Matapos Kaha ang mga Krimen nga Resulta sa Pagdumot?—Unsay Giingon sa Bibliya?

Makapasubo nga komon na kaayo ang mga krimen nga resulta sa pagdumot. Ang mga tawo nahimong biktima niini tungod lang sa ilang gender, rasa, relihiyon, o uban pang rason. Daghan ang naangol ug na-trauma, ug namatay pa gani ang uban. Tungod niini nga mga krimen, nahadlok pag-ayo ang mga tawo.

Gitagna sa Bibliya nga ang mga tawo karon “bayolente, walay gugma sa pagkamaayo,” ug “walay pagmahal sa isigkatawo.” (2 Timoteo 3:1-5) Busa moabot ba gyod ang panahon nga wala na unyay ingon niini nga mga krimen? Unsay giingon sa Bibliya?

Kon sa unsang paagi matapos ang mga krimen nga resulta sa pagdumot

Ang Bibliya nagpasalig nato nga kaya sa Diyos nga taposon ang kapintasan, ug himoon gyod ni niya.

• “Ang mga daotan pagalaglagon . . . Apan ang mga maaghop manag-iya sa yuta, ug mabatonan nila ang tumang kalipay tungod sa dagayang pakigdait.” (Salmo 37:9-11) Dili gyod tugotan sa Diyos nga ang bayolenteng mga tawo padayong mobuhat ug daotan sa uban.

• “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.” (Pinadayag 21:4) Wagtangon sa Diyos ang mga epekto sa tanang pisikal, mental, ug emosyonal nga kadaot nga naeksperyensiyahan sa mga tawo.

• “Duna unyay pagkabanhaw.” (Buhat 24:15) Minilyon ang banhawon sa Diyos, apil na kadtong mga nangamatay tungod sa krimen nga resulta sa pagdumot.

Kon unsaon pagdaog ang pagdumot

Ang Bibliya wala lang maghatag natog paglaom. Nagtudlo pod ni nato kon unsaon pagdaog ang pagdumot ug kon unsay atong himoon kon biktima ta niini. Gidasig ka namo nga sayron ang tubag sa Bibliya niining importanteng mga pangutana:

• Unsay atong mahimo aron madaog nato ang pagdumot nga moresultag kapintasan? Sayra kon unsay gitudlo sa Bibliya diha sa magasing Bantayanang Torre nga nag-ulohang “Kon Unsaon Pagwala sa Pagdumot.”

• Nganong gitugotan man sa Diyos nga magpadayon ang grabeng pag-antos? Sayra ang tin-awng eksplinasyon nga gibase sa Bibliya diha sa video nga Nganong Gitugotan sa Diyos ang Pag-antos?