Magmaunongon Kang Jehova Bisag Unsa pay Mahitabo

1-2. Unsay nahitabo dihang nanudlo si Jesus sa Capernaum?

“NGIL-AD kaayo ang iyang gisulti; kinsay ganahang maminaw niana?” (Juan 6:60) Mao nay reaksiyon sa daghang tinun-an ni Jesus tungod sa iyang giingon dihang nanudlo siya sa Capernaum. Si Jesus miingon: “Gawas kon mokaon mo sa unod sa Anak sa tawo ug moinom sa iyang dugo, kamo dili makabaton ug kinabuhi.” Miingon pod siya: “Kadtong mokaon sa akong unod ug moinom sa akong dugo makabaton ug kinabuhing walay kataposan, ug banhawon nako siya sa kataposang adlaw.”—Juan 6:​53, 54.

² Kadtong mga napandol sa giingon ni Jesus mihunong sa pagsunod kaniya. Wala ba gyod silay pagtuo kang Jesus? Aw sa wala pa ni mahitabo, ang uban—apil na ang mga tinun-an ni Jesus—nahingangha kaayo sa iyang gihimo. Nakaingon pa gani sila: “Siya gayod ang Propeta nga gitagnang moanhi sa kalibotan.” (Juan 6:14) Busa klaro nga ang maong mga tinun-an naay pagtuo kang Jesus. Pero dihang naa siyay giingon nga nakapalibog nila, mihuyang ang ilang pagtuo ug wala na sila magpabiling maunongon kaniya.

3. Unsay reaksiyon sa mga apostoles sa giingon ni Jesus, ug ngano? (Tan-awa sab ang hulagway.)

³ Lahi ang reaksiyon sa mga apostoles sa giingon ni Jesus. Dihang gipangutana sila ni Jesus kon gusto pod ba nilang mobiya, si Pedro mitubag: “Ginoo, kang kinsa man mi mangadto? Anaa nimo ang mga pulong nga motultol sa kinabuhing walay kataposan. Kami nagtuo ug nahibalo nga ikaw ang Balaang Usa sa Diyos.” (Juan 6:​68, 69) Matikdi nga wala moingon si Pedro nga nakasabot gyod siya ug ang ubang apostoles sa kahulogan sa giingon ni Jesus bahin sa pagkaon sa iyang unod ug pag-inom sa iyang dugo. Pero bisan pa ana, midesisyon sila nga magpabiling maunongon kaniya. Ngano? Kay lig-on ang ilang pagtuo sa kamatuoran bahin kang Jesus—nga siya “ang Kristo sa Diyos.”—Luc. 9:​20, 35.

4. Unsang mga situwasyon ang posibleng magsulay sa atong pagkamaunongon?

⁴ Daghang situwasyon ang posibleng magsulay sa atong pagkamaunongon kang Jehova. Pananglitan, unsa may atong reaksiyon kon naay mga kausaban sa atong pagsabot sa usa ka teksto sa Bibliya o sa atong paagi sa pagsangyaw? O unsa may atong reaksiyon kon mag-antos ta tungod sa lisod kaayo nga kahimtang ug morag gipasagdan ra ta ni Jehova? Komosta kon napasakitan ta sa suod kaayo nato nga igsoon, o kaha mibati ta nga dili maayog pagtratar nato ang igsoon nga atong gitahod?

5. Nganong kinahanglang lig-on ang pundasyon sa atong pagtuo? Iilustrar. (Colosas 1:23)

⁵ Importante kaayo nga lig-on ang pundasyon sa atong pagtuo. Sa pag-ilustrar, hunahunaa ang bilding nga gitukod diha sa lugar nga sagad malinogan. Aron dili ni mahugno bisan pa sa linog, kinahanglan nga lig-on nig pundasyon. Sa samang paagi, aron dili mahugno ang atong pagtuo tungod sa mga pagsulay nga sama sa gihisgotan sa miaging parapo, kinahanglan nga lig-on nig pundasyon. Kon padayon natong palig-onon ang pundasyon sa atong pagtuo, makapabilin tang maunongon kang Jehova bisag unsa pang mga pagsulay ang atong maatubang.—1 Cor. 15:58; basaha ang Colosas 1:23.

