Pakig-uli Dayon sa Imong Higala
NAA bay igsoon nga nakapasakit nimo nga tungod ana nadaot ang inyong panaghigalaay? Aron mabalik ang inyong maayong relasyon, kinahanglang molihok dayon ka aron magkauliay mo, ug himoang tumong nga mabalik ang inyong kasuod.a
Hunahunaa ni nga ilustrasyon. Kon mabalian kag bukog, kinahanglang ipadoktor dayon ni nimo, kay kon dili, magsige nig ngulngol ug mag-antos ka sa kasakit. Ug kon ugaling di gyod nimo ni ipatambal, posibleng dili na ni maulian ug dili na ni maka-function ug tarong.
Sama nga kinahanglang asikasohon dayon ang nabali nga bukog, kinahanglang molihok pod dayon ta aron mabalik ang atong maayong relasyon sa usa ka igsoon. Kon ato ning unyaunyaon, magpabilin ang kasakit nga atong bation ug posibleng magdumot pa gani ta. Tungod ana, basig mawad-an na hinuon tag higala. Si Jesus miingon: “Pakighusay dayon.” (Mat. 5:25) Busa estoryaha ang imong higala sa buotan nga paagi ug isulti kon unsa gyoy imong gibati. Pero usahay lisod tingali ning himoon. Ngano? Konsideraha ang duha ka rason.
Una, basin hasolan ka nga estoryahan ang problema maong pasagdan na lang ni nimo bisag wala pa mo magkauliay.b Mao nay nahitabo kang Euodia ug Sintique, Kristohanong mga sister nga wala magkasinabot ug dili maayog buot sa usag usa. Taudtaod na gyod tingali ang ilang problema, kay bisan gani si apostol Pablo nga tua sa Roma nakabalita sa nahitabo nila. Maong gihangyo sila ni Pablo nga himoon ang ilang maarangan aron magkauli. (Filip. 4:2) Kon magpaubos sila, mag-estoryag tarong, ug kinasingkasing nga magpasaylo sa usag usa, posible gyong mabalik ang ilang kasuod.
Ikaduha, basig maghunahuna ka nga ang imong higala gyod ang kinahanglang mounag duol nimo kay siya ang nakahimog sayop. Pero hinumdomi nga ang imong tumong mao nga mabalik ang inyong panaghigalaay, dili ang pagpamatuod kon kinsay sakto o sayop. Ang usa ka doktor magpokus sa pag-ayo sa nabali nga bukog imbes nga magsukitsukit kon nganong nahitabo ni. Sa samang paagi, dihang makig-estorya ka sa imong higala, ayawg balikbalikag hisgot kon kinsay sayop. Hinuon, pagpokus kon unsa ka importante para nimo ang imong higala ug himoa ang imong maarangan aron magkauli mo.
Busa ayaw paglangan. Estoryaha ang imong higala ug pakig-uli aron mabalik ang inyong kasuod. “Ayaw pasalopi sa adlaw ang inyong kasuko.” (Efe. 4:26) Kon molihok dayon ka, makatabang ka nga magpabilin ang “panaghiusa nga [atong] nabatonan.”—Efe. 4:1-3.
a Kon ang duha ka igsoon naay ginagmay nga dili pagsinabtanay, kinahanglan nila ning estoryahan nga silasila ra ug angay nga andam silang magpasaylo sa usag usa. (Mat. 5:23, 24) Kon seryoso ang ilang problema, kinahanglan tingali silang mangayog tabang sa mga ansiyano. (Mat. 18:17) Pero ayha pa lang sila magpatabang sa mga ansiyano kon ila nang nahimo ang gihisgotan sa Mateo 18:15, 16.
b Kon napasakitan ka sa igsoon pero wala ra maapektohi ang inyong panaghigalaay, mas maayo nga palabyon ug kalimtan na lang nimo ang nahitabo.—Prov. 26:20.