Mga Prinsipyo sa Bibliya—Kon Nganong Importante Kini

1-2. (a) Nganong karaan na kaayo nga basahon ang Bibliya? (b) Nganong ang Bibliya makatabang gihapon sa mga tawo karon?

ANG Bibliya karaan na kaayo nga basahon. Gisugdan nig sulat mga 3,500 ka tuig kanhi, ug nahuman mga 2,000 ka tuig na ang milabay. Bisan pa ana, ang “pulong sa Diyos” diha sa Bibliya mapuslanon gihapon karon. (Heb. 4:12; 2 Tim. 3:​16, 17) Minilyong tawo ang nakapamatuod nga dako kaayog tabang ang Bibliya sa ilang kinabuhi.

² Pero posible ba diay nga mapuslan pa gihapon ang usa ka basahon nga karaan na kaayo? Oo. Matikdi ang duha ka rason. Una, ang mensahe sa Bibliya naggikan sa “buhi nga Diyos,” sa atong Maglalalang nga maalamon kaayo. (1 Tim. 4:10; Roma 16:​26, 27) Ikaduha, ang mga prinsipyo sa Bibliya dili gyod molubad. Sa ato pa, mapuslan ni sa bisan unsang yugto sa panahon o bisag unsa pay giatubang sa usa ka tawo.

3. Unsa nga mga pangutana ang atong hisgotan niining artikuloha?

³ Unsa ang mga prinsipyo sa Bibliya? Nganong importante kaayo ni para nato karon? Unsay atong himoon aron makita ni nga mga prinsipyo dihang magbasa tag Bibliya? Hisgotan nato ni nga mga pangutana niining artikuloha. Hisgotan pod nato kon sa unsang paagi ang mga gitudlo ni Jesus nagpasiugda kon unsa ka importante ang mga prinsipyo.

UNSA ANG MGA PRINSIPYO SA BIBLIYA?

4. Unsay gipasabot sa mga prinsipyo sa Bibliya?

⁴ Ang mga prinsipyo sa Bibliya maoy pangunang mga kamatuoran nga gibasehan sa mga balaod sa Diyos. Usahay klaro na ning gihisgotan diha sa balaod mismo. (Mat. 22:37) Pero ang mga prinsipyo mas labaw kay sa espesipikong mga balaod. Ngano? Kay ang mga balaod sagad mapadapat lang sa usa ka partikular nga situwasyon o panahon. Pero ang mga prinsipyo sa Bibliya nagpasiugda sa panghunahuna ni Jehova sa mas lapad nga paagi kay mapadapat ni sa daghang kahimtang. Ang matag balaod ni Jehova naay gibasehan nga prinsipyo. Ang maong mga prinsipyo puwedeng mapadapat sa lainlaing situwasyon ug mapuslanon sa bisan unsang panahon. (Sal. 119:111) Busa bisan pag mausab tingali ang mga balaod, ang mga prinsipyo luyo ani dili gyod mausab.—Isa. 40:8.

5. Iilustrar ang kalainan sa balaod ug prinsipyo. (Tan-awa sab ang mga hulagway.)

⁵ Aron mas masabtan nato ang kalainan sa balaod ug prinsipyo, konsideraha ni nga ilustrasyon. Ingnan tingali sa usa ka inahan ang iyang gamayng anak, ‘Ayawg hikapa ang stove.’ Kadto maoy usa ka sugo o balaod. Pero unsay prinsipyo sa maong balaod? Ayawg hikap ug bisan unsa nga init, kay kon imo ning himoon, mapaso ka. Kini nga prinsipyo dili lang kutob sa stove mapadapat. Apil na pod ani ang plansa, heater, o bisan unsang init nga butang nga puwedeng makapaso. Dili pod ni taman ra sa balay; mapadapat pod ni sa bata bisag asa siya. Siyempre inigkadako sa bata, puwede na siyang mogamit ug stove. Pero kinahanglan siyang mag-amping sa paggamit ani aron dili siya mapaso. Busa bisag wala na niya kinahanglana ang balaod sa iyang mama, kinahanglan gihapon niyang hinumdoman ang prinsipyo sa maong balaod.

NGANONG IMPORTANTE ANG MGA PRINSIPYO SA BIBLIYA?

6. (a) Unsay gitagana ni Jehova diha sa iyang Pulong nga makatabang nato? (b) Nganong makaingon ta nga naay pagsalig si Jehova nato?

