Ang Pagkapriso Wala Makapabulag Nako Kang Jehova

Mibalik mi sa Ukraine niadtong 1966. Usa sa mga una nakong mahinumdoman mao ang mga panahon nga mobisita mi sa akong lolo sa prisohan niadtong kuwatro anyos pa ko. Layo ang among gibiyahe ni Mama sakay sa tren gikan sa Kryvyi Rih, Ukraine, paingon sa Mordovian penal colony sa central Russia. Duha ka oras ra namo makauban si Lolo nga kanunayng gibantayan ug mga guwardiya, pero mosugot sila nga iya kong sabakon.

Wala Mohunong sa Pagsalig Kang Jehova Samtang Nag-eskuwela

Samtang nagdako sa Ukraine, kadaghang nasulayan ang akong pagsalig kang Jehova. Pananglitan, dihang magsugod nag eskuwela ang mga bata, kinahanglan silang magbutang ug bituon nga naay hulagway sa batan-ong si Lenin diha sa ilang uniform.a Pipila ka tuig sa ulahi, ang mga bata kinahanglang magsul-ob ug pula nga scarf ingong simbolo sa ilang suportar sa mga ideya ni Lenin. Wala ko mosuot sa maong politikal nga mga simbolo kay nahibalo ko nga si Jehova takos sa atong bug-os nga debosyon.

Gitabangan ko sa akong mga ginikanan nga makadesisyon nga moalagad kang Jehova pinaagi sa mapailobong pagpatin-aw nako sa mga topiko sama sa pagkaneyutral sa politika. Gidasig ko nila nga magkugi sa pag-eskuwela aron madayeg si Jehova.

Usa ka adlaw niana, naay miadto sa among eskuwelahan nga journalist gikan sa magazine nga Nauka i religiia (Science and Religion), usa ka national magazine nga nagsulay ug kombinsir sa mga tawo nga dili mosalig sa Diyos o sa relihiyon. Gipalingkod ko sa akong mga titser sa atubangan samtang nag-lecture ang journalist aron kombinsihon ang mga estudyante nga walay Diyos.

Human sa lecture, gidala ko nila ngadto sa journalist ug gihangyo siya nga estoryahon ko. Gipangutana ko niya kon unsay akong relihiyon, ug sa way duhaduha mitubag ko, “Saksi ni Jehova ko.” Wala na siyay laing gisulti. Igo ra ko niyang gipasalamatan sa pagpaminaw pag-ayo sa lecture. Puwerteng lagota sa akong mga titser!

Wala Mohunong sa Pagsalig Kang Jehova Ingong Pamilya

Ang among tibuok pamilya misalig sa tabang ni Jehova sa pag-imprenta ug mga literatura sa Bibliya sa among balay ug sa pag-apod-apod niini. Dugang pa, si Papa nag-alagad ingong tigdumala sa sirkito sa central Ukraine, nga mobisita sa mga kongregasyon ug grupo.

Usa ka hapon niadtong Pebrero 1978—duha lang ka adlaw una matawo ang among kamanghoran nga si Pavlik—miuli ko gikan sa eskuwelahan ug akong nakita nga nagkatag na ang among mga gamit sa balay. Gi-raid sa mga polis ang among balay ug gipanguha ang tanan namong literatura.

Pagkaugma, nahimuot ko kay ang akong mga titser nagsigeg tutok namo sa akong manghod nga si Mykhailo, kay naghunahuna sila nga American spy among ginikanan. Paglabay sa panahon, daghang maestra ang nakaamgo nga sayop diay sila. Ang uban nakong classmate na-Saksi pa gani sa ulahi!

Pagka-1981, gi-raid na pod among balay. Bisag dili pa ko 18 anyos, gipatawag ko sa opisina sa prosecutor uban sa akong papa ug lolo. Gihadlok ko sa imbestigador nga mapriso daw ko. Pero adtong panahona, naa poy tawo nga nakasibilyan nga misaad nako ug maayong kaugmaon kon makigtinabangay ko nila. Mora ko nilag gihatagan ug opsiyon—kon pilion ba nako ang silot o ang ganti. Aron kombinsihon ko nga makigtinabangay nila, ila kong gipahinumdoman adtong napriso ang akong papa, lolo, ug mga uyoan. Wala mahibalo ang mga polis nga mas nakombinsir na hinuon ko nga malahutay nako ang pagkapriso sa tabang ni Jehova.—Filipos 4:13.

Wala Mohunong sa Pagsalig Kang Jehova Samtang Napriso

Pagkasunod adlaw human ko mag-18 anyos, gipareport ko aron magsundalo. Kay dili man ko magsundalo, gibutang ko sa pretrial detention. Nagpasabot ni nga prisohon ko sa dako nga selda uban sa mga 85 ka tawo, nga magpulihanay ug tulog sa 34 ka higdaanan. Kausa sa usa ka semana ra mi tugotan nga maligo.

