Kon Unsay Angay Natong Panglantaw sa Atong mga Kalisdanan

1-2. Unsay kinahanglan natong buhaton aron maatubang nato ang atong mga kalisdanan ug makalahutay? (Tan-awa sab ang hulagway.)

NAG-ATUBANG ba ka karon ug inhustisya, pagsupak gikan sa imong pamilya, o paglutos tungod sa imong pagtuo? Nag-antos ba ka sa sakit o sa katigulangon? O basin naguol kaayo ka karon kay namatyan kag minahal? Kon mao, wala ka mag-inusara; daghang alagad ni Jehova ang nakaeksperyensiya pod ana. Bisag nahibalo ta nga gimahal ta ni Jehova, dili kalikayan nga ang atong kinabuhi usahay “punog kasamok ug kagul-anan.”—Sal. 90:10.

² Unsay makatabang aron maatubang nato ang atong mga problema? Kinahanglan nga ang atong panglantaw sa atong mga problema parehas sa panglantaw ni Jehova. Nganong importante ni? Hunahunaa ni nga ilustrasyon: Kon magdrayb kag sakyanan nga hugaw ug windshield, dili kaayo nimo maklaro ang mga kapeligrohan sa dalan. Pero kon hinlo ni, maklaro na nimo kon unsay naa sa dalan. Maong kahibalo na ka kon unsay angay nimong himoon—kon moliko ba ka sa tuo o sa wala, mopahinay, o kaha mohunong. Sa susama, ang atong mga kalisdanan sa kinabuhi parehas nianang mga kapeligrohan sa dalan. Kon klaro nato ning makita, sa ato pa kon husto ang atong panglantaw niini, mahibalo ta kon unsay pinakamaayong himoon aron makalahutay. Niining artikuloha, atong hisgotan (1) kon unsa ang angay natong panglantaw sa atong mga kalisdanan, (2) kon sa unsang paagi ang sayop nga panglantaw sa atong situwasyon makadaot nato, ug (3) kon unsay atong mahimo aron magpabiling balanse ang atong panglantaw dihang makaatubang tag mga kalisdanan.

KON UNSAY ANGAY NATONG PANGLANTAW SA MGA KALISDANAN

3. Unsay realidad sa kinabuhi samtang nia ta sa daotang sistema ni Satanas?

³ Dili gyod kalikayan nga makaatubang tag mga kalisdanan. Kay si Satanas may nagmando niining daotan nga kalibotan ug kay dili man ta hingpit, makasinati gyod tag daghang problema. Ug samtang magkaduol ang kataposan niini nga sistema, mas mosamot pa gyod ang atong mga kalisdanan, tingali tungod sa mga kalamidad, trahedya, o daotang binuhatan sa ubang tawo. (Mat. 24:8; 2 Tim. 3:13) Gusto kaayo nato nga sulbaron na unta ni Jehova kining tanan karon, pero kon iya nang himoon, mora na hinuog gitabangan niya si Satanas nga molampos sa pagmando. Maong niini nga sistema, makadahom gyod ta nga makaeksperyensiya tag lainlaing problema.—Eccl. 9:12.

4. Unsa pang mga kalisdanan ang atong maeksperyensiyahan tungod sa atong pag-alagad kang Jehova?

⁴ Ang mga Kristohanon makasinatig dugang kalisdanan tungod sa ilang pagtuo. Kanunayng gipasidan-an ni Jesus ang iyang mga tinun-an nga lutoson sila tungod sa ilang pagsunod kaniya. (Mat. 24:9; Juan 16:2) Ang pagkahibalo ani makatabang nato nga dili maluya dihang makaatubang ug mga paglutos. (1 Tes. 3:​3, 4) Hinuon mas makapalig-on ni sa atong pagtuo ug makatabang nato sa paglahutay. Kon molahutay ta, nagpakita ni nga naa ta sa dalan paingon sa kinabuhing walay kataposan. Nagpakita pod ni nga dapig ta kang Jehova, dili kang Satanas. Hinumdomi nga gidaot ni Satanas ang ngalan sa Diyos, ug miingon pa gani siya nga ang mga tawo nag-alagad lang sa Diyos tungod sa hakog nga mga motibo. Aron pamatud-an ang iyang akusasyon, iyang gilisodlisod pag-ayo ang katawhan ni Jehova. (Job 1:​9-11) Pero kon molahutay ta tungod sa atong gugma sa Diyos, mapalipay nato si Jehova.—Prov. 27:11.

