Mga Pukot sa Panahon sa Bibliya

Ang Bibliya naghisgot nga ang ubang tinun-an ni Jesus mga mangingisda. (Mar. 1:​16-20) Naggamit silag mga pukot dihang mangisda sa Dagat sa Galilea.

Ang mga pukot gigama sa tanod nga lino o sa pisi, nga gihigot ug gisumpaysumpay. Ang gidak-on sa mga mata o bangagbangag sa pukot nagdepende sa klase sa isda nga gustong makuha. Ang gagmayng mga pukot sagad naay mga pabug-at nga tingga o bato aron mounlod ni. Ang dagkong mga pukot, sama sa baling, naay mga pabug-at sa ilalom ug mga boya o palutaw nga kahoy sa ibabaw.

Mahal ang mga pukot. Puwede ning magisi tungod sa mga batobato ilalom sa dagat o sa kabug-at sa mga isda nga makuha. (Luc. 5:6) Gani ang Bibliya naghisgot bahin kang Santiago ug Juan nga “nagpuna [o, nag-ayo] sa ilang mga pukot”—tingali gamit ang dagom ug tanod nga lino. (Mat. 4:21; footnote) Ang mga mangingisda posibleng naga-repair sa ilang mga pukot kada human nilag gamit. Mabasa pod nato sa basahon sa Lucas nga ang mga mangingisda “nagwaswas sa ilang mga pukot” aron matangtang ang mga balas o ang uban pang namilit niini. (Luc. 5:2) Dayon ibulad ni sa init aron mauga—tingali aron dili ni magabok.—Ezeq. 47:10.

Sa panahon ni Jesus, dihay mga mangingisda nga iyang gidapit nga mahimong mga “mangingisdag tawo.”