Makahupay Nimo ang Basahon sa Isaias

1-2. Unsay himoon ni Jehova dihang makaatubang tag mga situwasyon nga makapaguol nato?

IMADYINA ang usa ka bata nga nagsigeg hilak. Puwerte niyang hilak kay ang ilang pamilya tingali mobalhin na sa laing lugar ug mabiyaan na niya ang iyang mga amigo. O kaha guol kaayo siya kay naa siyay nahimong sayop. Nianang mga higayona, unsay himoon sa usa ka mapinanggaong inahan? Iyang gakson ang iyang anak, alam-alaman, pahiran ang iyang mga luha, ug pasaligan nga iya siyang gimahal.

² Sa Bibliya, gikompara ni Jehova ang iyang kaugalingon sa usa ka mapinanggaong inahan nga naghupay sa iyang anak. Siya miingon: “Sama nga ang inahan maghupay sa iyang anak, padayon usab mo nakong hupayon.” (Isa. 66:13) Gimahal kaayo ta ni Jehova. Ang iyang gugma para nato labaw pa kay sa bisan kinsang ginikanan. (Isa. 49:15) Pinaagi sa iyang Pulong, ang Bibliya, hupayon ug palig-onon ta ni Jehova dihang maguol ta o naa sa lisod nga situwasyon.—Roma 15:4.

3. Unsay atong hisgotan niining artikuloha?

³ Sa basahon sa Isaias, daghan tag mabasa nga makapahupayng mga pulong gikan kang Jehova. (Isa. 40:1) Gipasulat ni Jehova ni nga basahon aron hupayon ang iyang katawhan sa Juda nga nakaeksperyensiyag lisod ug makapaguol kaayo nga kahimtang. Kita pod karon nagpuyo sa “kuyaw nga mga panahong lisod sagubangon” maong nagkinahanglan pod tag paghupay. (2 Tim. 3:1) Busa niining artikuloha, atong hisgotan ang pipila ka bersikulo sa basahon sa Isaias nga makadasig ug makapalig-on nato (1) dihang kalit nga mausab ang atong kahimtang, (2) dihang hasolon ta pag-ayo sa atong konsensiya, ug (3) dihang maguol kaayo ta kay namatyan tag minahal.

DIHANG KALIT NGA MAUSAB ANG ATONG KAHIMTANG

4. Unsa tingali ang atong bation kon kalit nga mausab ang atong kahimtang?

⁴ Usahay naay mga mahitabo nga wala tingali nato damha. (Eccl. 9:11; 1 Cor. 7:31) Basin kalit tang masakit, magkalisod sa pinansiyal, o maapektohan sa kagubot sa politika. O kaha basin kalit nga mausab ang atong asaynment sa pag-alagad. Dihang mahitabo na, natural lang nga maguol o mabalaka kaayo ta. Basin makapangutana ta, ‘Mag-unsa na man lang intawon ko ani?’ Si Joseph, brader nga nag-alagad karon ingong regular payunir human sa mga 17 ka tuig nga pag-alagad sa Bethel, miingon: “Wala gyod ko kasabot sa akong gibati. Sa kadugay nako sa Bethel, morag naglibog ko kon asa ko magsugod. Nabalaka ko kon mag-unsa na lang ko iniggawas nako.” Sama kang Joseph, nabalaka pod ba ka sa kalit nga kausaban sa imong kahimtang? Kon mao, unsang pasalig ang gihatag ni Jehova pinaagi kang Isaias nga makatabang nimo?

