Tabangi ang Imong Pamilya o mga Paryente nga Dili Saksi

1-2. Sa unsang paagi naapektohan ang imong relasyon sa imong pamilya dihang nagsugod kag tuon sa Bibliya, ug unsa tingali hinungdan niana?

GIINGNAN ni Jesus ang usa ka lalaki nga gustong mahimong iyang sumusunod: “Pauli sa imong mga paryente, ug isulti kanila ang tanang butang nga gihimo ni Jehova kanimo.” (Mar. 5:19) Nganong miingon si Jesus adto? Kay nahibalo siya nga normal gyod para nato nga dihang makadawat tag maayong balita, gusto nato ning isulti sa atong mga minahal.

² Nahinumdom ba ka sa imong gibati sa unang higayon nga nadunggan nimo ang maayong balita? Seguradong eksayted kaayo ka nga isulti ni sa uban, ilabina sa imong pamilya. Pero wala ka magdahom nga dili diay sila malipay ani. Basig naglalis pa gani mo, tingali tungod sa imong paagi sa pagsulti sa imong nakat-onan. Kon mao nay nahitabo ninyo, unsay imong himoon aron mamentinar o kaha mabalik ang inyong maayong relasyon, ug sa samang higayon masunod gihapon nimo ang mga sukdanan ni Jehova?

3. Unsay atong hisgotan niini nga artikulo?

³ Niini nga artikulo, atong hisgotan: (1) kon sa unsang paagi ang kaluoy makatabang nato nga hunahunaon ang kaayohan sa atong pamilya o mga paryente nga dili Saksi, bisag wala pa sila magpakitag interes; (2) kon unsay atong buhaton kon naa silay masulti o mahimo nga makapasakit nato; (3) kon sa unsang paagi ang atong pailob ug positibong panglantaw makatabang aron nga sa ngadtongadto modawat sila sa kamatuoran; ug (4) kon unsaon nato pagpakita nga gimahal nato sila.

IPAKITA ANG KALUOY

4. Unsay gihimo ni Jesus bisag ang uban wala modawat sa iyang mensahe?

⁴ Si Jesus wala dayon mohunong sa pagtabang niadtong mga tawo nga wala modawat sa iyang mensahe. Gipakasama niya ang iyang kaugalingon sa usa ka tig-atiman sa ubasan nga naningkamot pag-ayo nga atimanon ang kahoyng igos nga dugay nang wala mamunga. (Luc. 13:​6-9) Dihang gisulti ni Jesus kini nga ilustrasyon, kapig tulo ka tuig na siyang naningkamot sa pagtabang sa iyang mga isigka-Hudiyo nga makabatog pagtuo niya. Nganong naningkamot man si Jesus sa pagtabang nila? Tungod sa iyang kaluoy sa mga tawo, nga maoy nagpalihok niya nga magpakitag pailob.

5. Nganong naluoy si Jesus sa iyang mga isigka-Hudiyo?

⁵ Naluoy si Jesus sa iyang mga isigka-Hudiyo kay wala sila tudloi sa ilang relihiyosong mga lider sa kamatuoran bahin sa Diyos. Nakita ni Jesus nga “sama silag mga karnero nga walay magbalantay.” (Mar. 6:34) Sa hapit na siyang mamatay, mihilak pa gani siya kay nahibalo siya nga kadaghanan sa mga nagpuyo sa Jerusalem malaglag tungod sa ilang kawalay pagtuo. (Luc. 19:​41-44) Sama kang Jesus, kon hunahunaon nato kon unsa ka luoy ang espirituwal nga kahimtang sa atong dili Saksi nga pamilya o mga paryente, mas mapalihok ta nga tabangan sila.

6. Nganong angay tang magpakitag pailob sa atong dili Saksi nga pamilya? (Galacia 6:9)

⁶ Basaha ang Galacia 6:9. Bisag ang atong pamilya wala pa magpakitag interes sa kamatuoran, angay tang magpailob nila ug dili mohunong sa “pagbuhat ug maayo.” Ngano? Kay nahibalo ta nga dili sayon para sa usa ka tawo nga usbon ang dugay na niyang gituohan. Pananglitan, hunahunaa ang imong kahimtang sa una. Tingali parehas ka niadtong mga “walay paglaom ug wala makaila sa Diyos.” (Efe. 2:12) Pero mapasalamaton kaayo ka nga dihay mitabang nimo. Di ba mao pod nay gusto nimo para sa imong pamilya? Kon mao, seguradong maningkamot gyod ka sa pagtabang nila kutob sa mahimo.

