Gibansay Ko ni Jehova Sukad pa sa Akong Pagkabatan-on

Pero balikan ra nato ning estoryaha unya. Hisgotan usa nako ang unang mga bahin sa akong kinabuhi. Natawo ko panahon sa Gubat sa Kalibotan II sa Calgary, Canada. Sa hinapos sa 1940’s, nakasangyaw sa amoa ang batan-ong payunir nga si Donald Fraser, ug nagpa-Bible study si Mama. Gimahal kaayo ni Mama ang kamatuoran. Pero kay daghan man siyag problema sa panglawas, dili kaayo siya makatambong sa mga tigom. Bisan pa ana, miuswag siya sa espirituwal ug nagpabawtismo niadtong 1950. Pero makapaguol kay wala ra abtig duha ka tuig, namatay si Mama. Dili pa Saksi si Papa adtong panahona, pero misugot siya nga naay brader nga mopakigpulong panahon sa lubong.

Pipila ka adlaw human sa lubong ni Mama, nakig-estorya nako ang tigulang nga dinihogang sister nga si Alice. Giimbitar ko niya nga motambong sa tigom. Nakaila siya nako kay niadtong kaya pa ni Mama nga motambong sa weekend nga mga tigom, mouban ko niya. Nananghid ko kang Papa kon okey ra ba nga moadto ko. Misugot siya ug miingon nga mouban lang pod siyag “kausa” aron igo lang magpasalamat sa brader nga mihatag ug pakigpulong sa lubong ni Mama. Mao to ang pinakaunang higayon nga mitambong si Papa ug tigom. Adtong gabhiona, dihay Teokratikanhong Tunghaan sa Ministeryoa ug Tigom sa Pag-alagad. Nakadayeg kaayo si Papa sa gihatag nga mga bahin ug mga pakigpulong kay nakaeskuwela man god siyag public speaking. Tungod adto, tigtambongan na si Papa ug midweek nga mga tigom. Ug sa ngadtongadto, tigtambongan na pod siya sa ubang mga tigom.

Niadtong mga panahona, sugdan sa alagad sa Teokratikanhong Tunghaan sa Ministeryo ang tigom pinaagi sa pagtawag sa ngalan sa mga igsoon nga naenrol, ug ang kada usa nila motubag ug, “Present.” Usa ka gabii, mihangyo ko nga apilon pod ug tawag ang akong ngalan sa sunod nga tigom. Gikomendahan kaayo ko sa brader, pero wala ko niya pangutan-a kon nahibalo ba kog para unsa to.

Gusto ra man unta nako nga basahon ug kusog ang akong ngalan, pero naunsa ba diay nga tabla ra man diay tog nagpaenrol ko sa tunghaan! Pagkasunod semana, gitawag gyod ang akong ngalan ug eksayted kaayo kong mitubag ug, “Present.” Paghuman sa tigom, gikomendahan ko sa daghang igsoon. Ug paglabay sa daghang semana, gihatagan ko sa akong pakigpulong nga asaynment, kadtong gihisgotan nako ganina.

Puwerte nakong kulbaa! Adtong panahona, wala pa man goy bahin nga pagbasa ug Bibliya, maong pakigpulong gyod ang andamon. Ug dili pa gyod to lalim kay unom ngadto sa otso minutos ang gitas-on sa pakigpulong. Pero maayo na lang kay gitabangan ko ni Papa sa akong bahin, ug ika-20 gani mi nagbalikbalik ug praktis! Human adto, gitambagan ko sa akong pakigpulong ug dako kaayo tog tabang nako. Sulod sa taas nga panahon, si Jehova padayong nagbansay nako pinaagi kang Papa, sa hamtong nga mga igsoon, ug sa Iyang organisasyon.

PADAYON KONG GIBANSAY

Si Alice, kadtong sister nga gihisgotan nako ganina, maoy nagbansay nako sa pagsangyaw. Niadtong panahona, gidasig ang mga igsoon nga mobasag tulo ka teksto sa tagbalay, ug dayon motanyag ug libro. Dihang manangyaw na mi ni Alice, siya una ang magpailaila sa iyang kaugalingon ug makig-estorya sa tagbalay. Dayon iya kong hangyoon nga mobasa sa unang teksto. Human ana, ako nay mopadayon ug estorya. Akong basahon ang ikaduha ug ang ikatulo nga teksto, dayon motanyag kog publikasyon. Sa ngadtongadto, kamao na kong mosugod ug panag-estorya. Human mabawtismohi si Papa niadtong 1954, siya nay nagpadayog bansay nako sa pagsangyaw. Bisag biyudo na si Papa ug siya ray nag-atiman nako, naningkamot gyod siya nga mapadako ko sa kamatuoran. Importante kaayo para niya ang espirituwal nga mga kalihokan. Iya kong gianad nga motambong gyod sa mga tigom ug mosangyaw kada Sabado ug Dominggo sa buntag.