5. Unsay gipasalig ni Jehova kanato diha sa Isaias 42:16? (Tan-awa sab ang hulagway.)

⁵ Basaha ang Isaias 42:16. Si Jehova nagsaad nga iyang giyahan kadtong mga naglakaw nga samag buta diha sa alagianan nga dili nila sinati ug nga iyang himoong hayag ang ilang ngitngit nga dalan. Ang mga ekspresyong “buta,” “alagianan nga dili nila sinati,” “kangitngit,” ug “gansangong yuta” haom nga deskripsiyon sa kon unsa tingali ang atong bation dihang kalit nga mausab ang atong kahimtang. Mobati tingali ta nga mora tag naglakaw sa baga kaayo nga lasang ug dili nato makita ang dalan pagawas. Pero gipasaligan ta ni Jehova nga bisag unsa pay atong maatubang, iya gyod tang giyahan ug dili ta niya biyaan. Gunitan niya ang atong kamot ug tultolan ta samtang naglakaw ta sa kangitngit. Iyang pahayagan ang atong dalan ug patagon ang atong alagianan. Sa unsang paagi na ginahimo ni Jehova? Gihatagan ta niyag maalamong tambag pinaagi sa iyang Pulong ug sa iyang organisasyon. (Sal. 119:105; Isa. 30:21) Gigamit pod niya ang mga igsoon ug ang uban aron tabangan ta sa praktikal nga paagi. Oo, bisan dihang lisod ang kahimtang ug dili nato makita kon unsay naa sa unahan, makasalig ta nga giyahan ug atimanon gyod ta ni Jehova.—Isa. 41:10; 1 Ped. 5:​6, 7.

6. Kon naay kalit nga kausaban sa atong kinabuhi, sa unsa ta makasalig?

⁶ Si Joseph, nga gihisgotan ganina, ug ang iyang asawa mapasalamaton kaayo sa mahigugmaong tabang ni Jehova human mausab ang ilang asaynment. Siya miingon: “Nakita gyod namo kon giunsa mi pagtabang ni Jehova niadtong panahon nga nag-adjust pa mi sa among bag-ong kahimtang. Gigamit niya ang buotan nga mga igsoon sa pagtabang namo. Gitagan-an mi niya sa among materyal nga panginahanglan ug gihupay pod mi niya. Padayon na niyang ginahimo hangtod karon.” Sa susama, kon makasinati kag kalit nga mga kausaban sa imong kinabuhi ug mibati ka nga lisod kaayo ni ug dili nimo ni kaya, makaseguro ka nga palig-onon ug giyahan gyod ka ni Jehova. (Isa. 54:10; 58:11) Si Joseph midugang: “Ganahan kaayo ko sa lyrics sa usa sa atong mga original song nga nag-ingon, ‘Di ko mabalaka kay si Jehova nga Diyos anaa. Wa gyod ko mobati nga nag-inusara.’a Kombinsido ko nga bisag naay mahitabo nga wala nato damha, makasalig gyod ta nga naa kanunay si Jehova ug dili ta niya biyaan.”

DIHANG HASOLON TA PAG-AYO SA ATONG KONSENSIYA

7. Unsay gibati sa uban tungod sa mga sala nga ilang nahimo sa una?

⁷ Kon nakahimo tag seryosong sala ug ato ning itug-an sa mga ansiyano, makadawat tag mahigugmaong tabang gikan nila ug mapalihok ta nga himoon ang atong maarangan nga dili na ni usbon. (Prov. 28:13; Sant. 5:​14-16; 1 Juan 1:9) Pero usahay, bisag gipasaylo na ta ni Jehova, hasolon gihapon tingali ta sa atong konsensiya. Basin maghunahuna ta, ‘Gipasaylo na ba gyod kaha ko ni Jehova sa sala nga akong nahimo?’ (2 Cor. 2:7) Ingon ana gyod ang atong bation ilabina kon grabe ang atong nahimong sala ug pirme gihapon nato ning mahinumdoman. Si Haring David misulat: “Wala koy kalinaw tungod sa akong sala. . . . Naminhod ko ug nahugno pag-ayo.” (Sal. 38:​3, 8) Kon parehas kag gibati ni Haring David tungod sa imong nangaging mga sayop, ang basahon sa Isaias makahupay gyod nimo.

8-9. Sumala sa Isaias 1:​18, unsa ka bug-os ang pagpasaylo ni Jehova?

⁸ Basaha ang Isaias 1:18. Si Jehova naggamit ug mga ilustrasyon aron ipakita kon unsa ka bug-os ang iyang pagpasaylo sa atong mga sala. Siya nag-ingon nga bisan pag ang atong mga sala “hayag-pula,” iya ning “papution sama sa niyebe.” Ang mansa nga hayag-pula dili bastabasta matangtang. Pero gipasaligan ta ni Jehova nga kon iya na tang gipasaylo, wala na gyoy mabilin nga bisan gamayng mansa sa atong mga sala.

