Tinuod nga mga Higala—Kon Unsaon sa Pagkaplag Kanila
“ANG usa lamang ka paagi nga makabaton ug higala mao ang pagkahimong higala,” miingon si Ralph Waldo Emerson. Hinunoa, daghan ang mipili sa dalan sa pag-inusara. Imbes makighigala ug mahimong usa ka higala, ilang mapalayo ang uban. Ang resulta? “Ang mga tawong magpalabay ug daghang oras sa ilang kaugalingon daw mobatig ‘walay kadasig, dili malipayon, ug tinalikdan sa kalibotan,’” matud pa sa tigdukiduki nga gikutlo sa pamantalaan sa Brazil. Siya mipadayon: “Kon wala nay laing buhaton, kon wala kay ikaestorya, modangop ka sa imong kaugalingon. Mas dali kang magkaproblema.”
Apan, dili angayng modangat ka nianang ang-anga. Ang tanan makakat-on nga mahimong usa ka higala ug busa makabaton ug mga higala. Apan asa ka magsugod? Ang dakong butang sa katakos sa pagbatog higala mao ang atong kaugalingong personalidad. Ang karaang sambingay matinud-anong nag-ingon: “Ang pagkamadanihon sa tawo makita sa iyang pagkamaluluton.” (Proverbio 19:22, The Jerusalem Bible) Busa, ang tinuod nga panaghigala, modangat niadtong magpakitag kalulot. Pananglitan, kon atong ipahibalo sa uban nga atong giapresyar sila, adunay dakong kalagmitan nga sila magpakita kanatog interes.
Ang tawong maluluton maminaw usab sa uban. Ang tawong mangibabaw sa panag-estorya o hingaping makatabi bahin sa iyang kaugalingon malisdan sa pagkaplag ug tawong maikagon sa iyang mga pagbati ug mga pangandoy. Ang kalulot nagkahulogan usab sa pagbantay sa atong isulti sa uban. “Adunay magapamulong sa hinanali sama sa mga paglagbas sa espada, apan ang dila sa manggialamon makaayo.” (Proverbio 12:18) Sa pag-ilustrar: Tingali may namatikdan kang tawong naluya ang buut o naguol. Ang sanglitanan nag-ingon: “Ang kabalaka makahikaw sa imong kalipay, apan ang malulutong mga pulong makalipay kanimo.” (Proverbio 12:25, Today’s English Version) Niini nga kahimtang, ang imong makahupayng pulong makadanig maunongong higala alang kanimo.
Ang Bili sa Pagkamaunongon
Ang magsusulat sa Proverbio 18:24 nagpakitag lalom nga pagsabot sa tawhanong relasyon sa dihang misulat siya: “Ang ubang mga higala mohatag kadaot kanato, apan ang tinuod nga higala mas maunongon pa kay sa usa ka igsoon.” (The New American Bible) Oo, kinsay nagtinguhang mahimong higala sa maayo lamang nga panahon? Apan tagda ang pananglitan ni David ug Jonathan. May katarongan si Jonathan sa pagpakitag dili maayong buut kang David, sanglit manununod si Jonathan sa pagkahari sa Israel apan nasayod nga si David sa ulahi ang mahimong hari. Apan nagpakitag pagkamaunongon si Jonathan, dili pangabubho, kang David, ug iya pa ganing gitahan ang iyang kinabuhi alang kang David.—1 Samuel 18:1-3; 20:17, 31, 32; 2 Samuel 1:26.
Si Ruth maoy laing maunongong higala. Imbes biyaan ang iyang ugangang babaye si Naomi, nagpabilin siya diha kaniya. Sa pagkatinuod, tukmang nakapamulong ang mga tumatan-aw nga si Ruth ‘mas maayo pa kay sa pito ka anak nga lalaki’ ni Naomi.—Ruth 1:16, 17; 4:15.
Nagpakita ka bag sama nga pagkamaunongon? Pananglitan, kon makakita kag kahuyangon sa imong mga higala, sa walay paghunahuna imo ba kining itug-an sa uban?
Apan komusta kon ang usa nga suod kanimo nakahimog dakong sala nga nagkinahanglag pagtagad? Ang maunongong higala dili maghawid sa pagtug-an sa kamatuoran tungod sa kahadlok sa reaksiyon nianang tawhana. “Ang kasakit nga ihatag sa usa ka hinigugma matinumanon,” nag-ingon ang Bibliya. (Proverbio 27:6) Kini, siempre, wala magpasabot nga kinahanglang magmabangis ka o dili magmataktikahon. Ang mga Kristohanon sa karaang Galacia nagkinahanglag prangkang pagbadlong. Apan matikdi kon unsa ka mataktikahong giatiman ni apostol Pablo ang situwasyon ug dayon nangutana: “Nan, ako ba karon nahimo na ninyong kaaway tungod kay gisultihan ko kamo sa matuod?” (Galacia 4:16) Higugmaon ka sa tinuod nga higala sa imong ‘pagsulti sa tinuod,’ bisan ug usa kini ka tambag sa pagtul-id.—Proverbio 9:8.