⁶ Kay gimahal ta ni Jehova, gihatagan ta niyag espesipikong mga balaod aron malikayan nato ang dili maayong resulta sa paghimog daotan. (Sant. 2:11) Gitabangan pod ta niyang masabtan ang mga prinsipyo sa maong mga balaod. Ngano? Kay dili sa tanang bahin sa atong kinabuhi nga naa gyoy balaod pirme. Maong diha sa iyang Pulong, gigiyahan ta ni Jehova pinaagi sa mga prinsipyo sa Bibliya aron matabangan ta sa paghimog maayong mga desisyon ug sa pagbuhat kon unsay sakto bisag walay espesipikong balaod. Kini nga mga prinsipyo nagpakita nga naay pagsalig si Jehova nato ug gihatagan ta niyag kagawasan sa paghimog mga desisyon aron mapamatud-an nato ang atong gugma kaniya ug sa iyang mga sukdanan.—Gal. 5:13.

7. Iilustrar kon unsa ka importante ang mga prinsipyo sa Bibliya. (Tan-awa sab ang hulagway.)

⁷ Sa pag-ilustrar kon sa unsang paagi ang mga prinsipyo sa Bibliya makatabang nato, hunahunaa ang mga road sign nga makita sa mga drayber diha sa highway. Daghan niini nga mga sign maoy espesipikong mga balaod diha sa dalan nga kon supakon sa usa ka drayber, posibleng matiketan siya o makabayad pa ganig multa. Pananglitan, naay mga sign nga nagpakita kon pila ra gyoy speed limit o kon asa lang puwedeng mohunong ang sakyanan. Pero naa poy mga sign nga walay espesipikong instruksiyon kon unsay angayng himoon sa drayber. Ang uban ani nagpasidaan sa posibleng mga risgo diha sa dalan, sama anang sign nga dangog ang dalan o nga naay mga bata nga motabok. Kon makita ni sa eksperyensiyado nga drayber, iya tingaling hunahunaon kon unsay kahimtang sa dalan ug mag-adjust siya sa iyang drinayban. Pananglitan, kon nag-ulan, maghinayhinay gyod siyag drayb kay delikado kaayo kon magpakusog siya. Sa samang paagi, ang mga Kristohanon molikay gyod sa bisan unsang binuhatan nga espesipikong gidili sa Pulong sa Diyos. Pero dili kay kana ra. Likayan pod nila ang bisan unsang panghunahuna o binuhatan nga posibleng mahimong hinungdan nga masupak na hinuon nila ang mga balaod sa Diyos. Nagpasabot ni nga kinahanglan silang mohimog mga desisyon base sa ilang nakat-onan nga mga prinsipyo sa Bibliya.

8. Base sa Roma 12:​1, 2, unsay kaayohan kon makakat-on ta sa pagpangitag mga prinsipyo sa Bibliya?

⁸ Pero naa pay importanteng mga kaayohan kon kamao tang mangitag mga prinsipyo sa Bibliya ug kon ipadapat nato ni sa atong kinabuhi. Pananglitan, mabansay ta sa pagpamalandong kon unsay panglantaw ni Jehova sa usa ka butang. Dihang magbasa tag mga asoy sa Bibliya, makakat-on ta nga mangitag praktikal nga mga leksiyon gikan ani. Hunahunaon nato kon nganong mao ni ang gustong itudlo ni Jehova ug kon sa unsang paagi ta makabenepisyo ani. Kon ato nang himoon, mabansay nato ang atong “gahom sa pagpangatarongan” diha sa atong pag-alagad kang Jehova. Mapamatud-an pod nato sa atong kaugalingon “ang maayo ug dalawaton ug hingpit nga kabubut-on sa Diyos.”—Basaha ang Roma 12:​1, 2.a

9. Unsa pay laing kaayohan kon atong ipadapat ang mga prinsipyo sa Bibliya? (Hebreohanon 5:​13, 14)

⁹ Ang pagpadapat sa mga prinsipyo sa Bibliya makatabang nato nga mahimong mas hamtong nga mga Kristohanon. Kon atong ipadapat ni nga mga prinsipyo, mas masuod ta kang Jehova. (Basaha ang Hebreohanon 5:​13, 14.) Hunahunaa ni: Ang mga ginikanan sagad mohatag sa ilang mga anak ug daghang balaod aron mahibalo ang ilang mga bata kon unsay angayng himoon ug kon unsay dili. Mosunod tingali ang mga bata ani kay mahadlok silang makapiso sa ilang mga ginikanan. Pero wala ta tratara ni Jehova nga morag mga bata, kondili ingong mga hamtong. Naa siyay pagsalig nga mohimo tag mga desisyon nga nahiuyon sa iyang kabubut-on. Kon kanay atong himoon, mapalipay nato pag-ayo ang kasingkasing ni Jehova.—Sal. 147:11; Prov. 23:​15, 26; 27:11.

