Mga Pangutana Gikan sa mga Magbabasa

Kanus-a ipahibalo sa mga nasod ang “kalinaw ug kasegurohan”?

Sa ato nang nahisgotan sa “Mga Pangutana Gikan sa mga Magbabasa” diha sa bag-o lang nga isyu sa Ang Bantayanang Torre,a hapit nang ibutang ni Jehova sa kasingkasing sa “10 ka sungay” (tanang gobyerno sa kalibotan) ang “iyang hunahuna,” nga mao ang ilang paghatag sa ilang gahom ug awtoridad sa “hayag-pula nga pintas nga mananap”—ang United Nations. Kini nga mananap gitawag pod nga “larawan sa pintas nga mananap.” (Pin. 13:​14, 15; 17:​3, 16, 17) Dayon ang “10 ka sungay” ug ang pintas nga mananap nga nahimo nang gamhanan maglaglag sa tanang bakak nga relihiyon. Ipahibalo ba sa mga nasod ang “kalinaw ug kasegurohan”b sa dili pa ang kalaglagan sa bakak nga relihiyon, o human na niana?—1 Tes. 5:3.

Ang tinuod, wala ta masayod kon kanus-a gyod ipahibalo ang “kalinaw ug kasegurohan.” Kon nahibalo pa ta sa tanang detalye, dili na unta ta kinahanglang magmabinantayon. Pero balikbalik nga gitambagan ni Jesus ang iyang mga sumusunod nga ‘magpadayon sa pagbantay.’ (Mat. 24:42; 25:13; 26:41) Busa, atong susihon ang tagna nga makita diha sa sulat ni apostol Pablo para sa mga taga-Tesalonica.

Si Pablo misulat: “Dihang sila moingon, ‘Kalinaw ug kasegurohan!’ ang kalit nga kalaglagan modangat kanila.” (1 Tes. 5:​2, 3) Bahin sa giingon ni Pablo, mao ni ang sagad nga gihisgotan sa atong mga publikasyon: Ang proklamasyon sa “kalinaw ug kasegurohan” himoon sa hapit na ang dakong kasakitan, nga magsugod dihang laglagon ang Bantogang Babilonya—ang tibuok kalibotang imperyo sa bakak nga relihiyon. Miingon pod ta nga kon mahitabo na ni nga proklamasyon, ilhanan ni nga magsugod na ang dakong kasakitan.

Pero human matun-an pag-ayo ang mga detalye niini nga tagna, naay laing nakita nga posibilidad: Ang proklamasyon sa “kalinaw ug kasegurohan” posibleng mahitabo human malaglag ang bakak nga relihiyon. Nganong makaingon ta ana? Konsideraha ang mosunod nga mga pangutana.

Unsa may kalabotan sa bakak nga relihiyon sa mga gubat sa mga nasod? Ang Bibliya nag-ingon: “Diha kaniya [nga mao ang “bantogang pampam,” o ang Bantogang Babilonya] nakaplagan ang dugo sa . . . tanang gipamatay sa yuta.” (Pin. 17:​1, 5; 18:24) Sukad pa sa una, ang bantogang pampam nagsuportar sa mga gubat sa kalibotan ug sagad maoy hinungdan sa terorismo. Busa ang bakak nga relihiyon wala gyod makahatag ug kalinaw ug kasegurohan. Hinuon, nakaamot ni sa gubat ug kapintasan. Maong makapangutana tingali ta: Posible kaha nga himoon sa mga nasod ang proklamasyon sa “kalinaw ug kasegurohan” human nila malaglag ang Bantogang Babilonya? Wala gyod ta masayod, pero posible nang mahitabo.

Unsay sunod nga mahitabo human sa proklamasyon sa “kalinaw ug kasegurohan”? Si Pablo miingon: “Ang kalit nga kalaglagan modangat kanila.” (1 Tes. 5:3) Ang study note niini nga bersikulo nag-ingon: “Ang gisulti ni Pablo dinhi nagpakita nga human sa proklamasyon sa ‘kalinaw ug kasegurohan,’ dili ra magdugay o dihadiha dayon ang kalaglagan sa mga nasod. Kalit ning mahitabo ug dili sila makaikyas.” Sa ato pa, kon himoon sa mga nasod ang proklamasyon sa “kalinaw ug kasegurohan” human nila malaglag ang bakak nga relihiyon, aw mosunod pod dayon ang kalaglagan niini nga mga nasod.

Unsa man unyay reaksiyon sa katawhan ni Jehova inigkatuman niini nga mga tagna? Si Pablo miingon: “Mga igsoon, wala mo sa kangitngit, busa dili mo makalitan nianang adlawa, dili sama sa mga kawatan nga makalitan sa kahayag sa adlaw.” (1 Tes. 5:4) Hunahunaa ni: Kon ang proklamasyon sa “kalinaw ug kasegurohan” himoon human sa kalaglagan sa bakak nga relihiyon, ang katawhan ni Jehova mahibalo na dayon nga dili na magdugay ang mga nasod kay laglagon na sila. Pero kon bahin sa mga nasod, dili gyod sila magdahom anang higayona nga mangalaglag sila. Ang ilang kalaglagan kalit nga moabot samag kawatan.

Busa unsa may mahitabo sa umaabot? Nahibalo ta nga sa dili na madugay, ang “10 ka sungay” ug ang pintas nga mananap nga nahimo nang gamhanan maglaglag sa bakak nga relihiyon. Mao unya ni ang sinugdanan sa dakong kasakitan. Nahibalo pod ta nga ipahibalo sa mga nasod ang “kalinaw ug kasegurohan.” Kanus-a man ni mahitabo? Nahisgotan nato ang duha ka posibilidad. Una, ang proklamasyon himoon sa dili pa laglagon sa mga gobyerno sa kalibotan ang bakak nga relihiyon. Ikaduha, ang proklamasyon himoon dihang malaglag na ang bakak nga relihiyon. Wala ta mahibalo kon asa gyod aning duha ang mahitabo, kay ang mga tagna sa Bibliya sagad mas masabtan lang kon kini nagakatuman o natuman na. Maong maghulat lang ta kon unsa gyoy mahitabo anang panahona.—Itandi ang Juan 12:16.

Sa pagkakaron, ang pinakaimportante mao ang atong relasyon sa Diyos, dili ang pagkahibalo kon kanus-a ang proklamasyon sa “kalinaw ug kasegurohan.” Busa “pabilin kitang magmata ug huptan ang maayong panghunahuna,” aron andam ta bisag unsa pay mahitabo sa umaabot.—1 Tes. 5:6.