IPAKITA ANG LAWOM NGA PAGSABOT

7. Ngano kahang wala motuo kang Jesus ang iyang mga igsoon?

⁷ Ang mga igsoon ni Jesus posibleng nakadungog sa mga milagro nga iyang gihimo sa Galilea. (Luc. 4:​14, 22-24) Pero sa primero, wala sila motuo niya. (Juan 7:5) Ngano? Walay giingon ang Bibliya. Pero gipakita ani ang duha ka rason kon nganong ang ubang Hudiyo nagduhaduha nga mosunod kang Jesus. Una, ang uban nahadlok nga isalikway sila sa mga tawo sa ilang lugar. (Juan 9:​18-22) Ikaduha, ang uban nila nakaila kang Jesus sukad pa sa iyang pagkabata, maong dili nila ma-imagine nga siya ang Mesiyas. (Mar. 6:​1-4) Basin mao pod nay gihunahuna sa mga igsoon ni Jesus. Posible kaha nga naapektohan pod ang imong pamilya sa ingon ani nga mga panghunahuna, maong dili sila ganahang maminaw nimo kon maghisgot ka bahin sa Bibliya?

8. Ngano kahang ang atong dili Saksi nga pamilya makasulti o makabuhat ug dili maayo nato?

⁸ Hunahunaa kon ngano kahang nakasulti o nakahimo silag dili maayo nimo. Ang mga igsoon ni Jesus apil tingali niadtong mga miingon nga “nabuang na siya.” (Mar. 3:21) Ngano kahang nakaingon sila adto? Ang asoy sa Bibliya bahin ani nagpakita nga busy kaayo si Jesus sa pagsangyaw ug pagpang-ayo nga wala na gani siya makakaon. (Mar. 3:20) Maong naghunahuna tingali sila nga sobra ra ang iyang ginahimo. Posible kaha nga ang atong mga paryente naghunahuna pod nga debotado ra kaayo ta sa atong relihiyon? Kon mao, maayong ipakita nato nga makataronganon o balanse ta. Basin makatabang na nga mausab ang ilang hunahuna bahin nato.

9. Unsa kahay makatabang aron mausab ang hunahuna sa atong pamilya bahin sa mga Saksi? (1 Pedro 3:​1, 2) (Tan-awa sab ang mga hulagway.)

⁹ Ipakita pinaagi sa imong binuhatan nga makataronganon ka. Kon maningkamot ta nga sabton ang atong pamilya ug magpakitag kaayo nila, basin mausab ang ilang hunahuna bahin nato. (Basaha ang 1 Pedro 3:​1, 2.) Pananglitan, ang dili Saksi nga bana basin masuko dihang motambong sa tigom o mosangyaw ang iyang asawa, kay mobati tingali siya nga wala nay panahon ang iyang asawa para niya. Pero kay dili gusto sa asawa nga mao nay bation sa iyang bana, puwede niyang i-adjust ang iyang eskedyul aron makagahin ug dugang panahon para sa iyang bana. Pananglitan, puwede siyang mosangyaw sa mga panahon nga busy ang iyang bana o wala sa balay. Kon makataronganon ug andam mo-adjust ang asawa, posibleng makatabang ni nga mausab ang opinyon sa iyang bana bahin sa mga Saksi.

10. Kon ang atong pamilya naay isulti nga dili maayo bahin nato, unsaon nato pagsundog ang gihimo ni Jesus?

¹⁰ Ayawg isipa nga kinahanglan nimong depensahan pirme ang imong kaugalingon. Dihang ang uban miingon nga si Jesus palainom ug hangol kuno sa pagkaon, wala niya usiki ang iyang panahon aron lang depensahan ang iyang kaugalingon. Hinuon, gidasig niya ang mga tawo nga susihon kon unsay tinuod. (Mat. 11:19) Iya pong gipakita pinaagig binuhatan nga balanse siya. Pananglitan, wala siya magpalabig inom ug bino, pero wala pod siya moingon nga sayop ang pag-inom. (Itandi ang Juan 2:​2, 6-10.) Sama kang Jesus, dili kinahanglang depensahan nimo pirme ang imong kaugalingon dihang ang imong pamilya naay isulti nga dili maayo bahin nimo o sa mga Saksi. Hinuon, ipakita pinaagi sa imong binuhatan nga balanse ug malipayon ka. Kon ila nang makita, posibleng sila ra pod ang makaamgo nga sayop diay ang ilang gihunahuna bahin nato.