PANGITAA ANG MGA PRINSIPYO SA BIBLIYA

10. Unsaon nato pagpangitag mga prinsipyo sa Bibliya?

¹⁰ Ang mga leksiyon nga atong makat-onan sa pagbasa sa mga asoy sa Bibliya makatabang nato nga masabtan kon unsay panglantaw ug pagbati ni Jehova sa usa ka butang. Ang pagpamalandong pod kon nganong gihatag ni Jehova ang usa ka balaod makatabang nato nga makita ang prinsipyo niana. Kon mas masabtan nato ang rason kon nganong gihimo ni Jehova ang usa ka butang, mas mailhan pa gyod nato siya. Pero aron mahibaloan nato ang panghunahuna sa Diyos, kinahanglang moampo ta niya alang sa tabang ug pauswagon nato ang atong katakos sa panghunahuna. (Prov. 2:​10-12) Puwede natong pangutan-on ang atong kaugalingon: ‘Ngano kahang naghimog ingon ani nga balaod ang Diyos? Kon si Jehova wala mouyon niini nga binuhatan, unsa kahay iyang pagbati sa mga butang nga susama niini? Unsa nga leksiyon ang akong makat-onan bahin niini nga asoy, ug unsaon nako ni pagpadapat sa akong kinabuhi?’ Dihang makita na nato ang mga rason luyo sa mga balaod ug ang mga leksiyon gikan sa mga asoy sa Bibliya, makatabang ni nato sa paghimog maayong mga desisyon—mga desisyon nga uyon sa kabubut-on ni Jehova.

11. Sa iyang Wali sa Bukid, unsay gihimo ni Jesus aron masabtan sa mga tawo ang panghunahuna ni Jehova? (Tan-awa sab ang hulagway.)

¹¹ Sa iyang Wali sa Bukid, gipakita ni Jesus kon unsay atong himoon aron masabtan nato ang panghunahuna ni Jehova. Hisgotan nato ang tulo ka pananglitan. Sa matag usa niini, gisulti una ni Jesus ang balaod. Dayon iyang gisulti ang rason, o ang prinsipyo, sa maong balaod. Dihang pamalandongon nato ang mga prinsipyo nga gihisgotan ni Jesus, atong makita nga puwede ning mapadapat bisan sa atong panahon karon. Ug makatabang ni nato sa paghimog maalamong mga desisyon.

12. Unsa ang prinsipyo sa balaod nga gihisgotan sa Mateo 5:​21, 22? (Tan-awa sab ang hulagway.)

¹² Basaha ang Mateo 5:​21, 22. “Ayaw pagpatay.” Unsa ang prinsipyo niini nga balaod? Dili gusto ni Jehova nga magdumot ta sa uban—sa pulong man, sa binuhatan, o bisan sa hunahuna. Gipasiugda ni Jesus nga bisag ang usa ka tawo wala mohimog aktuwal nga pagpatay, malapas gihapon niya ang prinsipyo sa maong balaod kon magdumot siya sa iyang igsoon. Kon ang usa “magpadayon sa pagkasuko sa iyang igsoon” o mosultig sakit nga mga pulong, siya “manubag” gihapon. Gani, kini nga mga kinaiya o binuhatan maoy usa sa mga rason kon nganong makapatay ang usa ka tawo.—1 Juan 3:15.

13. Unsaon nato pagpadapat ang prinsipyo sa Mateo 5:​21, 22? (Tan-awa sab ang hulagway.)

¹³ Unsaon nato pagpadapat ang prinsipyo sa Mateo 5:​21, 22? Kinahanglang likayan nato ang pagdumot. (Lev. 19:18; Job 36:13) Ngano? Kay kon magdumot ta sa usa ka tawo, dakog posibilidad nga makasulti o makahimo tag daotan. (Prov. 10:12) Apil ani ang pagpanglibak ug pagbutangbutang, nga makadaot sa reputasyon sa uban. (Prov. 20:19; 25:23) Sa panahon ni Jesus wala pay social media, mga blog, Internet, o messaging app. Pero bisan pa ana, ang prinsipyo nga gisulti ni Jesus mapadapat gihapon sa atong panahon ilabina dihang mogamit ta sa maong modernong mga himan. Busa sa tanang bahin sa atong kinabuhi, angay tang mag-amping nga dili ta mosultig bisan unsa nga makadaot sa reputasyon sa uban, nga samag ato na silang gipatay pinaagig sakit nga mga pulong.

14. Unsa ang prinsipyo sa balaod nga gihisgotan sa Mateo 5:​27, 28? (Tan-awa sab ang hulagway.)

¹⁴ Basaha ang Mateo 5:​27, 28. “Ayawg panapaw.” Unsa ang prinsipyo niini nga balaod? Gidumtan ni Jehova dili lang ang imoralidad, kondili apil na pod ang paghunahunag law-ayng mga butang nga posibleng moresultag imoral nga binuhatan. Si Jesus miingon nga kon ang minyo nga lalaki magsigeg tan-aw nga may kaibog sa usa ka babaye nga dili niya asawa, nakasala na siya. Busa kinahanglan gyong likayan ang imoral nga mga hunahuna, bisag lisod ning himoon. (Mat. 5:​29, 30) Kini nga prinsipyo mapadapat pod sa tagsaanong mga Kristohanon.

