Tinuod nga mga Higala—Nganong Malisod nga Makaplagan?
“GUSTO kog daghang higala.” Nagkanayon ang popular nga awit sa Brazil. Apan unsa gayod ang higala? Gamiton usahay ang pulong “higala” halos sa tanang kaila nga dili kaaway. Apan, ang tinuod nga higala, labaw pa kay sa yanong pagkaila lamang. Mahitungod sa panaghigala, si Francis Bacon misulat: “Mohatag kinig dobleng kalipay ug makamenos sa kaguol sa katunga.”
Ngani, ang tinuod nga higala mao kanang usa nga makadugang sa imong kalipay ug nga kinsa, kon gikinahanglan, makatabang kanimo sa pagsagubang sa kaguol. Busa, ang tawong walay mga higala, dili gayod bug-os malipayon. Hinunoa, milyonmilyon ang nagreklamo nga malisod ang pagkaplag ug tinuod nga mga higala.
Kon Nganong Malisod Makaplagan ang Tinuod nga mga Higala
Ang Bibliya nagtagna nga ang mga lalaki ug babaye karon “mga mahigugmaon sa kaugalingon, . . . tigpagawal, hambogiro, . . . dili mapasalamaton, dili-maunongon, walay kinaiyanhong pagbati, dili ikasabot, tigbutangbutang, walay pagpugong sa kaugalingon, mabangis, walay gugma sa pagkamatarong, mabudhion, gahig-ulo, tigpaburot.” (2 Timoteo 3:1-4) Nan, dili ikatingala, nga malisod makaplagan ang tinuod nga mga higala! Ang palibot nga niini nagdako ang mga tawo nakadaot sa ilang pag-ugmad sa mga hiyas nga gikinahanglan sa usa ka higala.
Apan adunay uban pang mga butang. Salingkapaw ang ubang mga tawo, nagtagad lamang sa ibabawng bahin sa kinabuhi. Ang uban dili andam sa pagsakripisyo nga bililhon sa panaghigala. “Ayaw palangkit!” mao ang tambag nga kasagarang madunggan kanato karong mga panahona. Nakadaot usab sa panaghigala ang pagpasiugda sa kalibotan sa materyal. Mas gusto pa ang tawo ug mga butang—bisan mga iro ug iring—kay sa mga tawo. Ang gugma nga ilang ipakita sa mga tawo daw salingkapaw. Sumala pa sa gipamulong sa tigulang nga babaye: “Magmahal sila, apan sa halayo.” Bisan sa mga kinaiya diin komun ang paggakos ug paghalok, nakita nga kulang ang tinuod nga pagtabang kon moabot ang panginahanglan.
Ang pagkakulang, usab, sa panahon maoy komung kababagan sa panaghigala. Sa ilang pagdalidali sa adlaw-adlaw, okupado kaayo ang mga tawo o lapoy na kaayo sa pag-ugmad ug tinuod nga mga panaghigala. O tingali bation sa uban nga kinahanglang hupngon ang mga higala sa kalingawan ug busa moingon nga dili sila makaabot sa pagbaton ug mga higala!
Mabawng mga Panaghigala
Bisan pa, daghang tawo moingon nga aduna silay tinuod nga mga higala. Apan unsa ka tinuod kining panaghigalaa? Sagad magpakitag interes ang tawo sa usa ka tawo tungod sa ikahatag nianang tawhana, dili tungod sa kon unsa siya. Kining matanga sa panaghigala dili molungtad, kay kon wala nay mahatag kining “higalaa,” isalikway dayon kini siya.
Bisag magkasinabot sila sa daghang butang dili kini igo ingong basehanan sa malungtarong panaghigala. May gihisogtan sa miagi ang Brazil Herald bahin sa duha ka suod nga “mga higala” nga malipayng maglibotlibot sa mga lugar nga inom-inoman ug sa pag-inom ug sobra kada hinapos sa semana. Apan, kas-a, nag-away sila kon kinsa kanila ang tinuod nga lalaki. Aron mapamatud-an ang iyang pangangkon, iyang giluthang ang iyang higala. Ang mamumuno miingon sa ulahi nga iyang gipatay ang iyang “labing suod nga higala.”
Apan, bisan pa sa tanang mga kalisdanan ug kakulian sa dalan sa panaghigala, ang kamatuoran nagpabilin nga kitang tanan adunay suod nga panginahalan ug mga higala. Nan, diin ug sa unsang paagi, makaplagan sila?