PADAYON SA PAGPAILOB UG AYAWG WAD-A ANG IMONG PAGLAOM

11. Giunsa pagtratar ni Jesus ang iyang mga igsoon nga wala magpakitag pagtuo niya?

¹¹ Gipakita sa Bibliya nga si Jesus padayong nagpailob sa iyang mga igsoon. Pananglitan, dihang gihimo ni Jesus ang iyang unang milagro didto sa Cana, posibleng tua pod didto ang iyang mga igsoon. (Juan 2:​11, 12) Pero sa nahisgotan na, wala sila magpakitag pagtuo kaniya. Bisan pa ana, nagpakita gihapon siyag kaayo nila. Ang Bibliya nag-ingon nga mga tulo ka tuig human sa maong milagro, si Jesus buotang nakig-estorya sa iyang mga igsoon.—Juan 7:​5-8.

12. Unsay makatabang nato nga padayong molaom nga sa ngadtongadto dawaton ra sa atong pamilya ang kamatuoran?

¹² Dili ta angayng mawad-ag paglaom sa atong dili Saksi nga pamilya o mga paryente. Ngano? Kay nahibalo ta nga maluluy-on kaayo si Jehova, ug padayon siyang naghatag nilag kahigayonan. Inig-abot sa kalaglagan sa bakak nga relihiyon, posibleng mahinumdoman sa atong pamilya o mga paryente nga dugay na tang nagsulti nila bahin ani.a (Pin. 17:16) Basin modesisyon pa gani sila nga moalagad kang Jehova inigsugod sa dakong kasakitan. Pero bisan karon, padayon natong himoon ang atong maarangan sa pagtabang nila dihang makaatubang silag lisod nga mga kahimtang. Kon makita nila nga gimahal gyod nato sila ug nga naghunahuna ta sa ilang kaayohan, basin makatabang na nila nga dawaton ang kamatuoran.

IPAKITA NGA GIMAHAL NIMO SILA

13. Bisag busy ta sa pag-alagad kang Jehova, unsay dili nato gusto nga hunahunaon sa atong mga paryente?

¹³ Bisag busy ta sa pag-alagad kang Jehova, dili nato gusto nga maghunahuna ang atong mga paryente nga wala na tay panahon para nila o nga wala na nato sila mahala. (Mat. 7:12) Unsaon nato pagpakita nga importante gihapon sila para nato? Niay pipila ka paagi.

14-15. Unsay usa ka paagi nga mapakita nato nga gimahal nato ang atong dili Saksi nga mga paryente? Pag-asoy ug eksperyensiya.

¹⁴ Paggahin ug panahon para nila ug ipakita ang gugma. Mapakita nato nga gimahal nato ang atong mga paryente kon balitaan nato sila pirme bahin sa atong kinabuhi. Pananglitan, puwede nato silang i-text ug sendan ug mga picture sa atong bakasyon, laag, o tapoktapok uban sa mga igsoon. Puwede pod nato silang sulatan o hatagag simpleng regalo aron makita nila nga importante gihapon sila para nato. Pinaagi ana, atong mapabati nila nga gimahal nato sila.

¹⁵ Hunahunaa ang eksperyensiya ni Anna, usa ka sister sa Armenia. Niadtong dili pa siya Saksi, pirme silang mag-uban sa iyang pamilya ug mga paryente, ilabina panahon sa birthday ug mga holiday. Pero pagka-Saksi niya, nabalaka ang iyang mga paryente nga basig dili na kaayo siya makig-uban nila. Nabalaka pod sila sa iyang kaugmaon ug kon mag-unsa na lang siya sa iyang kinabuhi. Unsay gihimo ni Anna? Siya miingon: “Dihang mobisita ko sa akong mga paryente, ako silang sultihan kon komosta na ko ug kon unsay akong lingaw sa kinabuhi. Paadtoon pod nako sila sa akong gipuy-an ug ipailaila sa mga igsoon. Tungod ana, daghan sa akong mga paryente ang nakaila na sa akong mga suod ug kampante na pod nila. Nakaingon pa gani sila nga malipayon daw kaayo ko, maong wala na sila mabalaka nako.”