15. Unsaon nato pagpadapat ang prinsipyo sa Mateo 5:​27, 28? (Tan-awa sab ang hulagway.)

¹⁵ Unsaon nato pagpadapat ang prinsipyo sa Mateo 5:​27, 28? Dili gyod nato paundayonan ang imoral nga mga tinguha. (2 Sam. 11:​2-4; Job 31:​1-3) Busa ang usa ka hamtong nga Kristohanon dili gyod angayng motan-aw ug bisan unsang klase sa pornograpiya. Dili siya mangrason nga wala siyay gihimong daotan kay igo ra man siyang nagtan-aw ug imoral nga mga hulagway o video. Dili pod siya mangatarongan nga ang iyang ginatan-aw dili ra ingon ana ka law-ay kon ikompara sa ubang klase sa pornograpiya nga grabe kaayo ka bastos. Sa panahon ni Jesus, wala pay mga gadyet, salida, o mga hulagway. Pero bisan pa ana, ang prinsipyo nga gihatag ni Jesus nagtudlo nato kon unsay pagbati ni Jehova sa imoral nga mga hulagway o video nga komon karon. Atong masabtan nga gidumtan gyod ni Jehova ang imoral nga mga binuhatan sama sa sexting ug paghimog imoral nga mga buhat online. Ang pagpamalandong niini nga prinsipyo makatabang sa mga minyo nga dili gyod magluib sa ilang kapikas sa bisan unsa mang paagi. (Mal. 2:15) Makatabang pod ni sa tanang Kristohanon—minyo man o tagsaanon—nga dili gyod mohimog bisan unsa nga puwedeng moresultag seksuwal nga imoralidad.—Prov. 5:​3-14.

16. Unsa ang prinsipyo sa balaod nga gihisgotan sa Mateo 5:​43, 44? (Tan-awa sab ang hulagway.)

¹⁶ Basaha ang Mateo 5:​43, 44. “Higugmaa ang imong isigkatawo.” Unsa ang prinsipyo niini nga balaod? Gusto ni Jehova nga pakitaan natog gugma ang tanang tawo. Sa panahon ni Jesus, makapaguol kay ang mga Hudiyo nagtuo nga ang ilang isigka-Hudiyo lang ang kinahanglan nilang higugmaon, ug nga puwede ra nilang dumtan ang ilang mga kaaway. Pero nahibalo si Jesus nga dili kana ang gipasabot niini nga balaod. Nasayod siya nga gusto sa iyang mahigugmaong langitnong Amahan nga pakitaan natog gugma ang tanang tawo, bisag unsa pay ilang rasa o nasyonalidad.—Mat. 5:​45-48.

17. Unsay kaayohan kon ipadapat nato ang prinsipyo sa Mateo 5:​43, 44? (Tan-awa sab ang hulagway.)

¹⁷ Unsaon nato pagpadapat ang prinsipyo sa Mateo 5:​43, 44? Ang atong gugma sa isigkatawo magpalihok nato nga dili mag-apil-apil sa mga kagubot o giyera. (Isa. 2:4; Miq. 4:3) Makatabang ni nato nga pakitaag kaayo kadtong mga tawo nga lahig rasa, nasyonalidad, o tinuohan. (Buh. 10:​34, 35) Magpalihok pod ni nato nga pasayloon kadtong mga nakapasakit nato o sa atong mga minahal.—Mat. 18:​21, 22; Mar. 11:25; Luc. 17:​3, 4.

IPADAPAT KANUNAY ANG MGA PRINSIPYO SA BIBLIYA

18. (a) Unsay determinado natong himoon? (b) Unsay atong hisgotan sa sunod nga artikulo?

¹⁸ Mapasalamaton kaayo ta kang Jehova kay wala ta niya tratara nga morag gagmayng bata, kondili ingong mga hamtong. Gusto niya nga ipadapat nato ang mga prinsipyo sa Bibliya aron makahimo tag maayong mga desisyon. (1 Cor. 14:20) Samtang himoon nato ni nga mga desisyon, maningkamot ta nga ‘padayong masabtan kon unsa ang kabubut-on ni Jehova.’ (Efe. 5:17) Himoon nato kon unsay uyon sa iyang kabubut-on, dili tungod kay nahadlok ta nga masilotan, kondili tungod kay gihigugma nato siya. Pero naa pay laing regalo si Jehova nga makatabang nato sa paghimog maayong mga desisyon—ang atong konsensiya. Mao nay atong hisgotan sa sunod nga artikulo.