Unsa ang Espirituwalidad? Puwede ba Kong Mahimong Espirituwal nga Tawo Bisag Wala Koy Relihiyon?
Tubag sa Bibliya
Sa Bibliya, ang espirituwalidad nagpasabot ug sinserong tinguha nga mapalipay ang Diyos ug masundog ang iyang panghunahuna. Ang espirituwal nga tawo naningkamot nga mosunod sa mga prinsipyo sa Diyos ug magpagiya sa Iyang balaang espiritu.a—Roma 8:5; Efeso 5:1.
Aron ipatin-aw kon unsa ang espirituwalidad, ang Bibliya sagad naghisgot kon unsay ginahimo sa mga tawong dili espirituwal. Pananglitan, lahi sa espirituwal nga tawo, “ang pisikal nga tawo dili modawat sa mga butang may kalabotan sa espiritu sa Diyos,” o sa mga gitudlo sa Diyos. (1 Corinto 2:14-16) Dili parehas sa espirituwal nga tawo, ang unodnong tawo daling ‘magselos ug makig-away’ imbes nga mahimong mahinatagon ug buotan. (1 Corinto 3:1-3) Ug kadtong mga tigbutangbutang, nga maoy hinungdan nga mag-away ang suod nga managhigala, gitawag nga “mga tawong mananapon, nga walay espirituwalidad.”—Judas 19; Proverbio 16:28.b
Niining artikuloha
Nganong kaya natong mahimong espirituwal nga tawo?
Naa tay potensiyal nga mahimong espirituwal nga mga tawo kay gihimo ta sumala sa larawan sa Diyos. (Genesis 1:27) Mao nay rason nga ang kadaghanan naay apresasyon sa mga butang nga dili pisikal o dili makita.
Kaya natong mapakita ang mga kinaiya ni Jehovac nga Diyos. Pananglitan, makapakita tag kaluoy, dili ta ganahag pagpaborpabor, ug gusto tag kalinaw. (Santiago 3:17) Gawas pa, hatagan sa Diyos ug balaang espiritu kadtong naningkamot nga mosunod sa iyang mga sugo.—Buhat 5:32.
Nganong importante ang pagkahimong espirituwal nga tawo?
Ang pagkahimong espirituwal nga tawo moresultag “kinabuhi ug kalinaw.” (Roma 8:6) Bililhon kaayo ni nga mga regalo gikan sa Diyos.
Kinabuhi: Ang Diyos nagsaad nga hatagan niyag kinabuhing walay kataposan ang espirituwal nga mga tawo.—Juan 17:3; Galacia 6:8.
Kalinaw: Nagpasabot ni ug malinawong relasyon sa Diyos. Kadtong nagpokus lang sa ilang pisikal nga panginahanglan maoy mga kaaway sa Diyos. (Roma 8:7) Gawas pa, kadtong naningkamot nga mahimong espirituwal nga tawo makadawat ug “kalinaw nga gikan sa Diyos, nga labaw sa tanang pagsabot.” (Filipos 4:6, 7) Kini nga kalinaw sa hunahuna makatabang nila nga magmalipayon.—Mateo 5:3.
Unsay akong buhaton aron mahimo kong espirituwal nga tawo?
Tun-i ug tumana ang mga sugo sa Diyos. Mahimo nimo ni pinaagi sa pagbasa sa Bibliya. Naa sa Bibliya ang mensahe sa Diyos nga gisulat sa mga tawo nga “gigiyahan sa balaang espiritu.” (2 Pedro 1:21) Ang imong makat-onan makatabang nimo sa pagsimba sa Diyos diha “sa espiritu ug kamatuoran,” buot ipasabot, ang imong pagsimba giniyahan sa balaang espiritu ug nahiuyon sa kon unsay gusto sa Diyos.—Juan 4:24.
Pag-ampo sa Diyos nga tabangan ka. (Lucas 11:13) Tabangan ka sa Diyos sa pagpakita sa mga kinaiya nga magpaila nga espirituwal ka nga tawo. (Galacia 5:22, 23) Ang pag-ampo makahatag pod nimog kaalam sa paghimog maayong mga desisyon aron imong maatubang ang mga problema sa kinabuhi.—Santiago 1:5.
Pakig-uban sa espirituwal nga mga tawo. Dasigon ka nila nga palig-onon ang imong espirituwalidad. (Roma 1:11, 12) Pero kon makig-uban ka sa mga tawo nga ang panghunahuna lahi sa panghunahuna sa Diyos, madaot ang imong espirituwalidad.—Santiago 4:4.
Kinahanglan ba nga naa koy relihiyon aron mahimo kong espirituwal nga tawo?
