kusog sa text nga makita sa screen gamit ang computer-generated nga tingog o gi-record nga audio. Kini nga mga tool makatabang sa mga user nga ma-navigate ang lainlaing bahin sa usa ka publikasyon.
f Ang audio description maoy gidugang nga audio diha sa video nga magpatin-aw sa nagakahitabo diha sa screen.