Tipikal ra ko nga estudyante, pero ang akong mga nakat-onan sa akong 12 ka tuig nga pag-eskuwela dako kaayog tabang nako. Pananglitan, natudloan ko sa English grammar ug sa Math. Ang ako pong nakat-onan sa mga English course ug sa creative writing dako kaayog tabang sa akong asaynment karon sa Writing Department.

Daghan ang nangutana kon nganong ganahan kaayo kog musika. Ang tinuod, nakuha nako ni nga hilig kang Mama ug Papa. Niadtong siyete anyos pa ko, nag-piano lesson ko, pero giingnan sa akong teacher si Papa nga paundangon na lang ko kay dili daw kaayo ko kamao ani. Nakasabot ra pod ko kon nganong nakaingon ang akong teacher adto—wala pa man god kaayo koy gana mokat-on adtong panahona.

Paglabayg pipila ka bulan, nakakita ra si Papa ug laing teacher. Maong nag-piano ug nag-voice lesson ko, ug nakita nako nga naa diay koy talent aning duha. Bisag bata pa ko, nindot na kog tingog ug nakadaog kog mga contest. Gusto kong mag-music teacher aron naa koy ikasuportar sa akong kaugalingon kon magpayunir na ko. Busa mieskuwela kog music, pero dihang hapit na kong mo-graduate, naamgohan nako nga morag mahurot ang akong panahon sa sigeg tuon para sa mga eksam bahin sa harmony, music history, ug composition. Busa miundang kog eskuwela ug nagregular payunir ko niadtong 1963.

ANG PAGPAYUNIR NAKAHATAG NAKOG DAKONG KALIPAY

Human sa akong usa ka tuig nga pagpayunir, giasayn ko ingong espesyal payunir sa Kapuskasing, Ontario. Ang akong partner, si Daniel Skinner, maguwang kaayo nako. Daghan siyag gitudlo nako bahin sa mga kahikayan diha sa kongregasyon. Nahimo kong bahin sa Komite sa Pag-alagad sa Kongregasyon sa edad lang nga 20, maong daghan pa kaayo kog angayng makat-onan. Nalipay ko nga ang organisasyon nagpokus gihapon karon sa pagbansay sa batan-ong mga brader. Kon kini nga mga brader maningkamot nga mouswag, gamiton gyod sila ni Jehova.

Dili lalim didto sa Kapuskasing. Tugnaw kaayo didto kon winter kay moabot nig -44°C, ug kon “moinit-init” man gamay, -33°C ra lagi pod gihapon! Kasagaran, baktason ra namo ni Dan ang among teritoryo. Pero malipayon kaayo ko sa akong asaynment, ilabina nga didto nako nailaila si Sister Linda Cole, nga karon nahimo nang Linda Splane.

Dasig kaayo si Linda; daghan siyag balikduaw. Mahinatagon siya, buotan, ug lingaw ikauban. Ang iyang mama, si Goldie, matinumanon pod nga sister. Ang iyang amahan, si Allen, supak sa kamatuoran. Pero bisan pa ana, pirme gihapong iuban ni Goldie sa tigom si Linda ug ang iyang mga igsoon, si John ug Gordon, ug kuyogon pod niya sila sa pagsangyaw. Dasig kaayo ang ilang pamilya. Diha gani toy higayon nga halos nagkadungandungan ug payunir silang Goldie, Linda, John, ug Gordon. Makapalipay kay sa ngadtongadto, na-Saksi si Allen, ug dasig kaayo siya sa pag-alagad.

Pagka-1965, nakadawat kog dugang pagbansay dihang giimbitar ko nga moeskuwelag usa ka bulan sa Kingdom Ministry School didto sa Canada Bethel. Samtang nag-eskuwela ko didto, gipa-apply kog Gilead. Wala gyod ko sukad maghunahuna nga magmisyonaryo kay morag layo ra man kaayo ni sa tinuod. Pero bisan pa ana, mi-apply gihapon ko, ug makapalipay kay nadawat ko sa ika-42 nga klase. Sa Gilead, pirme ming makadawat ug progress report gikan sa among mga instruktor. Sa unang progress report nga akong nadawat, gitambagan ko nga magtuon pa gyod ug dugang bahin sa atong organisasyon. Haom kaayo to nga tambag para nako nga 21 anyos pa adtong panahona.