6. Unsay nakatabang sa mga apostoles nga magpabiling maunongon kang Jesus?

⁶ Unsay nakatabang sa mga apostoles nga magpabiling maunongon kang Jesus bisan pag mibiya kaniya ang uban? Ang usa sa nakatabang nila mao ang pagkahimong kombinsido nga si Jehova lang ang angayng simbahon tungod kay siya ang Maglalalang sa tanang butang. Naa pod silay pagtuo nga si Jesus ang Anak sa Diyos ug nga naa kaniya ang “mga pulong nga motultol sa kinabuhing walay kataposan.” Kombinsido pod sila nga giuyonan ug gisuportahan ni Jehova si Jesus. Busa karon, imbes tagsatagsaon natog hisgot ang mga situwasyon nga posibleng magsulay sa atong pagtuo, atong hisgotan ang tulo ka kamatuoran nga makatabang nato nga magpabiling lig-on bisag unsa pay atong maatubang: (1) si Jehova ang Maglalalang sa tanang butang, (2) ang Bibliya gikan gyod kang Jehova, ug (3) gigiyahan ni Jehova ang iyang katawhan karon. Kon kombinsido gyod ta niini nga mga kamatuoran, makapabilin tang maunongon bisag unsa pay mahitabo.

SI JEHOVA ANG MAGLALALANG

7. (a) Unsay gipahinumdom kanato sa Pinadayag 4:11? (b) Unsa tingali ang posibleng mahitabo kon makaatubang tag mga pagsulay sa atong pagtuo?

⁷ Basaha ang Pinadayag 4:11. Kini nga teksto nagpahinumdom nato nga si Jehova ang naghimo sa tanang butang, maong siya lang gyod ang angay natong simbahon. Ug kon pamalandongon nato kon unsa ka gamhanan si Jehova, mapalig-on gyod ang atong pagsalig nga tabangan ta niya sa tanan natong kalisdanan. Pero si Satanas nagpakaylap ug daghang bakak nga mga impormasyon nga makapaduhaduha sa mga tawo kon naa ba gyoy Diyos. Naa pa gani mga siyentista nga moingon nga ang kinabuhi mitungha lang daw ug iya. Busa kon dili lig-on ang atong pagtuo nga si Jehova ang Maglalalang ug nga gimahal ta niya, basin magduhaduha na ta kon tinuod ba gyod nga naglungtad siya ug kon motabang ba gyod siya nato dihang makaatubang tag mga kalisdanan.—Heb. 11:6.

8-9. Unsay angay nimong himoon kon nagsugod na kag duhaduha nga gilalang gyod ni Jehova ang tanang butang? (Tan-awa sab ang hulagway.)

⁸ Kon medyo dili na ka segurado nga gilalang ni Jehova ang tanang butang, kinahanglang molihok dayon ka aron mawala ang imong mga pagduhaduha. Pag-research sa atong mga publikasyon aron makita nimo ang daghan kaayong pamatuod nga si Jehova ang Maglalalang. Pananglitan, puwede nimong basahon ang mga brosyur nga Gilalang ba ang Kinabuhi? ug The Origin of Life—Five Questions Worth Asking. Sa ato pong website nga jw.org, makakita kag dili malalis nga mga ebidensiya diha sa serye nga “Gidisenyo ba Kini?” Ang batan-ong sister sa United States nga si Jessica miingon: “Human nako mabasa ang brosyur nga Origin of Life, nakombinsir ko nga naa gyoy naghimo nato. Kahibalo na man ko daan ani, pero dihang gitun-an nakog balik ang brosyur, mas nakombinsir pa gyod ko ug nawala ang tanan nakong pagduhaduha.” Gawas pa ani nga mga publikasyon, daghan pod ang nakabenepisyo sa pagbasa sa librong Is There a Creator Who Cares About You? Tingali nabasa na nimo ni sa una, pero nindot pod kon imo ning basahog balik.