Pagsulod nako sa selda, gilamba ang sira ug mitan-aw silang tanan nako. Ang mga tawo nga naa sa usa ka suok sa selda nangutana dayon kon unsay akong kaso. Bisag gikulbaan ko, akong nahinumdoman ang asoy sa Bibliya bahin kang Daniel nga wala maunsa diha sa bangag nga naay mga leyon. Kini nga asoy nakatabang nako nga bug-os mosalig kang Jehova ug magpabiling kalmado.—Isaias 30:15; Daniel 6:21, 22.

Human sa panihapon, usa sa mga piniriso ang daghag pangutana bahin sa akong tinuohan. Anam-anam nga nahilom ang mga piniriso diha sa selda ug naminaw sa among panag-estorya. Upat o lima ka oras nakong gihisgotan ang akong tinuohan uban nila. Mapasalamaton kaayo ko nga nahimo nako ni sa tabang ni Jehova!

Sa wala pa ko gihusay, mihangyo ko kang Jehova nga hatagan ko ug kaalam ug kaisog aron madepensahan nako ang akong pagtuo. Gisulayan pagpamatuod sa prosecutor nga pasangil lang nako ang pagtuo sa Diyos aron makalikay ko sa pagsundalo. Gisulayan nakog kombinsir ang korte nga kon magsundalo ko, dili malipay ang pinakagamhanang Persona sa uniberso. Bisan pa niana, pagka-1982, gihukman kong sad-an sa korte ug gisentensiyahan ug duha ka tuig nga pagkapriso sa penal colony.

Mapasalamaton ko nga naa koy kauban nga lima ka Saksi diha sa colony. Bisag kadiyot ra ming magkaestorya, usahay pipila ka minuto ra, kanunay ming maghisgot ug teksto sa Bibliya. Wala mi Bibliya, pero sagad butangan ug mga teksto sa among mga pamilya ug higala ang ilang mga sulat. Usahay makakita pod gani mig mga teksto sa sekular nga literatura!

Wala Mohunong sa Pagsalig Kang Jehova Panahon sa Medikal nga Emerhensiya

Pagka-1983, samtang naa ko sa workshop sa prisohan, aksidenteng nahagbong gikan sa crane ang mga metal sheet nga mga duha ka tonelada ang gibug-aton. Naigo ko ani sa likod, nalamba ko, ug nadat-ogan ani akong wala nga bitiis.

Nangayo ko kang Jehova ug kusog aron maantos nako ang grabeng kasakit. Giingnan ko sa nurse sa prisohan nga mamalikas ug kusog aron makuhaan ang sakit, pero mikanta hinuon kog mga Kingdom song.

Aron makaabot sa ospital, kinahanglan kong isakay ug trak, pambot, ug dayon sa ambulansiya. Naabtan ug unom ka oras ang biyahe, ug nianang panahona, daghang dugo ang nawala nako. Segurado ko nga kinahanglan gyod kong operahan, maong miampo ko nga magmaalamon unta ang mga doktor ug nga tahoron nila ang akong binase sa Bibliya nga baroganan bahin sa pag-abonog dugo. Dihang gipatin-aw nako sa doktor ang akong tinuohan, dili siya maminaw. Pero gihangyo nako siya nga tahoron ang akong desisyon. Giingnan nako siya nga akoy mahimong responsable sa dili maayong mga resulta kay wala ko magpaabono. Maayo na lang kay misugot siya nga operahan ko nga dili mag-abonog dugo. Pero kinahanglang putlon ang akong wala nga bitiis.

Luya kaayo ko human sa operasyon. Pila ka semana nga kritikal ang akong kondisyon. Usa ka hapon, giingnan ko sa usa ka nurse nga aron maulian dayon ko, hatagan kog pagkaon nga mas sustansiyado kay sa among ginakaon sa prisohan. Kini nga pagkaon ibutang sa mga nurse diha sa ref. Kada adlaw, hatagan kog usa ka kutsara nga dugos, presko nga itlog, ug gamayng mantekilya. Gihikay sa akong ginikanan nga naa koy suplay aning mga pagkaona human nila mahibaloi ang bahin sa aksidente. Pero kausa ra midawat ani ang opisyal nga tigdawat sa delivery.

Bisan pa ana, dili mubo ang kamot ni Jehova. (Isaias 59:1) Human nilag ilis sa bendahe sa akong samad, hatagan ko sa mga nurse sa ilang balon nga pagkaon. Magbutang pod sila sa ref ug bag-ong stock inigkahurot sa akong sustansiyadong pagkaon. Nagpahinumdom ni nako sa asoy sa Bibliya bahin sa balo nga ang banga wala makabsi ug lana.—1 Hari 17:14-16.