Kalipay sa Paghatag
Ang tinuod, malungtarong panaghigala adunay bili. Ang mga tawong maningkamot pag-ayo nga makadawat ug butang nga dili mobalos sa paghatag dili gayod makatagamtam sa kalipay nga gipamulong ni Jesus sa dihang miingon siya, “Adunay dakong kalipay ang paghatag kay sa pagdawat.” (Buhat 20:35; Lucas 6:31, 38) Busa, pagtuon sa pagtan-aw sa mga tawo sumala sa imong mahimo alang kanila, imbes sa kon unsay imong makuha gikan kanila.
Gidasig sa Bibliya ang mga Kristohanon nga “magmahinatagon,” “andam sa pagtabang sa uban.” (Proverbio 11:25; 1 Timoteo 6:18) Tingali limitado lamang ang imong materyal nga kahinguhaan, apan komusta ang imong panahon? May batasan ka bang kanunayng magdali? Nagkinahanglag panahon ang panaghigala, ug gawas nga andam ang tawo sa paggahin ug panahon alang sa uban, dili gayod molampos ang relasyon. Pananglitan, motimbaya ka tingali sa pabalikbalik nga pangomostang “Komusta ka?” Apan mahinatagon ka ba sa imong panahon sa paghunong ug andam nga mamati sa tubag nianang pangutanaha? Hinumdomi, nga bisag okupado kanunay si Jesu-Kristo, may panahon gayod siya sa pag-atubang niadtong mangita kaniya.—Marcos 6:31-34.
Paghimo sa Atong Panaghigala nga Buhi Kanunay
Sa matukod na ang panaghigala, kinahanglang kugihan gayod kini aron magpabiling buhi. Tinuod, sa magkasuod kamong duha, mogawas ang pipila ka kahuyangon ug mga kasaypanan. Apan maayong imong sabton ug dawaton ang gagmayng mga kahuyangon. Ug kon magduhaduha, ang labing maayong buhaton mao ang pag-isip sa imong higala nga walay sala, likayi ang katahap. ‘Mag-inantusay sa usag usa diha sa gugma,’ mitambag si Pablo. Ug si Pedro midugang: “Labaw sa tanan, pagpakitag mainitong gugma sa usag usa, tungod kay ang gugma magatabon man sa kapid-an ka mga sala.”—Efeso 4:2; 1 Pedro 4:8.
Ug lain pa, usab, pagkamaalamon nga dili nato ibali-wala ang atong mga higala! Bisan ang labing suod nga mga higala nagkinahanglag pribasiya. Ang dugay, kanunay, wala sa panahong mga pagbisita sa ulahi makapuol ug wala kinahanglana. Ang pagsabot ug pagtahod nagkinahanglan sa paghimo unag mga kahikayan sa tanang panahon kon posible. Ang Proverbio 25:17 nagtambag: “Ayaw pagpakanunaya ang imong tiil sa balay sa imong isigkatawo, tingali unya siya mapul-an ug magadumot kanimo.”
Dalan usab sa kaalam ang paglikay sa sobrang pagkamasukitsukiton, personal, o pagpangabubho. Ang pagkamakasaranganon mopalikay kanato nga dili mahimong dogmatiko. Siempre, sa panaghigala kita walay katungod sa pagpugos sa atong mga opinyon o personal nga kagustohan sa usag usa. Matuod, kon gigamhan kita sa “kaalam nga gikan sa kahitas-an,” magmakataronganon kita.—Santiago 3:17.
Magmapaluyohon sa imong mga higala, sunda ang tambag ni Pablo sa Roma 12:15: “Pagkalipay kamo duyog sa nagakalipay; panghilak kamo duyog sa nagapanghilak.” Oo, magmainandamon sa pakigbahin sa mga kaguol, kapakyasan, kalipay, ug kalamposan sa imong higala. Pagpakatawa, usab, andam sa pagkatawa sa imong kaugalingong mga kasaypanan, dili lamang sa uban. Ang maayong mga komento makahupay sa tensiyon sa malisod nga mga gutlo. Oo, trabaho ang panaghigala. Apan dili ba takos kini sa kahago?
