MGA PANGUTANA GIKAN SA MGA MAGBABASA

Unsa ang duha ka pakigsaad nga gitumong ni apostol Pablo diha sa Galacia 4:24?

Human maghisgot si Pablo bahin sa relasyon ni Abraham kang Sara ug kang Agar, siya miingon: “Kini nga estorya dunay simbolikong kahulogan; kay kining mga bayhana nagkahulogan ug duha ka pakigsaad.” (Gal. 4:​22-24) Kaniadto, nagtuo ta nga kining duha ka pakigsaad nagtumong sa pakigsaad sa Balaod ug sa bag-ong pakigsaad. Pero human sa dugang nga pagsusi ug pagtuon, nakita nga kinahanglan natong usbon ang atong pagsabot bahin ani. Posible nga dili ang bag-ong pakigsaad ang gitumong ni Pablo, kondili ang Abrahamikong pakigsaad. Konsiderahon nato ang pipila ka detalye.a

Gikompara ni Pablo ang ulipong babaye nga si Agar ngadto sa Bukid sa Sinai. (Gal. 4:25) Si Agar nagtumong sa pakigsaad sa Balaod nga gihatag didto sa Bukid sa Sinai niadtong 1513 B.C.E. (Ex. 19:​5, 6) Kini nga pakigsaad magpahinumdom sa mga Hudiyo nga ulipon sila sa sala, kay walay bisan usa nila ang hingpit nga makatuman sa Balaod. Kini nga pakigsaad motabang pod sa nasod sa Israel nga mailhan ang Mesiyas—kinsa mao ra gyoy makatuman sa tanang gisugo sa Balaod. Dihang gihalad sa Mesiyas ang iyang hingpit nga kinabuhi, napahigawas ang dili hingpit nga mga tawo gikan sa pagkaulipon sa sala ug kamatayon. (Gal. 3:​19, 24, 25) Kay gituman na man ni Jesus ang katuyoan sa Diyos, wala na kinahanglana ang Balaod.—Roma 10:4.

Si Pablo miingon nga si Agar lahi kang Sara, ang “babayeng gawasnon” nga nanganak “tungod sa usa ka saad.” (Gal. 4:23) Kana nga saad mao ang Abrahamikong pakigsaad. (Gal. 3:29; 4:​28, 30) Niini nga pakigsaad, giingnan ni Jehova si Abraham: “Pinaagi sa imong kaliwat ang tanang nasod sa yuta mapanalanginan kay gituman nimo ang akong gisulti.”—Gen. 22:18.

Kana nga pakigsaad uban kang Abraham naghatag ug dugang detalye sa saad ni Jehova didto sa Eden. (Gen. 3:15) Gipakita niini nga pakigsaad nga ang gitagna nga “kaliwat” maggikan sa linya ni Abraham. Gipatin-aw ni Pablo nga kini nga “kaliwat” pangunang nagtumong kang Jesu-Kristo. Pero apil pod niini nga kaliwat kadtong mga “iya sa Kristo,” ang 144,000 nga makauban ni Jesus sa pagmando didto sa iyang Gingharian. (Gal. 3:​16, 29; Pin. 14:​1-3) Ang katumanan sa saad sa Diyos ngadto kang Abraham moresultag daghang panalangin para niadtong modawat ug mosunod kang Jesus.

Nganong gihisgotan man ni Pablo kining simbolikong drama? Gusto niyang ipasiugda nga kon ipamugos gyod sa mga Hudiyo nga kinahanglang sundon gihapon ang Balaod, magpabilin silang ulipon sama kang Agar. Pero kon dawaton nila ang pangunang “kaliwat” ni Abraham nga mao si Jesu-Kristo, mahimo silang gawasnon sama kang Sara. Makabaton silag tinuod nga kagawasan gikan sa sala ug kamatayon. (Juan 8:​32-34) Sa laing bahin, kon dili nila dawaton si Jesus, ilang gihimong walay pulos ang pangunang katuyoan kon nganong gihatag ang pakigsaad sa Balaod, nga mao ang pagtultol kanila ngadto sa Kristo.

Daghan sa mga taga-Galacia nga gisulatan ni Pablo maoy Hentil nga mga Kristohanon ug wala gyod sukad mailalom sa Balaod. Ang uban niadtong nagsunod pag-ayo sa Judaismo namugos nga angayng sundon sa Hentil nga mga Kristohanon ang Balaod, apil na ang pagpatuli. Pero si Pablo miingon nga binuang gyod kon ‘magpaulipon’ sila sa Balaod human nila maeksperyensiyahan ang “kagawasan” nga iya sa Kristo.—Gal. 5:​1, 10-14.