⁹ Puwede pod nimong himoong personal study project ang pag-research sa mga ebidensiya nga naa gyoy Diyos. Makatabang ni dili lang aron molig-on ang imong pagtuo nga naglungtad gyod si Jehova, kondili aron mailhan pod nimo kon unsa siyang klaseha sa Diyos. (Roma 1:20) Magamit pod nimo ang imong nakat-onan aron tabangan ang uban nga naay mga pagduhaduha. Oo, gihatagan ta ni Jehova ug daghang ebidensiya nga nagpakita nga siya ang atong Maglalalang.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

ANG BIBLIYA GIKAN GYOD KANG JEHOVA

10. Nganong importante kaayo para nato ang Bibliya? (2 Timoteo 3:​16, 17)

¹⁰ Basaha ang 2 Timoteo 3:​16, 17. Ang Bibliya maoy mensahe ni Jehova para sa mga tawo. Kini nagtubag sa importanteng mga pangutana sa kinabuhi. Nagtudlo pod ni nato kon unsay kabubut-on ni Jehova ug kon unsay gusto niya nga atong himoon. Kombinsido ta nga si Jehova ang Awtor sa Bibliya. Busa para nato, ang Bibliya gyod ang pinakaimportanteng basahon. Naningkamot ta nga masabtan ang iyang Pulong ug mapadapat ang giingon niini.

11. Nganong segurado ka nga gigiyahan gyod sa Diyos ang pagsulat sa Bibliya?

¹¹ Nganong segurado ta nga gigiyahan gyod ni Jehova ang pagsulat sa Bibliya? Tungod sa daghang rason. Ang Bibliya naghisgot ug saktong mga impormasyon bahin sa kasaysayan. (Luc. 3:​1, 2) Husto pod ang giingon niini bahin sa atong planeta ug sa uban pang gilalang ni Jehova. (Job 26:7) Sa tanang basahon sa kalibotan, ang Bibliya ang pinakadaghang kopya nga napanagtag sukad pa sa una, bisan pa sa grabeng paningkamot ni Satanas nga wagtangon ni. Mga 40 ka lainlaing tawo ang nagsulat niini sulod sa mga 1,600 ka tuig, pero nagkauyon gihapon ang ilang gipangsulat. Ug bisag karaan na kaayo ni nga basahon, ang praktikal nga mga tambag niini nakatabang sa minilyong tawo karon. (Prov. 13:20; 15:21; Mat. 7:12) Daghan pong tagna niini ang natuman, maong makasalig gyod ta sa Bibliya. (Jos. 23:14) Tungod ani nga mga rason, kombinsido ta nga ang Bibliya gikan gyod sa Diyos.

12. Unsay angay natong buhaton kon medyo nagduhaduha na ta nga gikan gyod sa Diyos ang Bibliya?

¹² Kon medyo nagduhaduha na ta nga gikan gyod sa Diyos ang Bibliya, unsay angay natong buhaton? Angay nato ning iampo ug molihok ta uyon sa atong giampo. Matikdi ang giingon sa batan-ong brader nga si Jordan, kinsa nagdako nga Saksi: “Dili ko bastabasta motuo sa isulti sa uban; kinahanglan nako ning pamalandongon pag-ayo. Sa tinuod lang, magduhaduha man gihapon ko usahay. Pero mag-research ko sa atong mga publikasyon aron matubag ang akong mga pangutana ug mawala ang akong pagduhaduha.” Samtang padayon natong palig-onon ang atong pagsalig nga gigiyahan gyod ni Jehova ang pagsulat sa Bibliya, mapalig-on pod nato ang pundasyon sa atong pagtuo.—1 Cor. 3:​12, 13.

GIGIYAHAN NI JEHOVA ANG IYANG KATAWHAN KARON

13. Unsay angay natong buhaton kon magsugod na tag duhaduha kon kinsa gyoy tinuod nga katawhan sa Diyos karon?

¹³ Kon magsugod na tag duhaduha nga ang mga Saksi ni Jehova mao gyod ang katawhan sa Diyos karon, kinahanglang molihok dayon ta aron mawala ni. Dili nato pasagdan nga magpadayon ang atong mga pagduhaduha. Puwede natong pangutan-on ang atong kaugalingon: ‘Kinsa man gyoy naghimo sa ilang maarangan nga sundon ang mga sukdanan sa Bibliya? Kinsa man gyoy naningkamot nga ibase sa Bibliya ang tanan nilang gituohan?’ (2 Tim. 4:​3, 4) ‘Kinsa man gyoy naghimo sa kabubut-on ni Jehova karon?’—Mat. 7:​20, 21.

