“Ang Diyos sa Kamatuoran” Kanunayng Motuman sa Iyang mga Saad

1. Bisag daghang tawo karon ang dili kasaligan, nganong makasalig gyod ta kang Jehova? (Salmo 31:​2-5)

NAGPUYO ta sa kalibotan nga gimandoan ni Satanas diin komon kaayo ang pagpamakak, pagpangilad, ug pagtraydor. Pananglitan, ang ubang negosyante manikas sa ilang mga kakompetensiya. Ang uban pod mangilad bahin sa ilang produkto aron lang mahalinan sila. Ug usahay, bisan gani ang suod nga higala dili motuman sa iyang saad. Tungod ana, malisdan tingali ta kon kang kinsa mosalig. Pero makapalipay kaayo ang pagkahibalo nga kanunay tang makasalig kang Jehova. Siya “ang Diyos sa kamatuoran.” (Basaha ang Salmo 31:​2-5.) Dili gyod mamakak si Jehova—mao gyod ni ang iyang personalidad. Ang tanan niyang ginasulti ug ginabuhat kasaligan ug tinuod.

2. Unsay atong hisgotan niini nga artikulo?

² Niining artikuloha, atong hisgotan ang mga rason kon nganong makasalig ta kang Jehova sa tibuok natong kasingkasing. Hisgotan pod nato kon sa unsang paagi ang Diyos sa kamatuoran magtapos sa daotang kalibotan ni Satanas ug kon unsa poy Iyang ginahimo karon aron molampos ang Iyang katuyoan. Ang paghisgot ani makatabang nato nga mahimong maisogong mga Saksi ni Jehova.

KON NGANONG MAKASALIG TA SA DIYOS SA KAMATUORAN

3. Unsay usa ka rason kon nganong bug-os tang makasalig kang Jehova?

³ Makasalig ta kang Jehova kay siya ang Maglalalang. Siya ang nagbuhat sa langit ug yuta ug ang Tuboran sa kinabuhi. (Gen. 1:1; Sal. 36:9; Pin. 4:11) Dihang iyang gidisenyo ang atong planeta, giseguro niya nga matagan-an ta sa tanan natong gikinahanglan aron padayon tang mabuhi. Siya ang Labing Gamhanan ug ang naay kinalabwang awtoridad sa tibuok uniberso. Busa bug-os gyod natong isalig ang atong kinabuhi ug kaugmaon kang Jehova, ang atong maalamon kaayo ug Labing Gamhanan nga Maglalalang.

4. Nganong makaseguro ta nga gimahal gyod ta ni Jehova?

⁴ Makasalig ta kang Jehova kay gimahal gyod ta niya. Gilalang niya ang mga tawo kay gusto niya nga maeksperyensiyahan pod nila kon unsa ka nindot mabuhi. Gisulti ni Jehova ang iyang katuyoan: “Magbuhat tag tawo sumala sa atong larawan, nga kaamgid nato.” (Gen. 1:26) Gihatagan ta niyag kagawasan sa pagpili. Gipapuyo ta niya sa nindot kaayo nga planetang yuta. (Sal. 115:16) Ug gihatagan niya ang atong unang ginikanan ug eksayting kaayo nga asaynment nga himoong paraiso ang tibuok yuta. (Gen. 1:28; 2:15) Gitagan-an niya sila sa tanan nilang gikinahanglan aron mag-enjoy sa kinabuhi. Kining tanan nagpakita nga “ang maunongong gugma ni Jehova maoy hangtod sa hangtod.”—Sal. 103:17.

5. (a) Giunsa pagtuman ni Jehova ang iyang katuyoan bisan pa sa paningkamot sa Yawa nga mapakyas ni? (b) Paghatag ug pipila ka pananglitan sa mga saad sa Diyos nga iyang gituman. (Tan-awa ang kahong “Mga Saad sa Diyos nga Natuman Na.”)

⁵ Makasalig ta kang Jehova kay kanunay siyang motuman sa iyang mga saad. Si Jehova wala maghimo sa yuta “sa wala lamay kapuslanan, apan nag-umol niini aron puy-an.” (Isa. 45:​18, 19) Dihang mirebelde si Adan ug Eva, gisentensiyahan sila sa Diyos ug kamatayon. Busa morag milampos si Satanas sa pagpakyas sa katuyoan sa Diyos. Pero si Jehova kanunay gyong motuman sa iyang mga saad. (Isa. 46:​10, 11) Wala niya usba ang iyang katuyoan nga pun-on ang yuta ug matarong nga mga tawo. Maong gitugotan gihapon ni Jehova si Adan ug Eva nga manganak. Ug iyang gihatag ang iyang bugtong Anak ingong lukat aron luwason ang mga kaliwat ni Adan ug hatagan silag nindot nga paglaom nga mabuhi hangtod sa hangtod.—Juan 3:16.