Kon ang usa naay relihiyon, dili awtomatiko nga espirituwal na siya nga tawo. Ang Bibliya nag-ingon: “Kon may tawo nga naghunahuna nga siya relihiyoso apan wala magkontrolar sa iyang dila, gilimbongan niya ang iyang kaugalingong kasingkasing, ug ang iyang pagsimba walay pulos.”—Santiago 1:26, footnote.
Pero gipakita sa Bibliya nga ang espirituwal nga mga tawo nagsimba sa Diyos sa paagi nga gusto niya. Ilang giila nga naay “usa [lang] ka espiritu”—ang balaang espiritu sa Diyos. Kana nga espiritu nagpalihok nila sa pagsimba sa Diyos ingong “usa ka lawas,” buot ipasabot, usa ka organisadong grupo nga ‘naningkamot nga mamentinar ang panaghiusa nga ilang nabatonan pinaagi sa balaang espiritu.’—Efeso 4:1-4.
Sayop nga mga ideya bahin sa espirituwalidad
Sayop nga ideya: Apil sa espirituwalidad ang bisan unsang paagi sa pagkinabuhi nga makahatag sa usa ug katagbawan o makapabati niya nga maayo siya nga tawo.
Ang tinuod: Sa Bibliya, ang espirituwalidad maoy paagi sa pagkinabuhi nga gigiyahan sa mga prinsipyo sa Diyos. Wala ni magpasabot nga ang usa maningkamot nga mahimong maayong tawo nga walay tabang sa Diyos. Ang espirituwal nga mga tawo mobatig katagbawan pinaagi sa pag-ila nga si Jehova ang nagbuhat nila ug pinaagi sa pagkinabuhi uyon sa iyang katuyoan.—Salmo 100:3.
Sayop nga ideya: Ang usa mahimong espirituwal nga tawo kon pasakitan o did-an niya pag-ayo ang iyang kaugalingon.
Ang tinuod: Ang pagmaltrato sa kaugalingon maoy paagi sa ‘pagsimba nga tawo ang nagbuot,’ ug kini maoy unodnong panghunahuna. (Colosas 2:18, 23) Ang Bibliya nag-ingon nga ang espirituwal nga paagi sa pagkinabuhi makahatag ug kalipay, dili kasakit.—Proverbio 10:22.
Sayop nga ideya: Ang pagpakig-estorya sa mga espiritu o ang uban pang paagi sa espiritismo makatabang sa usa nga mahimong espirituwal.
Ang tinuod: Kadtong nagtuo ug espiritismo naghunahuna nga ang mga espiritu sa mga patay makahimo sa pagpakig-estorya sa mga buhi. Pero ang Bibliya nagtudlo nga ang mga patay walay nahibaloan nga bisan unsa. (Ecclesiastes 9:5) Ang tinuod, ang espiritismo maoy pagpakig-estorya sa mga demonyo, nga mga kaaway sa Diyos. Ang espiritismo makapasuko sa Diyos ug makapugong sa usa nga mahimong espirituwal nga tawo.—Levitico 20:6; Deuteronomio 18:11, 12.
Sayop nga ideya: Ang tanang gihimo sa Diyos naay espirituwalidad.
Ang tinuod: Ang tanang gihimo sa Diyos makahatag niyag pagdayeg. (Salmo 145:10; Roma 1:20) Pero kadto lang gihatagan sa Diyos ug katakos sa panghunahuna ang makaugmad ug espirituwalidad. Dili ingon ana ang mga hayop. Molihok lang sila base sa naka-program sa ilang utok, ug dili posible nila nga makigsuod sa Diyos. Molihok sila base lang sa diktar sa ilang pisikal nga panginahanglan. (2 Pedro 2:12) Busa gipakita sa Bibliya nga ang tawong espirituwal lahi kaayo sa tawo nga mananapon ug kinaiya ug panghunahuna.—Santiago 3:15; Judas 19.
a Sa Bibliya, ang orihinal nga mga pulong nga gihubad ug “espiritu” sa simpleng pagkasulti nagkahulogan ug “gininhawa.” Nagpasabot pod ni ug butang nga dili makita pero naglihok. Ang Bibliya nag-ingon nga ang Diyos mao ang Kinalabwang Espiritung Persona. Ang espirituwal nga tawo magpagiya sa kon unsay gusto sa Diyos ug magpagiya pod sa Iyang balaang espiritu.
b Sa Bibliya, ang mga terminong “unodnon” ug “pisikal,” kon mga tawo ang gipasabot, nagtumong sa mga tawo nga maghunahuna o molihok base lang sa ilang pisikal nga panginahanglan, nga wala kaayoy pagpakabana o dili gyod magpakabana sa mga prinsipyo sa Diyos.
c Jehova ang ngalan sa Diyos sumala sa Bibliya.—Salmo 83:18.