5. Unsay atong makat-onan sa Ecclesiastes 7:​13, 14? (Tan-awa sab ang mga hulagway.)

⁵ Gitugotan ni Jehova ang mga kalisdanan. Si Jehova dili gyod mobuhat ug daotan, ug dili pod ta niya sulayan pinaagi sa paghimog kadaot nato. (Sant. 1:13) Pero nganong misulat man si Haring Solomon nga ang “adlaw sa kalisdanan” maoy “buhat sa matuod nga Diyos”? (Basaha ang Ecclesiastes 7:​13, 14.) Usahay duna tay mabasa sa Bibliya nga morag mihimo si Jehova ug dili maayo, pero ang tinuod, igo lang ni niyang gitugotan nga mahitabo. Sa teksto, si Solomon mihatag ug maayong tambag nga makatabang nato aron naa tay hustong panglantaw sa atong kalisdanan. Una, kinahanglan natong dawaton nga samtang nia pa ta sa kalibotan ni Satanas, dili kanunayng maayo ang atong maeksperyensiyahan sa kinabuhi; naa gyoy mga panahon nga magkaproblema ta. Ug kon ugaling maayo ang atong kinabuhi o ang atong adlaw, pasalamatan nato ang Diyos tungod sa iyang kaayo ug isipon ni ingong regalo gikan niya. Ikaduha, gipahinumdoman ta ni Solomon nga dili gyod nato matag-an ‘kon unsay mahitabo kanato’—kon mahimo bang maayo ang atong adlaw o dili. Ang tanang tawo, matarong man o dili, makaeksperyensiya gyod ug mga problema.

6. Nganong gitugotan man ni Jehova nga makaatubang tag mga pagsulay? (Hebreohanon 12:​7, 11)

⁶ Kon husto ang atong panglantaw sa mga kalisdanan, makita nato nga gitudloan ta ni Jehova nga mosalig niya imbes sa atong kaugalingon. Nahibalo si Jehova sa atong mga ginaatubang ug wala ta niya pasagdi. Bisag gitugotan ta niya nga makaeksperyensiyag mga kalisdanan, nga mora bag naglakaw ta sa “ngiob kaayo nga walog,” padayon gihapon ta niyang gigiyahan, gipasaligan sa iyang gugma, ug gihatagag kusog aron makalahutay. (Sal. 23:4) Ang mga pagsulay makatabang pod nato nga makita ang atong mga kahuyangan ug makahimog mga kausaban sa tabang sa Diyos. (Basaha ang Hebreohanon 12:​7, 11.) Pananglitan, dihang gitugotan ni Jehova nga makasinatig mga kalisdanan si Job, nakatabang to kang Job nga makita kon unsay angay pa niyang pauswagon sa iyang kaugalingon, sama sa pagkamapainubsanon. (Job 42:​1-6) Sa susama, bisag unsa pay itugot ni Jehova nga mahitabo nato, nahibalo ta nga dili ni makahatag nato ug permanenteng kadaot. Makasalig ta nga kon molahutay ta sa atong mga kalisdanan, kita ‘bug-os nga magmadaogon.’—Roma 8:​35-39.