ANG DIYOS SA KAMATUORAN PADAYONG NAGTUMAN SA IYANG KATUYOAN

6. Unsay gitagna ni Jehova human sa nahitabong pagrebelde didto sa Eden?

⁶ Ang nagtental kang Adan ug Eva nga morebelde sa Diyos mao “ang orihinal nga halas, ang gitawag ug Yawa ug Satanas.”a (Pin. 12:9; Gen. 3:​4, 5; Juan 8:44) Tungod ana, si Jehova nagtagna ug paghukom kang Satanas—nga sa ngadtongadto siya laglagon. (Gen. 3:15) Sa dili pa na mahitabo, daghan ang mosubay sa daotang dalan ni Satanas ug mosundog kaniya. Pero naa poy modapig ug mounong kang Jehova.

7. Kinsay apil sa kaliwat sa Yawa, ug unsa unyay ilang padulngan?

⁷ Misunod kang Satanas ang rebelyosong mga anghel ug mga tawo. Kay supak man sila sa katuyoan sa Diyos, apil sila sa kaliwat ni Satanas. Pero sa gitakdang panahon sa Diyos, si Satanas ug ang tanan niyang sakop laglagon.—Dan. 2:44; Roma 16:20.

8. Unsay gihimo ni Jesus niadtong 1914? (Tan-awa sab ang mga hulagway.)

⁸ Nganong makaseguro ta nga matuman gyod ang katuyoan sa Diyos nga laglagon si Satanas ug ang iyang daotang mga sakop? Niadtong 1914, nakiggubat si Jesus kang Satanas nga Yawa ug sa mga demonyo, ug gitambog niya sila dinhi sa yuta. (Pin. 12:​7-9) Bisag didto sa langit nahitabo ang maong gubat, dako nig epekto sa mga tawo dinhi sa yuta. Ang Bibliya nag-ingon: “Alaot ang yuta ug ang dagat, kay ang Yawa nanaog kaninyo, nga may dakong kasuko, kay nahibalo siya nga mubo na lang ang iyang panahon.” (Pin. 12:12) Sukad niadtong 1914, si Satanas nagpahungaw sa iyang kasuko dinhi sa yuta, maong misamot ug ka lisod ang atong kahimtang dinhi. Makaingon gyod ta nga “alaot ang yuta”! Pero nahibalo ta nga hapit nang “bug-oson [ni Jesus] ang iyang pagpangdaog” ug malaglag na si Satanas ug ang tanan niyang sakop. (Pin. 6:2) Nianang panahona, hinloan ni Jesus ang ngalan ni Jehova gikan sa tanang pasipala. (Sal. 45:​4-6) Ang tanan mahibalo na unya nga si Jehova ang Diyos sa kamatuoran.—Ezeq. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

GINATIGOM SA DIYOS SA KAMATUORAN ANG TANANG NAHIGUGMA SA KAMATUORAN

9. Kinsay ginatigom ni Jehova karon?

⁹ Ginatigom ni Jehova karon “ang tanang butang diha sa Kristo, ang mga butang sa langit ug ang mga butang sa yuta.” (Efe. 1:10) “Ang mga butang sa langit” mao ang mga dinihogan, kinsa gipili ni Jehova nga magmando uban sa Kristo didto sa langit. “Ang mga butang sa yuta” nagtumong niadtong mga tawo nga mabuhi hangtod sa hangtod sa Paraisong yuta. Kini nga mga alagad ni Jehova nagkugi sa pagyagyag sa mga bakak ni Satanas ug sa pagtabang sa sinserong mga tawo nga mahibalo sa kamatuoran.

10. Unsay gihimo ni Jehova aron mahibalo sa kamatuoran ang mga tawo ug mahigawas sila sa bakak nga relihiyon? (Pinadayag 14:​6, 7)

¹⁰ Gitigom ni Jehova ang mga tawo nga nahigugma sa kamatuoran pinaagi sa pag-organisar ug dako kaayo nga buluhaton—ang pagsangyaw sa kamatuoran sa tibuok kalibotan. (Basaha ang Pinadayag 14:​6, 7.) Bisag ang iyang mga alagad dinhi sa yuta ang iyang gigamit sa pagsangyaw sa maayong balita, mitabang pod ang mga anghel niini nga buluhaton. Kini nga pagsangyaw nagyagyag sa bakak nga mga pagtulon-an sa Bantogang Babilonya, ang tibuok kalibotang imperyo sa bakak nga relihiyon, nga maoy dugay nang gigamit sa Yawa sa pagpakaylap ug sayop nga mga ideya bahin kang Jehova. (Pin. 18:​2, 4) Sa dili madugay, laglagon na ang tanang bakak nga relihiyon, ug ang tanang nahigugma sa Diyos sa kamatuoran maghatag kaniya sa himaya nga siya lang ang takos nga modawat.—Pin. 17:16.