Gitudloan pod mi sa Gilead kon unsay angayng himoon dihang moatubang sa media: sa mga estasyon sa radyo ug TV ug sa mga newspaper. Ganahan kaayo ko sa among mga gihisgotan. Wala ko magdahom nga ang akong mga nakat-onan bahin adto dakog tabang nako sa umaabot. Estoryahan ta mo ani unya.

GIASAYN SA SENEGAL

Pipila ka adlaw human sa among graduation, ako ug ang akong missionary partner nga si Michael Höhle paingon na sa among asaynment didto sa Senegal, Africa. Niadtong panahona, diha pa lay 100 ka Saksi sa maong nasod.

Wala ra abtig usa ka tuig, gidapit ko nga moreport sa sangang buhatan usa ka adlaw kada semana. Dili ra kaayo ingon ana ka dako ang sangang buhatan; usa ra ni ka kuwarto diha sa missionary home. Dili ko malimot sa gisulti sa branch servant nga si Emmanuel Paterakis nga bisag simple ug gamay ra ang sangang buhatan, nagrepresentar gihapon ni sa organisasyon ni Jehova. Dihay higayon nga miingon si Brader Paterakis nga maghimo mig sulat para dasigon ang mga misyonaryo. Niadtong panahona, lisod ug mahal kaayo kon among ipa-duplicate ang mga sulat, maong amo gyod ning gitagsatagsa ug type diha sa typewriter. Dili gyod to lalim, ilabina nga kinahanglang walay sayop ang among i-type!

Dihang mouliay na ko sa among missionary home nianang gabhiona, gitunolan ko ni Brader Paterakis ug envelope. Siya miingon, “David, naay sulat ang Society para nimo.” Dihang giablihan nako ang envelope, naa didto ang usa sa mga sulat nga ako mismo ang nag-type! Kadto nga hitabo nagtudlo nako nga gamay man o dako ang usa ka sangang buhatan, himoon nako ang akong pinakamaayo kay nagrepresentar gihapon ni sa organisasyon ni Jehova.

Nasuod ko sa mga igsoon sa kongregasyon, ug halos kada Sabado sa gabii mi magtapoktapok. Lingawa lagi adto! Hangtod karon, magkontakay gihapon mi nila. Dako pod kaayog tabang nako nga nakakat-on kog French didto kay nagamit ni nako hangtod karon, ilabina dihang mobisita kog mga sangang buhatan nga naggamit ani nga pinulongan.

Pagka-1968, nakadesisyon mi ni Linda nga magminyo. Gusto ming magpayunir ni Linda sa Senegal, maong nangita kog part-time nga trabaho. Pero naabtan kog daghang bulan pinangitag trabaho kay ang mga tawo didto dili modawat ug langyaw nga mga trabahante. Sa ngadtongadto mibalik ko sa Canada, nagminyo mi ni Linda, ug nakadawat mig asaynment ingong espesyal payunir sa Edmundston, New Brunswick, usa ka gamayng siyudad duol sa Quebec.

PAGPAYUNIR SA NEW BRUNSWICK UG SA QUEBEC

Niadtong panahona, wala pay Saksi sa New Brunswick, ug gamay ra mig Bible study. Kasagaran sa mga tawo didto Katoliko. Halos kada balay naay gibutang nga sign nga “Gidili ang mga Saksi ni Jehova.” Kaniadto, wala ray bale namo kon naa bay ingon adto nga sign ang balay o wala, maong manuktok gyod gihapon mi sa ilang mga balay aron mosangyaw. Dili pod sayon ang among kahimtang didto. Kada semana, naay mabasa diha sa newspaper nga: “Atong pangitaon ug patagamon ang mga Saksi ni Jehova!” Usa ka organisasyon sa Katoliko ang nagpabutang adto sa newspaper. Upat ra mi ka Saksi didto—si Victor ug Velda Norberg, unya ako ug si Linda. Busa nahibalo mi nga kami gyod ang ilang gitumong!

Dili nako malimtan ang pinakaunang pagbisita sa among tigdumala sa sirkito. Human sa usa ka semana nga nag-uban mi, miingon siya, “Basta matabangan lang ninyo ang mga tawo dinhi nga mausab ang ilang hunahuna bahin sa mga Saksi, okey na kaayo na.” Mao na ni ang gihimo namong tumong sukad adto, ug maayo gyod nig resulta. Anam-anam nga nakita sa mga tawo kon unsa ka lahi ang mapainubsanong mga Saksi ni Jehova kon ikompara sa mapahitas-ong mga lider sa Katoliko. Karon, naa nay gamay nga kongregasyon sa maong siyudad.