14. Giunsa pagtuman sa mga Saksi ni Jehova ang Mateo 24:14?

¹⁴ Kon bahin sa paghimo sa kabubut-on sa Diyos karon, puwede natong pangutan-on ang atong kaugalingon, ‘Kinsa may nagahimo sa buluhatong pagsangyaw nga gitagna ni Jesus nga mahitabo sa kataposang mga adlaw?’ (Mat. 24:14) Klaro kaayo ang tubag. Gigamit sa Diyos ang iyang katawhan—ang mga Saksi ni Jehova—sa paghimo sa buluhatong pagsangyaw. Kita lang ang nagsangyaw sa maayong balita sa Gingharian sa Diyos sa kapig 240 ka kayutaan. Ato ning ginahimo sulod na sa kapig 100 ka tuig ubos sa pagmando sa Gingharian. Oo, padayon gyod tang nakigbahin niining importante kaayong buluhaton nga pagsangyaw ug pagpanudlo.—Mat. 28:​19, 20.

15. Sa unsang paagi ang mga Saksi ni Jehova nakatabang sa pagbalaan sa ngalan sa Diyos? (Mateo 6:9; Isaias 43:10)

¹⁵ Basaha ang Mateo 6:9 ug Isaias 43:10. Kadungganan gyod nato nga kita ang nagrepresentar sa personal nga ngalan sa Diyos, ug proud ta nga tawgong mga Saksi ni Jehova. Bisag daghan ang wala mahibalo sa iyang ngalan, naningkamot ta nga mailhan ni sa mga tawo. Tungod ana, atong gibalik ang ngalan ni Jehova sa kon asa ni orihinal nga makita diha sa Bibliya. Mabasa ni sa kapig 7,000 ka beses sa Bag-ong Kalibotang Hubad sa Balaang Kasulatan.

16. Nganong kombinsido ta nga ang mga Saksi ni Jehova nagsunod sa sugo sa Juan 13:​34, 35? (Tan-awa sab ang hulagway.)

¹⁶ Basaha ang Juan 13:​34, 35. Ang kalibotan gubot ug punog pagdumtanay. Pero lahi kaayo ta kay bisag lainlain tag kagikan, rasa, ug kultura, naningkamot ta nga maghigugmaay ug magkahiusa. Pananglitan, nakasulay na ba kag tambong ug laing kongregasyon dihang mibakasyon ka sa laing lugar? Seguradong nakita ug nabati gyod nimo ang gugma ug panaghiusa sa atong organisasyon. Dihang imong pamalandongon kon unsa ni ka talagsaon, mas molig-on ang imong pagsalig nga ang mga Saksi ni Jehova mao gyoy gigamit sa Diyos sa pagtuman sa iyang kabubut-on karon. Ang paghinumdom ani makatabang nato nga magpabiling maunongon kang Jehova bisag unsa pang pagsulay ang atong maatubang.

AYAW GYOD UG BIYA KANG JEHOVA

17-18. Unsang lisod nga mga situwasyon ang ato tingaling maatubang, pero unsay atong determinasyon?

¹⁷ Nagpuyo ta sa kuyaw nga mga panahong lisod sagubangon, maong makaatubang gyod tag mga kalisdanan. (2 Tim. 3:​1, 13) Basin naa poy mga situwasyon nga magsulay sa atong pagtuo. Tingali naay bag-ong kahikayan ang atong organisasyon nga dili kaayo nato masabtan. O kaha basig masaypan tag sabot o mapasakitan ta sa usa ka igsoon. Posible pod nga taudtaod na tang nag-antos sa usa ka problema ug wala tay makitang solusyon ani, o kaha wala ta kasabot kon nganong nahitabo ni nato.

¹⁸ Kini nga mga situwasyon makapaguol ug makapabalaka tingali nato. Bisan pa ana, makapabilin gihapon tang maunongon kang Jehova kon kombinsido ta nga siya ang Maglalalang, nga Pulong gyod niya ang Bibliya, ug nga ang mga Saksi ni Jehova mao ang iyang katawhan. Sama sa giingon ni Pedro kang Jesus, makaingon pod ta kang Jehova: “Kang kinsa man mi mangadto? Anaa nimo ang mga pulong nga motultol sa kinabuhing walay kataposan.”