11. Unsay timailhan sa tinuod nga mga magsisimba ni Jehova?

¹¹ Ang mga nahigugma sa kamatuoran naggikan sa lainlaing nasod, kultura, ug kahimtang sa kinabuhi. (Pin. 7:​9, 10) Dihang nadunggan nila ang “maayong balita,” nasabtan nila nga mao gyod ni ang kamatuoran ug midesisyon sila nga mahimong bahin sa katawhan ni Jehova. (Mar. 13:10) Karon, mas naklaro na gyod kon kinsay mga nagsimba sa Diyos sa hustong paagi ug kon kinsay wala. Mao ni ang gitagna ni propetang Malaquias: “Makita ninyo pag-usab ang kalainan tali sa tawong matarong ug sa tawong daotan, tali sa nag-alagad sa Diyos ug sa wala mag-alagad kaniya.” (Mal. 3:18) Pinaagi sa ilang maayong binuhatan ug sa ilang madasigong pagsangyaw, gipakita sa mga alagad ni Jehova nga sila ang nagsimba sa Diyos sa kamatuoran.

12. Sa unsang paagi ang buluhatong pagsangyaw nakatabang sa pagtuman sa katuyoan ni Jehova?

¹² Dihang mosangyaw ta sa “maayong balita sa Gingharian,” dili lang kay basta nagsunod ta sa sugo ni Jesus, kondili nagtuman pod ta sa tagna sa Bibliya. (Mat. 24:14; 28:​18-20) Tungod sa atong pagsangyaw, daghang tawo sa tibuok kalibotan ang nahimong tinun-an sa Kristo ug nahatagag kahigayonan nga makasimba sa Diyos sa kamatuoran hangtod sa hangtod. Dako gyong pribilehiyo nga makatabang ta sa pagtuman sa katuyoan ni Jehova!

SALIG NGA TUMANON NI JEHOVA ANG TANAN NIYANG SAAD

13. Kinsay gipuntirya ni Satanas, ug ngano?

¹³ Si Satanas nga Yawa suko kaayo kay nahibalo siya nga “mubo na lang ang iyang panahon” ug hapit nang laglagon ang iyang daotang kalibotan. (Pin. 12:​12, 13) Tungod ana, ilabinang gipuntirya ni Satanas ang mga dinihogan, “kinsa nagtuman sa mga sugo sa Diyos ug may buluhaton sa pagpamatuod bahin kang Jesus.” (Pin. 12:17; 14:12) Gipuntirya pod niya ang tanang nagsuportar sa mga dinihogan ug sa buluhaton nga ilang ginahimo.

14. Unsay mahitabo dihang atakehon na ni Satanas ang katawhan ni Jehova? (Tan-awa sab ang hulagway.)

¹⁴ Human sa kalaglagan sa Bantogang Babilonya, atakehon sa kalibotan ni Satanas ang katawhan ni Jehova. Kini nga todotodong pag-atake moresulta sa gubat sa Armagedon. (Pin. 16:​13, 14, 16) Nianang panahona, luwason ni Jesus ug sa iyang langitnong kasundalohan ang katawhan ni Jehova ug laglagon ang nahibiling bahin sa kalibotan ni Satanas. (Pin. 19:​19-21) Mawala na unya ang tanang bakakon, mangingilad, ug daotang mga tawo. (Pin. 21:8) Mapamatud-an na gyod nga tinuod ang tanang gisulti ni Jehova ug nga husto ang tanan niyang ginahimo.

15. Nganong makasalig ta nga matuman gyod ang mga saad ni Jehova sa umaabot? (Isaias 65:​16, 17) (Tan-awa sab ang hulagway.)

¹⁵ Karon, misamot ka gubot ang kalibotan ni Satanas. Pero sa tabang ni Jehova, kita nga iyang mga alagad pabiling nagkahiusa. Si Jehova padayong nagatigom sa mga tawo nga nahigugma sa kamatuoran. Walay makapugong niya sa pagpanalangin sa iyang katawhan ug sa buluhaton nga ilang ginahimo. (Basaha ang Isaias 65:​16, 17.) Makalaom ta nga matuman gyod ang tanang saad ni Jehova sa umaabot. Ang giingon ni apostol Pablo sa Roma 8:​38, 39 nagpasalig nato: “Ang kamatayon o kinabuhi o mga anghel o mga gobyerno o mga butang nga nia karon o mga butang nga moabot o mga gahom o gihabogon o giladmon o bisan unsang ubang linalang dili makabulag nato gikan sa gugma sa Diyos nga naa kang Kristo Jesus nga atong Ginoo.”

16. Nganong bug-os ang imong pagsalig kang Jehova?

¹⁶ Daghan tag rason nga mosalig kang Jehova, ang Diyos sa kamatuoran. Siya ang atong Maglalalang, gimahal ta niya pag-ayo, ug padayon niyang ginatigom ang dakong panon gikan sa lainlaing bahin sa kalibotan aron magkahiusa sila sa pagsimba kaniya. (Isa. 60:22; Zac. 8:23) Kombinsido ta nga tumanon gyod ni Jehova ang iyang katuyoan ug nga hapit na niyang laglagon si Satanas, apil na ang iyang daotan ug malinglahong kalibotan. Parehas tag gibati ni Haring David, kinsa miampo: “Madayeg unta si Jehova nga Diyos . . . Siya lamang ang nagbuhat ug katingalahang mga butang. Madayeg unta ang iyang mahimayaong ngalan hangtod sa hangtod, ug hinaot ang tibuok yuta mapuno sa iyang himaya.”—Sal. 72:​18, 19.