Kanus-a Matapos ang mga Gubat?—Unsay Giingon sa Bibliya?

Ang gubat sa Middle East usa lang sa daghang gubat nga nagakahitabo sa tibuok kalibotan.

“Karon ang kinatas-ang rekord sa nahitabong mga gubat ug panag-away sukad sa Ikaduhang Gubat sa Kalibotan ug duha ka bilyong tawo, o usa sa kada upat ka tawo, ang apektado niini.”—United Nations Security Council, Enero 26, 2023.

Apil sa mga nasod nga naay grabeng panag-away ang Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ug Haiti.a

Kanus-a matapos ang mga gubat? Naa kahay mahimo ang mga politiko aron masulbad ni? Unsay giingon sa Bibliya?

Kalibotan nga punog gubat

Ang mga gubat karon nagpakita nga hapit nang taposon ang tanang gubat. Katumanan ni sa tagna sa Bibliya bahin sa panahon nato karon. Gitawag ni sa Bibliya ug “hinapos sa sistema sa mga butang.”—Mateo 24:3.

• “Makadungog mog mga gubat sa lainlaing dapit. . . . Ang nasod makiggubat batok sa nasod ug ang gingharian batok sa gingharian.”—Mateo 24:6, 7.

Basaha ang artikulong “Unsa ang Ilhanan sa ‘Kataposang mga Adlaw,’ o ‘Panahon sa Kataposan’?” aron masayran kon nganong ang mga gubat karon katumanan sa tagna sa Bibliya.

Ang gubat nga magtapos sa tanang gubat

Gitagna sa Bibliya nga matapos ang tanang gubat. Sa unsang paagi? Dili pinaagi sa paningkamot sa mga tawo, kondili pinaagi sa Armagedon, ang “gubat sa dakong adlaw sa Diyos nga Labing Gamhanan.” (Pinadayag 16:14, 16) Human ani nga gubat, tumanon sa Diyos ang iyang saad nga ang mga tawo mabuhi nga malinawon hangtod sa hangtod.—Salmo 37:10, 11, 29.

Aron makakat-og dugang bahin sa gubat sa Diyos nga magtapos sa tanang gubat, basaha ang artikulong “Unsa ang Gubat sa Armagedon?”