16. Giunsa pagpakita ni Jesus nga importante kaniya ang iyang igsoon nga si Santiago? (Tan-awa sab ang footnote.)

¹⁶ Ipakita nga interesado gihapon ka nila. Importante kang Jesus ang iyang igsoon nga si Santiago. Gani, nagpakita siya niya human siya mabanhaw. (1 Cor. 15:7) Seguradong natandog gyod si Santiago nga wala mohunong si Jesus sa pagtabang niya. Basin mao pa gani toy hinungdan nga mituo na siya nga si Jesus ang Mesiyas. Human adto, tingali gitabangan niya ang uban pa niyang mga igsoon nga motuo pod kang Jesus.b—Buh. 1:14.

17. Unsaon nato pagpadapat ang prinsipyo sa Roma 12:15? (Tan-awa sab ang hulagway.)

¹⁷ Basaha ang Roma 12:15. Sa makapalipay o makapaguol nga mga panahon, gusto nato nga naa ta para sa atong mga paryente. Kon ato ning himoon, basin makatabang ni nga mausab ang ilang hunahuna bahin nato.c Pananglitan, kon naa silay bag-ong natawo nga anak, puwede nato silang i-congrats ug hatagag regalo aron ipakita nga nalipay pod ta para nila. Kon mamatyan silag minahal, hupayon nato sila, hatagag praktikal nga tabang, o padad-ag card. Komostahon pod nato sila pirme, ilabina kon naa silay mga problema.

18. Unsaon nato pagsundog ang tinun-ang si Andres?

¹⁸ Ipailaila sila sa mga igsoon. Dihang nasabtan sa tinun-ang si Andres nga si Jesus ang Mesiyas, iya dayong gipailaila ang iyang igsoong si Pedro kang Jesus. (Juan 1:​40-42) Puwede pod nato nang himoon. Pananglitan, puwede natong imbitahon ang atong paryente sa tigom o kaha sa tapoktapok uban sa mga igsoon. Kon ato nang himoon, makita niya nga ang mga Saksi normal ra pod nga mga tawo ug okey ra diay ikauban.

19. Bisag dili bug-os masabtan sa atong mga paryente ang uban sa atong mga tinuohan, unsay angay natong pagtratar nila? (1 Pedro 3:15)

¹⁹ Basaha ang 1 Pedro 3:15. Bisag dili bug-os masabtan sa atong pamilya ug mga paryente ang uban sa atong mga tinuohan, angay gihapon nato silang pakitaag kaayo ug pagtahod kay dako nig epekto nila. Basin maapresyar nila ang atong mga paningkamot nga makagahin ug panahon para nila ug mamawi sa mga okasyon nga wala ta nila makauban. Pananglitan, bisag dili ta moapil sa mga selebrasyon nga supak sa Bibliya, puwede nato silang bisitahon, hagaron sa pagpangaon, ug hatagag regalo sa ubang mga panahon.

AYAWG HUNONG SA PAGTABANG NILA

20. Nganong madasig ta sa ehemplo ni Santiago?

²⁰ Si Santiago wala makapribilehiyo nga makauban kang Jesus sa iyang ministeryo, pero sa ngadtongadto, nahimo ra siyang tinun-an. (Gal. 1:​18, 19; 2:9) Klaro nga iyang gipamalandong ang mga gitudlo ni Jesus. Pananglitan, sa iyang sulat sa mga Kristohanon, naa siyay mga gihisgotan nga maomao sa gitudlo ni Jesus panahon sa iyang Wali sa Bukid.d

21. Nganong padayon natong pakitaag kaayo ang atong dili Saksi nga mga paryente?

²¹ Bisan pa sa atong mga paningkamot nga tabangan ang atong mga paryente o pakitaan silag personal nga interes, dili tingali gihapon sila modawat sa kamatuoran o basin dili gihapon maayo ang ilang tinagdan nato. Pero nganong padayon man nato silang pakitaan ug kaayo? Kay matag higayon nga ato nang himoon, atong gisundog ang atong maluluy-ong Diyos, si Jehova, ug ang iyang Anak, si Jesus. (Luc. 6:​33, 36) Sa ngadtongadto, basig mausab ang ilang opinyon bahin nato ug magsugod na silag hunahuna sa mga butang nga atong gitudlo nila. Kon dili ta mohunong sa pagtabang sa atong pamilya ug mga paryente, tingali moabot ra gyod ang panahon nga makauban nato sila sa pag-alagad kang Jehova.