Tungod sa Pagtuo Ilang Gitagoan si Moises

KAPIN nag 60 ka tuig nga namatay si Jose. Wala na mahinumdomi sa mga Ehiptohanon ang matinumanong tawo nga gigamit ni Jehova sa pagluwas sa ilang nasod gikan sa gutom. Karon, bag-ong Paraon na ang nagmando sa yuta, ug iyang gidumtan ang mga Israelinhon ug gikahadlokan sila. Padayon silang midaghan tungod sa panalangin ni Jehova. Busa giulipon sa mga Ehiptohanon ang mga Hebreohanon ug gidaogdaog sila. Bisan pa niana, padayong nagkadaghan ang maong mga ulipon.

Dayon, dihay daotan kaayong gihimo ang Paraon. Iyang gipatawag ang duha ka Hebreohanong mananabang nga si Sipra ug Pua. Hunahunaa ang ilang gibati dihang gisugo sila niining gamhanang magmamando nga patyon ang tanang batang lalaki nga ipanganak. Pero ang maong duha ka maisogong babaye “may kahadlok sa matuod nga Diyos.” Nahibalo sila nga walay tawo, bisag unsa pa siya ka gamhanan, ang may katungod nga sugoon sila nga supakon si Jehova, ang Soberano sa uniberso. Tungod sa ilang kahadlok sa Diyos, nagmaisogon sila. “Wala nila tumana ang sugo sa hari sa Ehipto.” Imbes patyon ang mga bata, naningkamot sila nga daghang bata ang ilang mapanalipdan ug maluwas kutob sa mahimo. Puwerteng sukoa sa Paraon, pero wala nila siya sultihi sa ilang gihimo. Nakita kini ni Jehova. Tungod sa gihimo sa mga mananabang, sila “gipanalanginan sa Diyos.” Sa ulahi, gihatagan niya silag kaugalingong pamilya.

Dihang nakita sa Paraon nga wala molampos ang iyang plano, nagpakanaog siyag laing pintas nga mando: Ilabay ang tanang Israelinhong batang lalaki sa Suba sa Nilo! Sa maong kuyaw nga panahon, ang Hebreohanong magtiayon nga si Amram ug Jokebed kinahanglang mohimog lisod nga desisyon. Duna na silay duha ka anak, si Miriam ug Aaron. Pero dihang nagmabdos si Jokebed sa ilang ikatulong anak, nahibalo sila Amram nga kon lalaki ang ilang anak, mameligro ang bata. Dihang natawo ang batang lalaki, naningkamot sila sa pagtago niini kutob sa ilang mahimo. Pero dili sayon ang pagtago ug bata. Dihang tulo na ka bulan ang bata, si Jokebed nagkuhag basket, gibulitan kinig aspalto ug alkitran, ug dayon gisulod dinhi ang bata. Unya iyang gitago ug gipalutaw ang basket sa daplin sa Suba sa Nilo diin daghag tanom nga tangbo. Ang anak nga babaye ni Jokebed nga si Miriam mitago sa duol aron tan-awon kon unsay mahitabo sa iyang manghod.

Dayon, ang anak nga babaye sa Paraon miadto sa Suba sa Nilo aron maligo. Iyang nakita ang basket ug gipakuha niya kini sa iyang ulipong babaye. Giablihan kini sa prinsesa ug sa dihang nakita niya ang guwapo nga batang lalaki nga naghilak, morag gikumot ang iyang kasingkasing. Nakadesisyon siya nga sagopon ang bata pero nagkinahanglan kinig inahan nga magpasuso niini. Si Miriam abtik ug maisogong miduol ug miingon nga mangita siyag yaya para sa bata, ug miuyon ang anak sa Paraon. Pagbalik ni Miriam, kauban na niya ang iya mismong inahan. Hunahunaa ang kalipay ni Jokebed pagkahibalo niya nga luwas niyang mapasuso ug maatiman ang iyang pinanggang anak—ug bayran pa gyod siya! Seguradong gihimo nila ni Amram ang tanan aron matudloan ang bata bahin kang Jehova. Sa ulahi, miabot ang panahon nga kinahanglan na nilang ihatag ang bata ngadto sa anak sa Paraon. Ang bata ginganlan sa prinsesa ug Moises.

Gipanalanginan ba ni Jehova si Amram, Jokebed, ug Miriam sa ilang gipakitang pagtuo ug kaisog? Siyempre! Gipadako ni Amram ug Jokebed si Miriam ug Aaron nga mahimong matinumanong mga alagad ni Jehova. Ug nakita nila nga gipanalipdan ni Jehova si Moises. Hinuon, wala hisgoti sa Bibliya kon buhi pa ba sila dihang si Moises hamtong na, nakaugmad ug daghang maayong mga hiyas, ug gigamit ni Jehova. (Ex. 6:20) Pero nakita gyod kini ni Miriam ug Aaron. Nakita nila ang kahibulongang mga butang nga gihimo ni Jehova pinaagi kang Moises. Silang tulo nagpakitag talagsaong pagtuo ug kaisog. Sa sunod nga kapitulo, atong makat-onan ang mga panghitabo samtang nagdako si Moises ug kon nganong midesisyon siya sa pag-alagad kang Jehova.

Basaha ang asoy sa Bibliya:

• Exodo 1:6–2:10

• Buhat 7:17-21

• Hebreohanon 11:23

Pakighisgot:

Sa unsang mga paagi nga ang mga mananabang ug ang pamilya ni Moises nagpakitag kaisog?

Tun-ig Dugang

1. 1. Unsay gipakita sa arkeolohiya nga nagpamatuod nga tukma kini nga asoy? (g04 4/8 4 ¶4–5 ¶1)

   Imong tubag

2. 2. Unsay nagpamatuod nga tinuod ang giingon sa Bibliya bahin sa papiro nga basket ug sa sugo sa Paraon nga patyon ang Hebreohanong mga bata? (g04 4/8 6 ¶1-2) A

   Imong tubag

   

   Christine Osborne Pictures/Alamy Stock Photo

3. 3. Unsay atong nahibaloan bahin sa Hebreohanong mga mananabang, ug sa unsang paagi sila gipanalanginan? (w03 11/1 8 ¶3-4; it “Mananabang”) B

   Imong tubag

   

4. 4. Giunsa pagpakita ni Miriam ang talagsaong pagtuo bisan niadtong tigulang na siya? (ijwia artikulo 7 ¶14-18)

   Imong tubag

Hunahunaa ang mga Leksiyon

• Unsay makat-onan sa mga ginikanan kang Amram ug Jokebed?

  Imong tubag

• Unsay makat-onan sa mga managsoon sa batan-on nga si Miriam? C

  Imong tubag

  

• Unsaon nimo pagsundog ang kaisog ni Sipra ug Pua?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Sipra, Pua, Amram, Jokebed, ug Miriam dihang banhawon na sila?

  Imong tubag

Pagkat-og Dugang

Sayra kon sa unsang paagi makatabang nato ang ehemplo sa mga babaye nga wala mosunod sa Paraon.

“Mga Babaye nga Nakapalipay sa Kasingkasing ni Jehova” (w03 11/1 8-9 ¶3-5)

Kanunay bang atimanon ni Jehova kadtong maisogong mosunod niya ingong magmamando imbes sa mga tawo?

Iya Mi ni Jehova (6:55)