7. Nganong posible gihapon kang magmalipayon bisag gilutos ka?

⁷ Magmalipayon gihapon ta bisag gilutos. Kon gilutos ka tungod sa imong pagtuo, ayawg hunahunaa nga wala na malipay si Jehova nimo. Ang tinuod, nagpakita ni nga giuyonan ka niya. (Mat. 5:​10-12) Kon husto ang imong panglantaw sa mga pagsulay, dili ka maghunahuna nga wala na kay pulos kang Jehova. Hinuon, isipon nimo ingong kalipay nga gilutos ka tungod sa Kristo, sama sa gibati sa mga apostoles. (Buh. 5:​40-42) Dugang pa, basin matabangan pa gani nimo ang mga dili Saksi nga makakat-on sa kamatuoran, ug ingong resulta ilang ‘mahimaya ang Diyos.’ (1 Ped. 2:12) Sama kang Jose, posible kang magmalipayon dili lang inigkahuman sa imong mga kalisdanan, kondili bisan dihang nag-atubang pa ka ug mga pagsulay.—Gen. 39:​3, 23.

8. Unsa nga kamatuoran ang makadasig nato nga padayong molahutay sa atong mga kalisdanan?

⁸ Temporaryo ra ang atong mga kalisdanan karon. Ang estorya bahin kang Job nagpahinumdom nato nga naay kahumanan ang tanan natong pag-antos. Gani, “mas dagayang gipanalanginan ni Jehova ang ulahing katuigan ni Job” kay sa sinugdan. (Job 42:12) Busa kon ang imong kinabuhi karon punog problema, makasalig ka nga temporaryo ra na. Sama sa gihimo ni Jehova kang Job, panalanginan pod ni Jehova ang kaulahiang bahin sa imong kinabuhi, sa ato pa, ang imong walay kataposang kinabuhi didto sa bag-ong kalibotan. Ang paghinumdom ani makatabang nato nga padayong molahutay hangtod sa kataposan.—Mat. 24:13.

KON NGANONG MAKADAOT ANG SAYOP NGA PANGLANTAW

9. Unsay posibleng epekto kon sayop ang atong panglantaw sa atong mga kalisdanan?

⁹ Kinahanglang husto ang atong panglantaw sa atong giatubang nga mga kalisdanan aron dili mosamot ang atong situwasyon. Pananglitan, likayan nato ang paghunahuna nga si Jehova ang hinungdan sa atong mga problema. Hinumdomi nga dihang nagtuo si Job nga si Jehova ang hinungdan sa iyang pag-antos, dili to maayog epekto niya kay iya na hinuong “gituboy ang iyang pagkamatarong imbes ang iya sa Diyos.” (Job 32:2) Mao pod nay hunahuna ni Noemi sa primero. Iyang gipasanginlan si Jehova sa pait nga mga hitabo sa iyang kinabuhi. (Ruth 1:​13, 20, 21) Kon wala pa usba ni Job ug Noemi ang ilang sayop nga panglantaw, madaot gyod unta ang ilang relasyon sa Diyos. (Prov. 19:3) Pero gitabangan sila ni Jehova nga matul-id ang ilang panglantaw sa ilang kalisdanan. Ug tungod sa ilang pagkamaunongon, gipanalanginan sila ni Jehova.

10. Dihang makaatubang tag mga kalisdanan, unsa kahay posible natong mahunahunaan?

¹⁰ Bisag nahibalo ta nga dili si Jehova ang hinungdan sa atong mga problema, basin magduhaduha na ta kon gimahal pa ba gihapon ta niya. Kining negatibo nga panghunahuna makapaluya nato. (Prov. 24:10) Dihang si Haring David ug ang propetang si Habacuc nakaatubang ug mga kalisdanan, may mga panahon nga nagduhaduha sila kon naminaw ba gyod si Jehova sa ilang mga hangyo alang sa tabang. (Sal. 10:1; Hab. 1:2) Bisan pa ana, wala sila mohunong sa pag-ampo. Gipasaligan sila ni Jehova nga tabangan niya sila, ug mao pod nay himoon ni Jehova para nimo.—Sal. 10:17.