Pagpangitag Tinuod nga mga Higala
Nan, asa, makakaplag ang usa ug tinuod nga mga higala? Ang maayong lugar nga kasugdan mao ang lokal nga kongregasyon sa mga Saksi ni Jehova. Ginatagamtam niining tinuod nga mga Kristohanon ang maayong mga relasyon nga maoy ilang pagtawag kanunay sa usag usa ingong “mga higala,” sama sa ilang isigkamagtutuo sa unang siglo. (3 Juan 14) Gisalikway na nila ang nasyonalismo ug garbo sa rasa, mga butang nga makapabulag sa katawhan. Naningkamot sila sa pagsul-ob nianang gitawag sa Bibliya nga “bag-ong personalidad.” Nagkahulogan kini sa pag-ugmad niining madanihong mga hiyas sama sa “malumong pagbati sa kaluoy, kalulot, pagkamapaubsanon, kaaghop, ug pailob.” (Colosas 3:10-12) Piho nga makakaplag kag tilinguhaong mga higala taliwala sa mga tawo nga nagahimo niini!
Pinaagi sa pakig-uban sa mga Saksi ni Jehova, makat-onan usab nimo kon unsaon sa pagpakighigala kang Jehova nga Diyos ug sa iyang Anak si Jesu-Kristo. Si Jesus miingon: “Kamo akong mga higala kon magatuman kamo sa akong isugo kaninyo.” (Juan 15:14) Ug si Abraham sa karaan gitawag nga “higala ni Jehova.” Naangkon ni Abraham kanang tilinguhaong relasyon tungod sa iyang pagtuo ug matarong nga mga binuhatan, ug mahimo usab nimo kana.—Santiago 2:23.
Samtang maayong paningkamotan ang pag-ugmad ug yutan-ong mga higala, labi nang magmatinguhaon sa pagtukod ug mahigalaong relasyon sa atong langitnong Higala si Jehova nga Diyos. Iyang ipasig-uli sa dili madugay ang Paraiso ning yutaa, sa pagtugot sa iyang yutan-ong mga alagad sa pagpuyo sa kalinaw ug kasegurohan. Oo, ang pomuluyo sa yuta pagalibotan sa milyonmilyon nga mapamatud-an sa walay kataposan nga tinuod nga mga higala.—Lucas 23:43; Pinadayag 21:3, 4; Salmo 37:10, 11.
[Kahon sa panid 7]
Panaghigalang Makapahiusa
Dili lamang espirituwal nga mga igsoong lalaki ug babaye ang mga Saksi ni Jehova kondili sila mga higala usab. Ug sanglit gipasukad ang ilang panaghigala sa mutuwal nga pagsunod sa mga sugo ni Jesu-Kristo, dili kini pinugngan sa mga utlanan sa nasod. (Juan 15:14) Kining matanga sa panaghigala ang makadawat sa panalangin sa Diyos, nga nagpahiusa kanila ug malig-on sama sa panon sa karnero nga anaa sa ilang toril.—Miqueas 2:12.
Kasagaran walay panaghigala ug panaghiusa sa dapit sa konstruksiyon. Apan, kon magtigom ang mga Saksi ni Jehova sa pagtindog sa ilang “dalidaling pagtukod” nga mga Kingdom Hall, ang maayong espiritu sa kooperasyon ug panagsuoray ang makita. Pananglitan, ang mga Saksi nga gikan sa Tinipong Bansa, Inglaterra, ug Wales nagtinabangay ug nakigbahin sa ilang mga paagi sa pagtukod ug mga tigomanan. Ang resulta?
“Wala pa ako sukad makakita ug ingon niana sa tibuok kong kinabuhi,” miingon si Roger, kantero nga gikan sa Inglaterra. “Dili gayod ako makakitag mga karpentero nga motrabaho uban sa mga kantero tungod kay wala pa gayod kini mahitabo sukad sa kalibotan. Apan diha sa gitukoran sa Kingdom Hall imong makita ang mga igsoong nagtrabaho diha sa atop, samtang ang mga karpentero ug mga kantero nga nagtrabaho sa ubos uban sa mga tigpintura ug mga tigpahilunag alpombra. Ang tanan nagkauban sa pagtrabaho. Katingalahan kini!”
Si Mike, amahan sa duha ka bata, nga gikan sa Wales nakamatikod nga ang “tanan makabahin nianang panagsuoray.” Ug ang iyang higalang si Malcolm nakapaniid kon ngano, mikomento: “Kon ang tanang mga igsoon motrabaho sa panaghiusa, sa ngalan sa Diyos, nan iyang panalanginan kanang proyektoha pinaagi sa iyang espiritu.”
[Hulagway sa panid 5]
Walay limitasyon sa edad ang tinuod nga panaghigala
[Hulagway sa panid 6]
Makadani kitag tinuod nga mga higala pinaagi sa pagkamahinatagon, andam sa pagtabang