Sa ngadtongadto, nakarekober ra ko. Nahupay gyod ko ug nadasig sa 107 ka sulat nga akong nadawat gikan sa akong pamilya ug mga higala, ug gibalosan nako ni tanan. Nakadawat pa gani kog package gikan sa mga igsoon sa laing prison colony!

Human sa duha ka bulan, nakaligo ra gyod ko! Ug gusto na kaayo nakong mobalik sa prison colony aron makauban na nako pag-usab ang mga igsoon.

Samtang giandam sa usa sa mga doktor ang akong discharge paper sa ospital, gipaadto ko niya sa iyang opisina ug daghan siyag pangutana bahin sa akong pagtuo. Human sa among panag-estorya, nanghinaot siya nga padayon nakong mahuptan ang akong pagtuo. Wa gyod ko magdahom nga mao toy isulti sa usa nga nakauniporme ug pangsundalo!

Pagka-Abril 1984, miatubang ko sa husay para sa akong parole ug gipangutana ko kon magsundalo ba ko. Mitubag ko nga di na ni angayng ipangutana kay di na man gani ko katindog nga way crutches ug usa na lang ang akong tiil. Dayon gipangutana na pod ko nila: “Unsa man imong buhaton kon duha pay imong tiil?” Miingon ko nga dili gihapon ko magsundalo ug nga determinado kong magpabiling maunongon sa akong Diyos. Miingon sila nga seguroon nila nga dili ko makagawas hangtod dili mahuman ang akong sentensiya. Pero nakagawas ko sa prisohan duha ka bulan ug 12 ka adlaw nga abante sa akong gitakdang paggawas.

Wala Mohunong sa Pagsalig Kang Jehova Paggawas sa Prisohan

Usa ka tuig human ko migawas sa prisohan, nakabaton kog artipisyal nga tiil. Kada buntag, maabtan kog usa ka oras sa pagtaod ini. Panahon sa tingtugnaw, mas lisod ning itaod ug ang nabilin sa akong tiil dili dayon moinit kay dili na maayo ang sirkulasyon sa akong dugo. Wala na ko makadagan sukad sa 19 anyos ko, maong nangandoy kong makadagan sa bag-ong kalibotan.—Isaias 35:6.

Naglisod kog pangitag trabaho kay daghan ang dili modawat ug baldado. Pero bisan pa sa akong artipisyal nga tiil, wala gyod ko makasulay ug trabaho nga maglingkod lang. Taudtaod kong nagtrabaho ingong mekaniko nga mag-ayo ug lainlaing klase nga sakyanan. Sa ulahi, nagtrabaho ko sa construction.

Pagka-1986, nagminyo mi sa guwapa nga sister nga si Svitlana. Parehas nako, Saksi pod ang mga apohan ni Svitlana. Pirme siyang moingon nga nagpasalamat gyod siya nga sa sinugdanan pa lang sa among panagtrato, nagsabot na mi nga si Jehova gyod ang kanunay namong unahon sa among kaminyoon.

Ang among mga anak nga si Olia ug Volodia nakakat-on ug mga skill sa construction kay gitabangan ko nila sa pag-ayo sa karaan nga balay nga among gipuy-an. Pagkaadulto nila, na-enjoy nila ang pagtabang sa pagtukod ug mga Kingdom Hall. Nagregular payunir na pod sila. Karon, si Olia nag-alagad ingong construction servant, ug si Volodia ingong ansiyano.

Kanunay gyod kong gisuportahan ni Svitlana, nga nakatabang nako sa pag-atiman sa akong mga responsibilidad sa kongregasyon. Mga 30 ka tuig kanhi, daghang kongregasyon sa Ukraine ang dunay kapig 200 ka magmamantala pero usa o duha lang ang ansiyano. Ug kausa sa usa ka bulan, panahon sa weekend, maghatod kog literatura sa mga kongregasyon sa central Ukraine.

Wala Mohunong sa Pagsalig Kang Jehova sa Di pa Dugayng Katuigan

Niadtong 2022, midesisyon mi ni Svitlana nga mobiya sa among balay sa Kryvyi Rih. Nag-alagad mi karon sa usa ka kongregasyon sa Austria.

Sukad sa bata pa kaayo ko, nakakat-on ko sa ehemplo sa akong mga paryenteng Saksi nga nagmakontento bisan pa sa mga kalisdanan nga ilang naatubang. Gitabangan mi sa Bibliya nga mas mailhan ang atong Maglalalang ug makabaton ug suod nga relasyon kaniya. (Santiago 4:8) Kana nga relasyon naghatag ug katuyoan sa among kinabuhi. Mapasalamaton ko nga sa tanang kalisdanan nga akong naatubang, nahatag nako kang Jehova ang kadungganan nga angay kaniya.