⁹ Konsideraha ang pananglitan ni Haring David. Bisag sad-an siya sa pagpanapaw ug pagpatay, gipasaylo siya ni Jehova ug gitawag gihapon ingong tawo nga may integridad. (2 Sam. 11:​3, 4, 14, 15; 12:13; 1 Hari 9:​4, 5) Wala magpokus si Jehova sa mga sayop ni David, kondili sa iyang pagkamatinumanon. Sa susama, gipasaligan ta ni Jehova nga kon maghinulsol ta, iya tang pasayloon ug tabangan nga makapadayon sa atong pag-alagad nga may hinlong konsensiya. Unsa pang pasalig ang atong makita diha sa basahon sa Isaias kon makonsensiya gihapon ta?

10. Unsang makapahupay nga pasalig ang atong mabasa sa Isaias 38:17?

¹⁰ Basaha ang Isaias 38:17 ug footnote. Ang mga pulong nga “gisalibay nimo sa imong luyo ang tanan nakong sala” puwede pong hubaron nga “giwagtang nimo gikan sa imong panan-aw ang tanan nakong sala.” Dinhi, ma-imagine nato si Jehova nga samag nagkuha sa sala sa usa nga mahinulsolon ug naglabay niini sa Iyang luyo, diin dili na Niya ni makita o mahunahunaan pa. Sumala sa usa ka reperensiya, ang maong ekspresyon puwede pong hubaron nga, “Imong gihimo [ang akong mga sala] nga samag wala kini mahitabo.” Busa dihang pasayloon ta ni Jehova, kalimtan na gyod ni niya nga mora bag wala gyod nato ni mahimo. Dili na ta niya paninglan o silotag balik sa mga sala nga iya nang gipasaylo. Hinuon, bug-os niyang papason ang rekord sa maong mga kasaypanan. Siya nagsaad: “Dili nako hinumdoman ang imong mga sala.” (Isa. 43:25) Makapahupay gyod na! Busa kon si Jehova, ang Kinalabwang Maghuhukom, wala na maghunahuna sa atong mga sala, dili ba angay lang pod nga kalimtan na nato ni?

11. Bisag unsa pang mga sala ang atong nahimo sa una, sa unsa mas nagpokus si Jehova? (Tan-awa sab ang hulagway.)

¹¹ Kon magsige gihapon tag kakonsensiya sa nangagi natong mga sayop, kinahanglan natong pahinumdoman ang atong kaugalingon nga gimahal kaayo ta ni Jehova. Iya tang gipasaligan nga tinuod ug bug-os na ta niyang gipasaylo. Wala ta niya ikaulaw tungod sa atong nangaging mga sala, ug dili siya sama sa mga tawo nga magdumot. (Isa. 57:16) Mas nagpokus si Jehova, dili sa kon unsa ta sa una, kondili sa kon unsa ta karon ug sa atong mga paningkamot nga mahimong mas maayong Kristohanon. (Isa. 55:7) Mahigugmaon ug mapinasayloon gyod ang atong Diyos! Hinaot dili nato tugotan nga ang atong nangaging mga sayop makawala sa atong kalipay karon, nga tungod ana moundang na hinuon ta sa pag-alagad ug dili na nato madawat ang mga panalangin sa umaabot.

DIHANG MAGUOL KAAYO TA KAY NAMATYAN TAG MINAHAL

12. Unsa tingali ang atong bation kon mamatyan tag minahal?

¹² Dili gyod lalim ang bation kon mamatyan tag minahal. Ang atong kasakit ug kaguol dili tingali dayon mawala bisag taastaas na nga panahon ang milabay. Usahay, basin makapangutana pa gani ta kon nganong gitugotan ni Jehova nga mamatay ang atong minahal. Konsideraha ang gibati sa brader nga si Michael dihang namatay ang iyang mga ginikanan tungod sa sunog. Siya miingon: “Sakit kaayo to para nako. Suko kaayo ko kang Jehova nga gipasagdan ra niya nga mamatay sila. Kabalo man ko nga dili siyay hinungdan, pero nganong wala ra man siyay gihimo aron pugngan to?” Tingali parehas mog gibati sa maong brader. Nianang makapaguol kaayo nga kahimtang, unsang paghupay ug paglaom ang gihatag ni Jehova?