Mga usa ka tuig mi sa maong asaynment, dayon gidapit mi nga mobalhin sa usa ka dako nga kongregasyon sa Quebec City. Unom ka bulan mi didto kauban sa maabiabihon nga mga igsoon, ayha mi gidapit nga mag-alagad sa sirkitong buluhaton.

Sulod sa 14 ka tuig, nag-alagad mi sa lainlaing sirkito sa Quebec. Makapalipay kaayo to! Paspas kaayo ang pag-uswag sa Quebec. Tungod sa kapaspas ani, dili na ka matingala nga bisag sa usa lang ka kongregasyon, daghang pamilya ang nagpa-Bible study ug gusto mahimong Saksi.

KUGIHANG MGA IGSOON NGA DILI NAMO MALIMTAN

Nasuod dayon mi sa mga igsoon didto kay dali ra silang ikasabot, malipayon, ug lingaw ikauban. Pero dili pod lalim ang ilang mga naagian aron ma-Saksi kay ang uban nila nakaeksperyensiyag grabeng pagsupak sa ilang pamilya. Dihay mga batan-on nga giingnan sa ilang dili Saksi nga mga ginikanan, “Kon mag-Saksi gani ka, wala na kay balay nga ulian!” Bisan pa ana, daghan nila ang padayong nag-alagad ug wala magpadala sa presyur. Seguradong proud kaayo si Jehova nila!

Siyempre, dili pod nako malimtan ang kugihan nga mga regular ug espesyal payunir nga nag-alagad sa Quebec niadtong mga tuiga. Kasagaran nila gikan sa lainlaing bahin sa Canada. Gawas nga kinahanglan silang magkat-on ug French, kinahanglan pod silang mapamilyar sa kultura ug paagi sa paghunahuna sa mga tawo didto, nga kasagaran naimpluwensiyahan sa Katoliko nga relihiyon.

Ang mga espesyal payunir sagad iasayn sa mga lugar nga wala pay Saksi. Pero maglisod sila sa pagpangitag kapuy-an ug part-time nga trabaho, kay ang mga tawo didto dili man ganahan sa mga Saksi. Tungod ani, dili nila halos makaya ang kadako sa mga galastohan kon silasila ra, maong mag-ipon tawon silag puyo sa usa ka balay aron lang makadaginot—usahay tag-upat, tag-unom, o tagwalo, apil gani bisan ang mga bag-ong minyo. Kugihan kaayo ni nga mga payunir. Kon naa silay masugdan ug Bible study, paningkamotan gyod nila nga matabangan ni nga mouswag. Karon nga daghan nag Saksi sa Quebec, ang maong mga payunir kasagaran namalhin na sa mga lugar diin naay mas dakong panginahanglan.

Dihang mobisita mig mga kongregasyon sa among sirkito, sagad makigpartner mi sa mga batan-on dihang magsangyaw sa Sabado sa buntag. Tungod ani, amo silang maestorya ug mahibaloan namo kon unsay ilang mga giatubang. Ang uban ani nga mga batan-on naa na karon sa laing nasod ingong misyonaryo o sa ubang pribilehiyo sa pag-alagad.

Niadtong mga panahona, naay mga kongregasyon nga dili maka-reimburse sa among mga nagasto sa pagbiyahe, maong usahay mahutdan na mig kuwarta inigkataposan sa bulan. Niini nga mga kahimtang, bug-os ming mosalig kang Jehova kay siya ang mas nahibalo kon unsay among gikinahanglan. Ug tuod man, wala gyod mi niya pasagdi. Matingala gani mi kay makabisita ra gyod baya gihapon mi sa sunod nga mga kongregasyon.

ANG AKONG MGA NAKAT-ONAN GIKAN SA MATINUMANONG MGA IGSOON

Gihisgotan nako ganina nga dako kaayog tabang ang akong mga nakat-onan sa Gilead bahin sa kon unsaon pag-atubang sa media. Sa una didto sa Quebec, daghan mig kahigayonan nga makasangyaw pinaagig radyo, TV, o newspaper. Sagad kauban nako si Léonce Crépeault, usa pod ka tigdumala sa sirkito nga eksperyensiyado sa pag-atubang sa media. Dihang makig-estorya siya sa dagkong mga tawo diha sa news industry, dili niya ipakita nga morag propesyonal siya ug daghan kaayog nahibaloan. Hinuon, moingon siya: “Sir, mga ministro ra mi. Wala kaayo mi hanaw bahin sa media. Pero giasayn mi nga pahibaloon ang mga tawo nga naay himoong dakong kombensiyon ang mga Saksi ni Jehova. Malipay unta mi Sir sa bisan unsang tabang nga inyong ikahatag namo.” Okey pod baya ang iyang birada! Tungod sa iyang pagkamapainubsanon, daghan diha sa media ang andam motabang namo.

