Sabta ang mga Ilustrasyon Diha sa Bibliya

Ang Bibliya naghisgot ug daghang ilustrasyon, pero ang mga tawo sagad malisdan sa pagsabot ani. (Mat. 13:13) Unsay makatabang nimo nga masabtan kon unsa gyoy kahulogan niini nga mga ilustrasyon? Sulayi ni:

• Sayra kon unsa o kinsay gihisgotan ug kon sa unsa ni gikompara. Pananglitan, diha sa Pinadayag 3:​3, ang pag-abot ni Jesus gikompara o gipakasama sa pag-abot sa usa ka kawatan.

• Susiha kon sa unsang paagi magkaparehas ang duha. Hunahunaa kon unsay koneksiyon sa topiko nga gihisgotan ug sa gikomparahan niini.

• Seguroa nga sakto ang imong pagsabot. Kinahanglan tang mag-amping kay basig malahi natog sabot ang ilustrasyon. Pananglitan, ang ilustrasyon nga gihisgotan ganina wala magpasabot nga si Jesus moabot aron mangawat. Hinuon, base sa konteksto, nagpasabot ni nga moabot siya nga wala damha, sama sa usa ka kawatan.