13. Unsay gisaad ni Jehova kanato diha sa Isaias 25:8?

¹³ Basaha ang Isaias 25:8. Si Jehova nagsaad nga “lamyon niya ang kamatayon hangtod sa hangtod.” Imadyina kon unsa na ka nindot nga paglaom! Moabot ang panahon nga wala na gyoy mamatay. Dili na gyod mahitabo nga maghilak ka kay namatyan kag minahal. (Isa. 35:10) Wala na poy lapida nga magpahinumdom nimo kon asa gilubong ang imong namatay nga minahal. Hinuon, pirme na nimo silang makauban nga buhi ug maayog panglawas. Kining tanan dili kay pangandoy lang. Saad ni gikan sa atong mahigugmaong Diyos kinsa mao ra gyoy makatuman niining nindot kaayo nga paglaom.—Pin. 21:​4, 5.

14. Unsay imong bation dihang mamalandong ka sa paglaom sa pagkabanhaw? (Isaias 26:19) (Tan-awa sab ang hulagway.)

¹⁴ Basaha ang Isaias 26:19. Dili lang kay basta wad-on ni Jehova ang kamatayon, kondili iya pong banhawon ang atong namatay nga mga minahal. Bahin nila, siya miingon: “Ang akong mga patayng lawas mobangon.” Kini nagpakita nga si Jehova nay bahala sa atong mga minahal. Giisip na niya sila ingong iyang personal nga responsibilidad. Wala gyod niya sila kalimti. Ug sa iyang gitakdang panahon, iya silang banhawon. Samag yamog nga makapabuhi sa uga nga tanom, si Jehova, ang Tinubdan sa kinabuhi, magpukaw sa atong mga minahal nga natulog sa kamatayon. Eksayted gyod ta sa panahon nga makauban na nato sila pag-usab!—Itandi ang Marcos 5:42.

15. Nganong makahupay nato ang saad nga pagkabanhaw?

¹⁵ Siyempre, bisag nagtuo ta sa saad nga pagkabanhaw, maguol gyod gihapon ta kon mamatyan tag minahal. Pero ang pagkahibalo nga wala sila kalimti ni Jehova makahupay nato. Mao nay nakahupay kang Michael, nga gihisgotan ganina. Siya miingon: “Ang Isaias 26:19 nakatabang nako nga masabtan nga espesyal kaayo para kang Jehova ang akong mga ginikanan. Wala gyod siya malimot nila, ug naa sila pirme sa iyang panumdoman. Sa iyang gitakdang panahon, banhawon ni Jehova si Mama ug Papa. Nakahupay ug nakalig-on gyod nako ang paghunahuna ani.” Sa atong bahin, hinaot nga hinumdoman pod nato pirme ang paglaom nga makauban natog balik ang atong namatay nga mga minahal. Makatabang na aron makaya nato ang kasakit ug kaguol nga atong gibati karon.

16. Unsay paborito nimong teksto nga makahupay nimo dihang naa ka sa lisod nga situwasyon?

¹⁶ Nahisgotan na nato ang pipila ka bersikulo sa basahon sa Isaias nga makahupay nato dihang kalit nga mausab ang atong kahimtang, dihang hasolon ta pag-ayo sa atong konsensiya, ug dihang mamatyan ta. Mapasalamaton kaayo ta nga ginahupay ug ginapalig-on ta ni Jehova pinaagi sa iyang Pulong! (Sal. 94:19) Naa ba kay paboritong teksto nga makahupay nimo dihang naa ka sa lisod nga situwasyon? I-memorize ni o kaha isulat sa papel ug ibutang sa lugar diin pirme nimo ning makita. Seguradong mapalig-on gyod ka sa makapahupayng mga pulong sa atong mahigugmaong Amahan, si Jehova.