Sa ngadtongadto, nakauban nakog trabaho si Brader Glen How, usa sa atong mga abogado. Ang among asaynment nagpokus sa sensitibong mga kaso nga posibleng makakuhag atensiyon sa media. Dako kaayog tabang nako ang pagbansay didto sa Gilead ug ang mga nakat-onan nako kang Léonce. Pribilehiyo gyod nga makauban ug trabaho si Brader How. Di gyod siya mahadlok moatubang sa korte, pero mahinadlokon siya sa Diyos. Ug labaw sa tanan, lawom siyag gugma kang Jehova.

Pagka-1985, giasayn mig sirkito nga duol sa gipuy-an sa akong papa sa western Canada. Tungod ana, nakatabangtabang mi sa pag-atiman niya. Pero makapaguol kay namatay si Papa paglabayg tulo ka bulan. Human adto, nagpadayon mig alagad sa mga sirkito sa western Canada hangtod 1989, ug sa wala damha, nakadawat mig imbitasyon nga moalagad sa Bethel sa United States. Sa ato pa, biyaan na namo ang sirkitong buluhaton, diin malipayon ming nag-alagad sulod sa halos 19 ka tuig. Sa daghang tuig namo sa maong asaynment, daghan kaayo mig balay nga nasak-an ug mga igsoon nga nakauban sa pagpangaon. Mapasalamaton kaayo mi sa tanang igsoon nga nag-abiabi pag-ayo namo.

PAGBALHIN SA UNITED STATES

Pag-abot namo sa Brooklyn, giasayn ko sa Service Department. Nalipay kaayo ko sa mga pagbansay nga akong nadawat didto. Ang usa sa mga leksiyon nga akong nakat-onan mao nga kinahanglang seguroon nako nga nahibalo ko sa tanang detalye sa dili pa mohimog usa ka butang. Dayon pagka-1998, giasayn ko sa Writing Department, diin padayon gihapon kong gibansay hangtod karon. Sa daghang tuig, nakapribilehiyo ko nga makatabang kang Brader John Barr sa iyang responsibilidad ingong koordinetor sa Komite sa Pagpanulat niadtong panahona. Di gyod nako malimtan ang mga pagbansay nga akong nadawat niya ug ang mga panahon nga nagkauban mi. Maayo kaayo to siya nga brader.

Nalipay gyod ko nga makauban sa trabaho ang mapainubsanong mga igsoon nga naa sa Writing Department. Pirme silang mangayog tabang kang Jehova, ug dili sila mosalig sa ilang kaugalingong mga katakos. Nahibalo sila nga ang tanan nilang nalampos naposible lang pinaagi sa balaang espiritu ni Jehova.

Nakapribilehiyo pod mi ni Linda nga mabisita ang atong matinumanong mga igsoon diha sa 110 ka nasod. Nabati namo mismo ang gugma nga gipakita sa mga misyonaryo, mga membro sa Branch Committee, ug uban pang igsoon nga naa sa bug-os panahong pag-alagad. Panalangin pod kaayo nga makita ang kadasig sa mga igsoon nga naningkamot sa pag-una sa espirituwal nga mga butang bisan pa sa mga gubat, kalisod sa panginabuhi, ug paglutos. Seguradong gimahal kaayo sila ni Jehova.

Sulod sa daghang tuig, dako kaayog tabang si Linda nako aron molampos ko sa akong mga asaynment. Gimahal niya ang mga igsoon ug kanunay siyang mangitag paagi nga makatabang sa uban. Dali pod siyang makasugod ug impormal nga mga pagsangyaw. Daghan siyag natabangan nga makakat-on sa kamatuoran, ug nakadasig pa gani siya sa ubang dili aktibo nga mobalik sa pag-alagad. Panalangin gyod si Linda gikan kang Jehova! Samtang nagkatigulang mi, mapasalamaton mi nga naay batabatang mga brader ug sister nga kanunayng motabang namo sa praktikal nga mga paagi.—Mar. 10:​29, 30.

Dihang mamalandong ko sa mga nahitabo sa akong kinabuhi sa milabayng 80 ka tuig, mapasalamaton kaayo ko kang Jehova. Parehas mig gibati sa salmista, kinsa misulat: “Oh Diyos, gitudloan ko nimo sukad pa sa akong pagkabatan-on, ug hangtod karon padayon nakong gipahayag ang imong katingalahang mga buhat.” (Sal. 71:17) Determinado ko nga padayong magpabansay ni Jehova samtang buhi ko.