Dakong Problema Bahin sa Epekto sa Social Media Ngadto sa mga Batan-on

Sa 2025, ang mga gobyerno sa tibuok kalibotan nabalaka bahin sa epekto sa social media ngadto sa mga batan-on. Gani, gidili sa usa ka nasod nga mogamit ug social media kadtong mga nag-edad ug 16 paubos, ug ang ubang nasod nagplano pod sa paghimo ana.

Makapainteres kay bisan ang ubang batan-on miingon nga ang paggamit ug social media puwedeng makadaot nila. Ang survey nga gihimo didto sa United States sa Pew Research Center, nga gi-release niadtong Abril 2025, naghisgot nga “halos katunga sa mga batan-on (48%) ang miingon [nga ang social media] nga mga site sagad naay dili maayong epekto sa ilang mga kaedad.”

Ang mga eksperto nagpasidaan bahin sa epekto sa social media sa mental health sa mga batan-on. Sa miaging tuig, si Dr. Vivek Murthy, nga surgeon general sa U.S. kaniadto, miingon: “Ang problema sa mental health sa mga batan-on dako kaayo ug kinahanglan ning aksiyonan dayon—ug ang usa sa pangunang mga hinungdan niini mao ang social media.”

Unsaon pagprotektar sa mga ginikanan ang ilang mga anak gikan sa kapeligrohan sa social media? Ang Bibliya naay praktikal nga tambag.

Ang mahimo sa mga ginikanan

Konsideraha kini nga mga prinsipyo sa Bibliya.

“Ang maalamon mamalandong sa matag lakang.”—Proverbio 14:15.

Tungod sa mga kapeligrohan, ayawg kapresyur nga pagamitog social media ang imong anak. Ayha pa nimo pagamitog social media ang imong anak, seguroa nga makamao na siyang motuman sa limitasyon sa panahon nga imong gihatag sa paggamit niini. Seguroa pod nga kaya na niyang mapadayon ang maayong panaghigalaay ug molikay sa dili maayong mga content.

• Aron makakat-on ug dugang, basaha ang artikulong “Angay Bang Mogamit ug Social Media ang Akong Anak?” ug “Tudloi ang Imong Tin-edyer nga Anak sa Hustong Paggamit sa Social Media.”

“[Gamita] ang inyong panahon sa kinamaayohang paagi.”—Efeso 5:16.

Kon pagamiton na nimog social media ang imong anak, pagbutang ug limitasyon kon unsaon ni niya paggamit ug sultihi siya kon nganong makatabang ni nga magamit niya ang social media sa hustong paagi. Panid-i pirme kon naa bay kausaban ang kinaiya sa imong anak nga posibleng magpakita nga kinahanglang limitahan ang iyang access sa social media.

• Gamita ang whiteboard animation nga Pagbantay sa Paggamit sa Social Network sa pagtabang sa imong anak nga masabtan kon nganong gikinahanglan ang mga limitasyon.

Para sa dugang binase sa Bibliya nga sugyot bahin sa mahimo sa mga ginikanan, tan-awa ang artikulo nga “Usa ka Taas ug Ranggo nga Health Official Nagpasidaan sa Epekto sa Social Media sa mga Batan-on—Unsay Giingon sa Bibliya?”

Pagkat-og dugang

Ang Bibliya nag-ingon nga nagkinabuhi na ta sa “kuyaw nga mga panahong lisod sagubangon.” (2 Timoteo 3:1-5) Pero naa pod ni praktikal nga mga tambag nga makatabang natong makaya ang lisod nga mga panahon. Ang listahan sa kapig 20 ka binase sa Bibliya nga mga artikulo para sa mga ginikanan ug sa ilang mga anak makita sa artikulo nga “Nagkadaghang Problema sa Mental Health sa mga Tin-edyer—Unsay Giingon sa Bibliya?”