11. Unsay posibleng mahitabo nato kon dili husto ang atong panglantaw sa mga problema?

¹¹ Kon dili husto ang atong panglantaw sa mga problema, basin makalitan ta inig-abot ani, kay nagtuo tingali ta nga dili ni angayng mahitabo nato. (1 Ped. 4:12) Pananglitan, ang mga tinun-an ni Jesus wala makasabot kon nganong kinahanglan siyang makasinatig grabeng paglutos. (Luc. 18:​33, 34) Bisag prangka na silang giingnan ni Jesus kon unsay hapit nang mahitabo niya, wala gihapon motuo si Pedro. Nahibalo si Jesus nga ang sayop nga panghunahuna ni Pedro wala mahiuyon sa kabubut-on ni Jehova, maong iyang gibadlong si Pedro. (Mar. 8:​31-33) Ug bisan adtong namatay na si Jesus, wala gihapon masabti sa iyang mga tinun-an ang mga hitabo. Bisan pa ana, padayon silang gitabangan ni Jesus. Human siya mabanhaw, “iyang gipatin-aw pag-ayo [kanila] ang Balaang Kasulatan” aron matul-id ang ilang sayop nga panglantaw bahin sa iyang pag-antos. (Luc. 24:​25-27, 32, 44-48) Pinaagi sa pagpamalandong sa mga gitudlo ni Jesus kanila, maandam sila sa mga pagsupak nga hapit na nilang atubangon ingong mga sumusunod ni Jesus. Sa susama, importante pod nga pamalandongon nato ang mga kamatuoran sa Bibliya nga makatabang natong maandam sa mga kalisdanan.

12. Unsay posible natong bation kon sayop ang atong panglantaw sa usa ka situwasyon?

¹² Kon sayop ang atong panglantaw sa usa ka situwasyon, basin malahi nato nig sabot. Pananglitan, tagda ang ilustrasyon ni Jesus bahin niadtong mga tawo nga nagtrabaho sa ubasan. Ang uban nila mireklamo kay dili daw patas ang gihatag nga suhol, pero giingnan sa agalon ang usa nila: “Higala, wala koy nabuhat nga sayop kanimo.” (Mat. 20:​10-13) Ang tinuod, wala gyoy nahitabo nga inhustisya; dili lang gyod sakto ang gidahom sa maong mga trabahante. Karon, naa pod tingali mga alagad ni Jehova nga mobati ana—pananglitan, dihang dili nila madawat ang pribilehiyo nga gusto nila o dihang kinahanglan nilang buhian ang usa ka pribilehiyo. Unsay makatabang nato aron makabaton ta ug hustong panglantaw bisan sa lisod nga mga situwasyon?

KON UNSAY ATONG MAHIMO DIHANG MAKAATUBANG TAG LISOD NGA MGA SITUWASYON

13. Unsa kahay posible natong bation kon kita na mismo ang makaatubang ug kalisdanan?

¹³ Ingong alagad ni Jehova, nahibalo ka sa giingon sa Bibliya bahin sa mga pag-antos karon. Imo pa gani ning ginasangyaw sa uban aron tabangan sila nga makaya ang ilang mga problema. Pero kon ikaw na ang makaeksperyensiyag mga problema, basin dili na balanse ang imong panglantaw sa imong situwasyon. Pananglitan, basin mobati ka nga gisilotan ka ni Jehova o nga wala siya maminaw sa imong mga pag-ampo. Unsay makatabang nimo aron dili ka madaog sa maong panghunahuna?

14. Unsay puwede natong iampo kon naa ta sa lisod nga kahimtang? (Filipos 4:13)

¹⁴ Hangyoa ang tabang ni Jehova. Sultihi si Jehova sa imong ginaatubang ug kon nganong nabug-atan ka sa maong problema. Puwede pa gani nimong hangyoon si Jehova nga tabangan ka sa espesipikong paagi. Pangayoa pod ang iyang balaang espiritu aron mahatagan ka sa kusog ug kaalam nga imong gikinahanglan. Pero hinumdomi nga ang tubag ni Jehova sa imong pag-ampo basin lahi sa imong gidahom. (Efe. 3:20) Hinumdomi pod nga puwede niyang gamiton ang mga anghel o mga igsoon sa pagtabang nimo. (Sal. 34:7) Maong kinahanglang abtik tang magmatikod kon giunsa ta niya pagtabang, ug mapasalamaton nato ning dawaton. Ihatag gyod niya ang iyang balaang espiritu, nga makatabang nimong maatubang ang bisan unsang problema.—Basaha ang Filipos 4:13.

15. Unsay makatabang nimo nga makaya ang mga kalisdanan? (Tan-awa sab ang hulagway.)

¹⁵ Ipadayon ang imong espirituwal nga rutina. Kon naa ka sa “kasakit ug kalisdanan,” wala tingali kay gana nga mohimo sa imong espirituwal nga rutina. (Sal. 119:143) Pero mao nay panahon nga mas kinahanglan nimo ning himoon. Angay nimong pun-on ang imong hunahuna sa panghunahuna ni Jehova. Busa ipadayon ang imong pagbasa sa Bibliya kada adlaw, pamalandonga ni, ug pag-research bahin ani. Paningkamoti nga makasangyaw gihapon ka, ayawg hunong sa pagtambong sa mga tigom, ug himoang tumong nga makakomento. Importante pod nga makig-uban ka sa mga igsoon imbes ipalain ang imong kaugalingon.—Prov. 18:1.

16. Kon motungha ang mga problema, unsang mga pagduhaduha ang posible natong mahunahunaan, ug unsay atong himoon aron mawala ni? (2 Corinto 10:​4, 5)

¹⁶ Sukli ang imong mga pagduhaduha. Kon makaatubang kag mga kalisdanan, magduhaduha tingali ka sa imong kaugalingon o kang Jehova. Pero ayawg padaog ani, kay kini nga mga pagduhaduha samag “lig-ong naparilan nga mga butang” nga kinahanglan nimong lumpagon. (Basaha ang 2 Corinto 10:​4, 5.) Mahimo nimo na pinaagi sa pagsusi sa “kahibalo sa Diyos” nga naa sa Bibliya ug sa atong mga publikasyon. Pananglitan, nagduhaduha ba ka kon giuyonan gihapon ka ni Jehova? Kon mao, tun-i ang mga eksperyensiya ni apostol Pablo. Bisag dasig kaayo siya sa ministeryo, nakaeksperyensiya gihapon siyag mga kalisdanan. Pero imbes nga maluya, mas nakapalig-on ni sa iyang pagsalig nga giuyonan siya ni Jehova ug ni Jesus. (2 Cor. 11:​23-27) Nagduhaduha ba ka kon gipasaylo na ba gyod ka ni Jehova sa mga sala nga imong nahimo kaniadto? Kon mao, pagsulat ug mga teksto nga magpasalig nimo nga mopasaylo gyod si Jehova. (Isa. 43:25) Dayon basaha ug pamalandonga ang maong mga teksto. (Sal. 119:97) Nakaagi ba kag trahedya nga tungod ana nakapangutana ka kon protektahan ba gyod ni Jehova ang iyang matinumanong mga alagad? Kon mao, pag-research bahin sa kon nganong gitugotan sa Diyos ang pag-antos ug kon sa unsang paagi siya nanalipod nato sa espirituwal. (Sal. 91:​9-12) Basaha pod ang eksperyensiya sa mga igsoon nga nakasinatig mga trahedya pero nakapadayon gihapon sa ilang malipayong pag-alagad kang Jehova.a

17. Unsay angay natong himoon kon makasinati tag mga kalisdanan?

¹⁷ Malipayon ba ka sa imong kinabuhi karon ug wala ray seryosong mga problema? Kon mao, pasalamati si Jehova ug ipakita ang imong apresasyon sa iyang pagkamaayo. (Eccl. 7:14) Pero kon motungha ang mga problema, paningkamoti nga magpabiling positibo ug ayawg wad-a ang imong pagsalig kang Jehova. Kon imo ning himoon, si Jehova “magtaganag kalingkawasan aron makalahutay [ka] niini.” (1 Cor. 10:13) Sa laing bahin, kon ang atong mga igsoon makaatubang ug kalisdanan, unsaon nato sila pagtabang? Ato nang hisgotan sa sunod nga artikulo.